ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୧୬ ଡିସେମ୍ବର ୨୦୨୨
ଓଡ଼ିଶାର ପ୍ରମୁଖ ଗଣମାଧ୍ୟମ ବୋଲି ନିଜକୁ ଦାବୀ କରୁଥିବା ଓଡ଼ିଆ ନ୍ୟୁଜ୍ ଚ୍ୟାନେଲ୍ ଗୁଡ଼ିକ ଗତସପ୍ତାହରେ କେଉଁ ଖବରକୁ କିଭଳି ପରିବେଷଣ କରିଥିଲେ ଓ ଦର୍ଶକଙ୍କୁ କେଉଁ ଖବର ଦେଖିବାକୁ ବାଧ୍ୟ କରିଥିଲେ ତାଉପରେ ଟିକେ ନଜର ପକାଇବାକୁ ପଡ଼ିବ। ବ୍ରେକିଂ ଠାରୁ ଆରମ୍ଭ କରି ବିତର୍କ ଓ ମହାମଞ୍ଚ ପର୍ଯ୍ୟନ୍ତ । ପଦ୍ମପୁର ଉପନିର୍ବାଚନ ଫଳାଫଳ ବାହାରିବା ପରେ ନିଜ ଭିତରେ ଲଢ଼େଇ କରିଥିବା ଦୁଇ ନ୍ୟୁଜ୍ ଚ୍ୟାନେଲ୍ ଏବେ ଶାନ୍ତିପୂର୍ଣ୍ଣ ସହାବସ୍ଥାନ ନୀତିରେ ଖବର ପରିବେଷଣ କରୁଛନ୍ତି। ସମ୍ପାଦକଙ୍କ ଠାରୁ ଆରମ୍ଭ କରି ଏହି ଦୁଇଟି ନ୍ୟୁଜ୍ ଚ୍ୟାନେଲ୍ ର ସାମ୍ବାଦିକ ଓ ନ୍ୟୁଜ୍ ଆଙ୍କର ମାନଙ୍କୁଏବେ ମିଳିଯାଇଛି ଫୁରସତ । ଉପନିର୍ବାଚନ ସମୟରେ ମାଡ଼ଖାଇଥବା ସାମ୍ବାଦିକ ମାନେ ଏବେ ସୁସ୍ଥ ହୋଇଗଲେଣି । ପୁଣି ଫିଟ୍ ହୋଇ ଲଢ଼ିବା ପାଇଁ ସମ୍ପାଦକ ମାନେ ତାଙ୍କୁ ଲମ୍ବା ଛୁଟି ମଧ୍ୟ ଦେଇଥିବାର ଶୁଣିବାକୁ ମିଳୁଛି । ଟଙ୍କା ବଣ୍ଟା ଅଭିଯୋଗ ଆସିଥିବା ଚ୍ୟାନେଲ୍ ବିରୋଧରେ ନିର୍ବାଚନ ଅଧିକାରୀଙ୍କ ତଦନ୍ତର ଫଳାଫଳ ବି ବାହାରି ପାରୁନାହିଁ । ଏପରିକି ଅଭିଯୋଗ କରିଥିବା ଶାସକ ଦଳ ଓ ଏହାର ମୁଖପତ୍ର ଟିଭି ଚ୍ୟାନେଲ ମଧ୍ୟ ଏହି ଘଟଣାକୁ ଭୁଲିଗଲେଣି। ସେହିପରି ମାଡ଼ ଖାଇଥିବା ସାମ୍ବାଦିକ ମାନଙ୍କୁ ପୋଲିସ କ’ଣ ନ୍ୟାୟ ଦେଲା ଏନେଇ ନ୍ୟୁଜଚ୍ୟାନେଲ୍ ରେ ଖବର ମଧ୍ୟ ଦେଖିବାକୁ ମିଳୁନାହିଁ । ପଦ୍ମପୁର ଉପନିର୍ବାଚନ ପରେ ଏବେ ନ୍ୟୁଜ୍ ଚ୍ୟାନେଲ୍ ଗୁଡ଼ିକର ପ୍ରମୁଖ ଖବର ହେଉଛି “କଂଗ୍ରେସର ଭୋଟ ଡିଲ୍” ଅଭିଯୋଗ। ୩ ଜଣ କଂଗ୍ରସ ବିଧାୟକ ସୁରେଶ ରାଉତରାୟ, ମହମ୍ମଦ ମୋକିମ୍ ଓ ତାରା ପ୍ରସାଦ ବାହିନୀପତିଙ୍କ ମତାମତ ନେଇ ସମସ୍ତ ନ୍ୟୁଜ୍ ଚ୍ୟାନେଲ୍ ରେ ଚାଲିଛି ହୋ ହଲ୍ଲା । ସମସ୍ତଙ୍କର ଗୋଟିଏ ମୁଖ୍ୟ ଖବର “କଂଗ୍ରସ ଭୋଟ ବିକ୍ରି ହୋଇଯାଇଛି” ବୋଲି । ଯଦି କଂଗ୍ରେସ ଭୋଟ ବିକ୍ରିହୋଇ ଯାଇଛି, ତେବେ ଏହି ଭୋଟ କିଏ କିଣିଛି ଓ କିଏ ବିକିଛି ଏନେଇ କେହିବି କିଛି ତଥ୍ୟ ଉପସ୍ଥାପନ କରୁନାହାଁନ୍ତି କି ଅନୁସନ୍ଧାନ ମୂଳକ ଖବର ମଧ୍ୟ ପରିବେଷଣ କରିବାପାଇଁ ଇଚ୍ଛା ପ୍ରକାଶ କରୁନାହାନ୍ତି । ନେତାଙ୍କ ଭିତରେ ଡିଲ୍ ହୋଇଛି ବୋଲି ଖବର ଦେଖାଉଥିବା ବେଳେ ଡିଲ୍ କାହା କାହା ମଧ୍ୟରେ, କେତେବେଳେ, କେଉଁଠି ହେଲା ତାହାର ଖୁଲାସା କରିବାର ଅଛି କି ନାହିଁ, ଆପଣମାନେ ଭାବନ୍ତୁ ତ ? ବିଜେପି କାହିଁକି ହାରିଲା ଓ ବିଜେଡି କାହିଁକି ଜିତିଲା ତାହା ଉପରେ ନ୍ୟୁଜ୍ ଚ୍ୟାନେଲ୍ ଗୁଡ଼ିକରେ ବିଶ୍ଳେଷଣ ହେବା କଥା କି ନୁହେଁ ? କିନ୍ତୁ ହେଉଛି କ’ଣ ? ବିଜେଡିର ବିଜୟର କାରଣ ଓ ବିଜେପିର ପରାଜୟର ବିଶ୍ଳେଷଣ ନକରି କଂଗ୍ରେସ ଉପରେ ଚର୍ଚ୍ଚା କରି ଚାଲିଛନ୍ତି ଆମ ନ୍ୟୁଜ୍ ଚ୍ୟାନେଲ୍ ମାନେ ।
ଅନ୍ୟ ପକ୍ଷରେ ନାଗ- ଚାନ୍ଦ କାହାଣୀ ବି ଆଗକୁ ବଢ଼ି ପାରୁନାହିଁ ଆମ ନ୍ୟୁଜ୍ ଚ୍ୟାନେଲ୍ ଗୁଡ଼ିକରେ । ଇଡ଼ି ଘାଣ୍ଟିବ ….ଇଡ଼ି ଘାଣ୍ଟୁଛି … ବଡ଼ବଡ଼ ନେତାମାନେ ଏହି ମାମଲାରେ ଫସିବେ … ଇତ୍ୟାଦି କହି କହି ହାଲିଆ ହୋଇ ଗଲେଣି ସାମ୍ବାଦିକଙ୍କ ଠାରୁ ନ୍ୟୁଜ୍ ଆଙ୍କର ମାନଙ୍କ ପର୍ଯ୍ୟନ୍ତ। କାହିଁକି ନେତାମାନଙ୍କ ନାଁ ପଦାକୁ ଆସୁନାହିଁ, କୁଆଡ଼େ ଗଲେ ବଡ଼ ବଡ଼ିଆ, ନାଗ – ଚାନ୍ଦ ଦମ୍ପତ୍ତି ଚୁପ୍ ରହିବା ପଛର କାରଣ କ’ଣ, ଇଡ଼ି ବଡ଼ ବଡ଼ିଆଙ୍କୁ କାହିଁକି ଜେରା କରିବା ପାଇଁ ଡାକୁନାହିଁ ଏସବୁ ପ୍ରଶ୍ନର ଉତ୍ତର ଖୋଜି ପାଉନାହାନ୍ତି ଆମର ନ୍ୟୁଜ୍ ଚ୍ୟାନେଲ୍ ଗୁଡ଼ିକ ଓ ଏହାର ସାମ୍ବାଦିକ ମାନେ । ତେଣୁ ଖବରର ମରୁଡ଼ି ହୋଇଛି ଏହି ସପ୍ତାହରେ । ବିଗ୍ ବ୍ରେକିଙ୍ଗ୍, ବିତର୍କ ଓ ମହାମଞ୍ଚ ମଧ୍ୟ ଦର୍ଶକଙ୍କ ଆଦୃତି ଲାଭ କରିପାରୁନାହିଁ ବୋଲି ଏ ସପ୍ତାହର TRP ତଳମୁହାଁ ହୋଇଯାଇଛି ୭ଟି ନ୍ୟୁଜ୍ ଚ୍ୟାନେଲ୍ ର । ତେବେ ଗତ ସପ୍ତାହରେ ସର୍ବାଧିକ କ୍ଷତି ସହିଛନ୍ତି ବିଜେଡି ଓ ବିଜେପିର ୭୦:୩୦ ଓ ୫୦:୫୦ ପ୍ରତିଶତ ଶୈଳୀରେ ଖବର ପରିବେଷଣ କରୁଥିବା ଦୁଇ ନ୍ୟୁଜ୍ ଚ୍ୟାନେଲ୍ । ୭୦:୩୦ ଧାରାକୁ ଆପଣେଇ ଥିବା ନ୍ୟୁଜ୍ ଚ୍ୟାନେଲ୍ କନ୍ଧମାଳର ମେଡ଼ିକାଲ ଛାତ୍ର ଇଫୁ ମଲ୍ଲିକଙ୍କୁ ସରକାରଙ୍କ ସହାୟତା ଓ ନିଜ ମାଲିକଙ୍କ ସହଯୋଗ ଖବରକୁ ଅଧିକ ଗୁରୁତ୍ୱ ଦେଇ “ଆପଣଙ୍କର ବିଶ୍ୱସ୍ତ” ବୋଲି ନିଜକୁ ପ୍ରମାଣିତ କରିବାକୁ ଚେଷ୍ଟା କରିଥିବା ବେଳେ ୫୦:୫୦ ଧାରାରେ ବିଶ୍ୱାସ କରୁଥିବା ଅନ୍ୟତମ ନ୍ୟୁଜଚ୍ୟାନେଲ୍ ଟି ନିଜର ବାର୍ଷିକ ଉତ୍ସବ ପାଳନ ଅବସରରେ ବିଜେଡି ଓ ବିଜେପିର ଶୀର୍ଷନେତାଙ୍କୁ ଅତିଥି ଭାବରେ ନିମନ୍ତ୍ରଣ କରି ନିରପେକ୍ଷତାର ପରୀକ୍ଷା ଦେଇ ପାଶ୍ କରିଛି । ଏହି ଖବର ପରିବେଷଣ ଶୈଳୀ ଓ ନ୍ୟୁଜ୍ ଚ୍ୟାନେଲ୍ ଗୁଡ଼ିକର ଆଭିମୁଖ୍ୟ ଦେଖି ଦର୍ଶକ ମାନେ ସ୍ଥିର କରନ୍ତୁ ଯେ ଏହି ନ୍ୟୁଜ ଚ୍ୟାନେଲ ଗୁଡ଼ିକ “ଦର୍ଶକୀୟ ସ୍ୱୀକୃତି” ନା “ଆପଣଙ୍କର ବିଶ୍ୱସ୍ତ” କାହାକୁ ଗୁରୁତ୍ୱ ଦେଉଛନ୍ତି ।
