ପ୍ରଭୁକଲ୍ୟାଣ ମହାପାତ୍ର, ଭୁବନେଶ୍ୱର, ୪ ଜୁନ୍ ୨୦୨୪
ସକାଳେ ଭୋଟ ଗଣତି ଆରମ୍ଭ ହୋଇଚି
ବିଭିନ୍ନ ଚକ୍ରରେ ତାହା ଭାଗ କରାଯାଇଚି
କେତେବେଳେ ଜଣେ ପ୍ରାର୍ଥୀ ଆଗେଇ ଯାଉଚି
ଆଉ କେତେବେଳେ ସିଏ ପଛେଇ ରହୁଚି
ସାପ ସିଡ଼ି ଖେଳ ଭଳି ଆଗପଛ ଚାଲିଚି
ଜିତିବା ପ୍ରାର୍ଥୀଙ୍କୁ ଜାଣିବା ଅସ୍ପଷ୍ଟ ହେଉଚି ।। ୧ ।।
ମଧ୍ୟାହ୍ନେ ଭୋଟ ଗଣନା ଅବିରାମ ଚାଲିଛି
କେତେକ ଆସନେ ଗଣତି ଅଧା ଟପି ଯାଇଛି
ଲଢ଼େଇ ଯେହେତୁ ବେଶ୍ ଘମାଘୋଟ ହୋଇଛି
ତହିଁରୁ ପରିଣାମ କଳନା ଅସହଜ ହେଉଛି
ପ୍ରାର୍ଥୀମାନଙ୍କ ଛାତି ଖାଲି ଉଠୁଚି ପଡୁଛି
ଅଳ୍ପ ଭୋଟ ବ୍ୟବଧାନ ତାଙ୍କୁ ଅଥୟ କରୁଛି ।। ୨ ।।
ଅପରାହ୍ନେ ଭୋଟ ଗଣତି ଅବ୍ୟାହତ ରହିଚି
ଅନେକ ସ୍ଥାନରେ ଚିତ୍ର ସ୍ପଷ୍ଟ ହୋଇ ଯାଉଚି
ଜିତାପଟ ପ୍ରାର୍ଥୀଙ୍କ ଛାତି କୁଣ୍ଢମୋଟ ହେଉଚି
ତାଙ୍କ ସମର୍ଥକଙ୍କ ଶୋଭାଯାତ୍ରା ବାହାରି ପଡୁଚି
ପରାଜିତ ପ୍ରାର୍ଥୀଙ୍କ ମନେ ଗ୍ଲାନି ଭରି ଯାଉଚି
ଅନୁଶୋଚନାରେ ସିଏ ଘରେ ଶୋଇ ପଡ଼ୁଚି ।। ୩ ।।
ସଂଧ୍ୟାରେ ଭୋଟ ଗଣନାର ସ୍ପଷ୍ଟ ଚିତ୍ର ମିଳୁଛି
କ୍ଷମତା ଦଖଲ ଦଳଟି ଚିହ୍ନା ପଡ଼ି ଯାଉଛି
ବହୁମତ ପ୍ରାପ୍ତ ଦଳ ଉଲ୍ଲସିତ ହେଉଛି
ସରକାର ଗଠନର ବିଗୁଲ ବଜାଇ ଦେଉଛି
ଦିନବ୍ୟାପୀ ଉତ୍କଣ୍ଠାର ଅବସାନ ଘଟୁଛି
ଟିଭି ଷ୍ଟୁଡ଼ିଓ କୋଳାହଳ ଆସ୍ତେ ଥମି ଯାଉଛି ।। ୪ ।।
