ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୮ ଅକ୍ଟୋବର ୨୦୨୨
ଭାରତର ସର୍ବୋଚ୍ଚ ଅଦାଲତ ସୁପ୍ରିମ କୋର୍ଟଙ୍କର ଏକ ଗୁରୁତ୍ୱପୂର୍ଣ୍ଣ ଟିପ୍ପଣୀ ଥିଲା ନ୍ୟୁଜ୍ ଚ୍ୟାନେଲ୍ ଓ ଏହାର ଆଙ୍କର ମାନଙ୍କୁ ନେଇ ଗତ ସେପ୍ଟେମ୍ବର ମାସରେ। ନ୍ୟୁଜ୍ ଚ୍ୟାନେଲ୍ ର ବିତର୍କ କାର୍ଯ୍ୟକ୍ରମ ପରିଚାଳନା କରୁଥିବା ଆଙ୍କର ମାନଙ୍କ ଉଦ୍ଦେଶ୍ୟରେ କଡ଼ା ଟିପ୍ପଣୀ ଦେଇଥିଲେ ସୁପ୍ରିମ କୋର୍ଟ । ବିଚାରପତି ଜଷ୍ଟିସ୍ କେ.ଏମ. ଯୋଶେଫ୍ ଙ୍କ ଖଣ୍ଡପୀଠ “ହେଟ୍ ସ୍ପିଚ” ମାମଲାର ଶୁଣାଣି କରି ନ୍ୟୁଜ୍ ଚ୍ୟାନେଲ୍ ର ଆଙ୍କର ମାନଙ୍କୁ ଏକ ପ୍ରକାର ଚେତାବନୀ ଦେଇଥିଲେ । “ହେଟ୍ ସ୍ପିଚ” ର ପ୍ରଚାର ଓ ପ୍ରସାର ରୋକିବାରେ ଆଙ୍କର ମାନଙ୍କ ଭୂମିକା ଗୁରୁତ୍ଵପୂର୍ଣ୍ଣ ବୋଲି ମଧ୍ୟ କହିଥିଲେ । ଏପରିକି ସମ୍ପୃକ୍ତ ରାଜ୍ୟସରକାର ମାନଙ୍କୁ ମଧ୍ୟ ନିରବ ଦର୍ଶକ ହୋଇ ବସିବା ଉଚିତ୍ ନୁହେଁ ବୋଲି ନିଜ ଟିପ୍ପଣୀ ରେ ଉଲ୍ଲେଖ କରିଥିଲେ । ସୁପ୍ରିମ କୋର୍ଟଙ୍କ ଏହି ଟିପ୍ପଣୀ ମଧ୍ୟ ଦେଶର ସମସ୍ତ ପ୍ରମୁଖ ଗଣମାଧ୍ୟମରେ ପ୍ରମୁଖ ଖବର ହିସାବରେ ସ୍ଥାନ ପାଇଥିଲା । ଠିକ୍ ମାସକ ପରେ ଓଡ଼ିଶାର ପ୍ରମୁଖ ନ୍ୟୁଜ୍ ଚ୍ୟାନେଲ୍ ଗୁଡ଼ିକ ସର୍ବୋଚ୍ଚ ଅଦାଲତଙ୍କ ଟିପ୍ପଣୀକୁ କିଭଳି ସମ୍ମାନ ଦେଇଛନ୍ତି ତାହା ଗତ ସୂର୍ଯ୍ୟପରାଗ ଦିନଠାରୁ ପ୍ରସାରିତ ହେଉଥିବା ଖବର ହିଁ ସ୍ପଷ୍ଟ କରୁଛି । ତଥା କଥିତ ୧ ନମ୍ବର ଓ ୨ ନମ୍ବର ଚ୍ୟାନେଲ୍ ର ପ୍ରମୁଖ ଖବର ଥିଲା “ହେତୁବାଦୀ ଖାଇଲେ ଚିକେନ ବିରିୟାନୀ”, “ପରାଗ ନୀତିକୁ ମାନୁ ନାହାନ୍ତି ହେତୁବାଦୀ”, “ସୂର୍ଯ୍ୟପରାଗ ରେ ଆମିଷ ଖାଇବା ଉଚିତ୍ କି “? ଠିକ୍ ୨୪ ଘଣ୍ଟା ପରେ ନ୍ୟୁଜ୍ ଚ୍ୟାନେଲ୍ ଗୁଡ଼ିକରେ ଖବରର ଶିରୋନାମା ବଦଳିଗଲା । “ହେତୁବାଦୀଙ୍କୁ ଧମକ ପୂର୍ଣ୍ଣ ଫୋନ୍ କଲ୍ ଓ ଥାନାରେ ଏତଲା” । ଠିକ୍ ପରେ ପରେ ଶଙ୍କରାଚାର୍ଯ୍ୟ ଓ ବାବା