ଦେବେନ୍ଦ୍ର କୁମାର ସାହୁ, ନିଶ୍ଚିନ୍ତକୋଇଲି, ୨୮ ଅପ୍ରେଲ ୨୦୨୬
ଓଡ଼ିଆ ଜାତିର ବୀରତ୍ୱ ର ଗାଥା
ତୁମେ ପଢିଥିଲ ମନଦେଇ
ଓଡ଼ିଆ ଭାଷାର ବିଭବ ସୌନ୍ଦର୍ଯ୍ୟ
ତୁମ ହୃଦେ ଥିଲା ଲେଖାହୋଇ।
ଓଡ଼ିଆ ମାନଙ୍କ ଐତିହ୍ୟ ସଂସ୍କୃତି
ରହିଥିଲା ତୁମ ଜିହ୍ୱା ଅଗ୍ରେ
ଓଡ଼ିଆ ର ସେବା ସମର୍ପଣ ଭାବ
ଚାଲୁଥିଲା ଦେଶ ଅଗ୍ରଭାଗେ।
ଓଡ଼ିଆ ଭାଷା ର କବି ସାହିତ୍ୟିକ
ବିଶ୍ୱ ହିତ କରି ଜୀବନ ବ୍ରତ
ଓଡ଼ିଆ ପଣର ମହାନତା ସବୁ
ଦର୍ଶାଏ ତାଙ୍କର ଲେଖା ସାହିତ୍ୟ।
ଓଡ଼ିଆ ନିଜର ହୃଦୟ କନ୍ଦରେ
ବିଶ୍ୱ ଭାତୃ ଭାବ ରଖି ସାଇତି
ଓଡ଼ିଆ ଜୀବନ ଦେଇଛି ଯୁଦ୍ଧରେ
କ୍ରୁର ଲୋକ ହୃଦେ ଭରିଛି ଶାନ୍ତି।
ଓଡ଼ିଆ ଠାକୁର ପ୍ରଭୁ ଜଗନ୍ନାଥ
ନିଅନ୍ତି କୋଳେଇ ବିଶ୍ୱ ଜନଙ୍କୁ
ଓଡ଼ିଆ ପ୍ରାଣର ଆବେଗ ସେ ପ୍ରଭୁ
ଉଦବୁଧ କରନ୍ତି ବିଶ୍ୱବାସୀଙ୍କୁ।
ଓଡିଶା ମାଟିରେ ଜନ୍ମ ଲଭି ତୁମେ
ଦେଖିଲ ତାହାର ଖଣ୍ଡିତ ରୂପ
ନିସ୍ଵାର୍ଥପରତା ସ୍ୱାଭିମାନ ରଖି
ଜାତିର ସୁପ୍ତତା କରିଲ ଲୋପ।
ତୁମ ଯୋଗୁଁ ଆଜି ଆମର ଓଡିଶା
ପାଇଅଛି ନୂଆ ପରିଚୟ
ନିଜକୁ ଓଡ଼ିଆ କହି ସଗୌରବେ
ଚାଲୁଅଛି ଆମେ ହୋଇ ନିର୍ଭୟ।
ତୁମେ ଓଡ଼ିଆର ସ୍ୱଗୋତ୍ର ପୁରୁଷ
ତୁମେ ଏ ଜାତିର ଇତିହାସ
ତୁମର ଜନମ ତାରିଖରେ ଆଜି
ତୁମକୁ ପ୍ରଣତି ଶତସହସ୍ର।
