ଭକ୍ତ ଚରଣ ସାହୁ, ଯାଜପୁର, ୨୭ ଜୁଲାଇ ୨୦୨୩
ତୁମେ ଏବେ
ସବୁ ସୀମା ସରହଦ ଡେଇଁ
ମୋ ସାମ୍ନାରେ…
ଖୁବ ଆପଣେଇ ନେଉଛ
ଛୁଉଁ ଛୁଉଁ……
ହେଇ ଦେଖ
ତୁମେ ଆସିବା ପରେ
ଜହ୍ନ କେମିତି ହସୁଛି
ତାରକା ମେଳରେ…
ପବନ ମଳୟ
ହୋଇ ଯାଉଛି କ୍ଷଣୁ କ୍ଷଣ……
କଣ୍ଟକିତ ସବୁ ରାସ୍ତା
ଏବେ ଫୁଲ ଶଯ୍ୟା…
ସାଗରର ଆନମନା ଲହଡ଼ି
ଛୁଇଁଯାଉଛି ବେଳାଭୂମିକୁ……
ତୁମେ ଆସିଲେ
ଏମିତି କାହିଁକି
ବଦଳି ଯାଉଛି ଋତୁଚକ୍ର…
ମୋ ଚାରିପାଖେ
ଖାଲି ମଳୟର ଆବାହନୀ……
ତୁମେ ସତେ
କେଉଁ ଉପାଦନାରେ
ଗଢ଼ା କେଜାଣି
ତୁମେ ମହକି ଉଠୁଛ ବାସ୍ନାରେ…
ଏପଟେ ଫୁଲ ସବୁ ବାସ୍ନାହରା……
ହେଇ ଦେଖ
ତୁମ ଆଗମନରେ
ବର୍ଷା କେମିତି
ଓଦା କରିଦେଉଛି ମାଟିକୁ…
ଟାଣ ଖରା ନରମି ଯାଉଛି……
ତୁମେ ଆସିଲେ
ଆନମନା ମନ ପକ୍ଷୀ
ଉଡ଼ି ଯାଉଛି କେଉଁ ଏକ
ଅଜଣା ଇଲାକାକୁ…
ହୃଦ କନ୍ଦରରେ
ଫୁଟୁଛି ପ୍ରୀତିର କଦମ୍ବ……
ତୁମେ ଏମିତି ଆସୁଥାଅ
ମୋ’ ସାମ୍ନାକୁ
ଚିରକାଳ…
ଚୁମି ଯାଉଥାଅ
ଅବଶିଷ୍ଟ ସମୟକୁ…
ଆଉ ଭେଦି ଯାଅ ଅନ୍ତରୀକ୍ଷକୁ……