ବଳିଆଙ୍କୁ ନେଇ ହିନ୍ଦୁଧର୍ମ ର ବାଖ୍ୟା ଓ ହେତୁବାଦୀଙ୍କୁ “ଅଣହିନ୍ଦୁ” ଅବା “ହିନ୍ଦୁ ବିରୋଧୀ ମାନସିକତା” ବୋଲି ଦର୍ଶାଇବାକୁ ହେଳା କଲେ ନାହିଁ ନ୍ୟୁଜ୍ ଚ୍ୟାନେଲ୍ ର କିଛି ହାତ ଗଣତି ଆଙ୍କର । ପୁଣି ୨୪ ଘଣ୍ଟା ପରେ ନୂଆ ଶିରୋନାମା ଭିତ୍ତିକ ଖବର ଆସିଲା “ହେତୁବାଦୀଙ୍କୁ ଲିଗାଲ୍ ନୋଟିସ୍” । ୩ ଦିନର ଓଡ଼ିଆ ନ୍ୟୁଜ୍ ଚ୍ୟାନେଲ୍ ଗୁଡ଼ିକର ଏହି ଖବର ପରିବେଷଣର ଉଦ୍ଦେଶ୍ୟ କ’ଣ ଥିଲା ? ହେତୁବାଦୀ ମାନଙ୍କୁ ନ୍ୟୁଜ୍ ଚ୍ୟାନେଲ୍ ର ଆଙ୍କର ମାନେ କିଭଳି ଭାବେ ଚିତ୍ରଣ କଲେ ? ହେତୁବାଦୀ ମାନେ କ’ଣ ସତରେ ହିନ୍ଦୁ ବିରୋଧୀ ମାନସିକତାକୁ ସମର୍ଥନ କରନ୍ତି କି ? ହେତୁବାଦୀଙ୍କ ସହ ଶଙ୍କରାଚାର୍ଯ୍ୟ ଓ ବାବା ବଳିଆଙ୍କୁ ନିଜ କାର୍ଯ୍ୟକ୍ରମରେ ସାମିଲ କରି ନିର୍ଦ୍ଦିଷ୍ଟ ଏକ ଧର୍ମ ଓ ବିଶ୍ବାସ ବିରୋଧରେ ଆଙ୍କର ମାନେ ଯୁକ୍ତି ଉପସ୍ଥାପନ କଲେ କାହିଁକି ?
ଏବେ ଓଡ଼ିଆ ନ୍ୟୁଜ୍ ଚ୍ୟାନେଲ୍ ର ଦର୍ଶକ ମାନେ ଚିନ୍ତା କରନ୍ତୁ ରାଜ୍ୟର ତଥାକଥିତ ୧ ନମ୍ବର ଠାରୁ ଆରମ୍ଭ କରି ଶେଷ ସ୍ଥାନରେ ଥିବା ଚ୍ୟାନେଲ୍ ଗୁଡ଼ିକ କିଭଳି ଖବରକୁ ଗୁରୁତ୍ୱ ଦେଉଛନ୍ତି । ସୂର୍ଯ୍ୟପରାଗର ବିଜ୍ଞାନ ଆଧାରିତ ବାର୍ତ୍ତାକୁ ପହଞ୍ଚାଇବା ବଦଳରେ ଏମାନେ କେଉଁ ବାର୍ତ୍ତା ଦେବାକୁ ଚାହୁଁଛନ୍ତି ? ଲୋକଙ୍କୁ ସଚେତନ କରିବା ପରିବର୍ତ୍ତେ ଏମାନେ କରୁଛନ୍ତି କ’ଣ ? ଓଡ଼ିଶା ଭଳି ଏକ ଶାନ୍ତିପ୍ରିୟ ରାଜ୍ୟରେ ଲୋକଙ୍କ ମନରେ ଉଗ୍ର ଧର୍ମୀୟ ଭାବନା ଜାଗ୍ରତ କରିବା କାର୍ଯ୍ୟ ଏହି ଗଣମାଧ୍ୟମ ଗୁଡ଼ିକ କରୁନାହାନ୍ତି କି ? ଶଙ୍କରାଚାର୍ଯ୍ୟ, ବାବା ବଳିଆ ଓ ହେତୁବାଦୀ ମାନଙ୍କ ମଧ୍ୟରେ ଟିଭି ଷ୍ଟୁଡ଼ିଓରେ ମୁକାବିଲା କରାଇବାର ଉଦ୍ଦେଶ୍ୟ କ’ଣ ହୋଇଥାଇପାରେ ? ଖବର ପରିବେଷଣ ନାଁ ରେ ନିର୍ଦ୍ଦିଷ୍ଟ ଧର୍ମୀୟ ଭାବନାକୁ ଆଘାତ ପହଞ୍ଚାଇବା କ’ଣ ପ୍ରମୁଖ ଗଣମାଧ୍ୟମର ଦାୟିତ୍ୱବୋଧତା କୁ ସୂଚାଉଛି ?
ଟେଲିପ୍ରମ୍ପଟର ଦେଖି ଖବର ପଢ଼ୁଥିବା ଅବା ସମ୍ପାଦକଙ୍କ ଠାରୁ ଲେଖି ଆଣି ଷ୍ଟୁଡିଓରେ ପ୍ରଶ୍ନ ପଚାରୁଥିବା ଆଙ୍କର ମାନଙ୍କ ଭୂମିକା କ’ଣ ତାହା ସେମାନେ ଜାଣନ୍ତି ନାହିଁକି ? ସମ୍ପୃକ୍ତ ନ୍ୟୁଜ୍ ଚ୍ୟାନେଲ୍ ର ସଂପାଦକ ଓ ମାଲିକ ମାନେ କ’ଣ ଏହି ଖବର ପରିବେଷଣ ବିଷୟରେ କିଛି ଜାଣିନାହାଁନ୍ତି ? ଦେଶର ସର୍ବୋଚ୍ଚ ଅଦାଲତର ଟିପ୍ପଣୀ ପରେ ନ୍ୟୁଜ୍ ଚ୍ୟାନେଲ୍ ର ଆଙ୍କର ଓ ସମ୍ପାଦକ ମାନଙ୍କର ଏହା ଅଜ୍ଞତା ଅବା ସୁପ୍ରିମକୋର୍ଟଙ୍କ ନିର୍ଦ୍ଦେଶର ଅବମାନନା ବୋଲି ବୁଝାଯିବ ? TRP ଦୌଡ଼ରେ ଆଗରେ ଥିବା ଓଡ଼ିଶାର ନ୍ୟୁଜ୍ ଚ୍ୟାନେଲ୍ ଗୁଡ଼ିକର ଏଭଳି ଖବର ପ୍ରସାରଣ ପରେ ଯଦି କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହୁଏ, ତେବେ ଏହିପାଇଁ ଦାୟୀ ରହିବେ କିଏ ? ଆଙ୍କର, ସମ୍ପାଦକ ନା ନ୍ୟୁଜ୍ ଚ୍ୟାନେଲ୍ ର ମାଲିକ ? ସର୍ବୋପରି ୨୦୦୮ କନ୍ଧମାଳ ଦଙ୍ଗାରେ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏକ ବକ୍ତବ୍ୟ ଥିଲା “Each bone of my body is secular” , ଅର୍ଥାତ ଧର୍ମନିରପେକ୍ଷତାକୁ ଅତ୍ୟନ୍ତ ଗୁରୁତ୍ୱ ଦେଉଥିବା ଓଡ଼ିଶା ସରକାର ନିର୍ଦ୍ଦିଷ୍ଟ କିଛି ଗଣମାଧ୍ୟମର ଏହି ଖବର ପରିବେଷଣ ଉପରେ ରୋକ ଲଗାଇବେ ନା ସୁପ୍ରିମକୋର୍ଟଙ୍କ ଟିପ୍ପଣୀ ଭଳି ନିରବ ଦର୍ଶକ ସାଜିବେ ?
