ବ୍ୟୁରୋ ରିପୋର୍ଟ, ନିର୍ଭୀକ, ୦୫ ସେପ୍ଟେମ୍ବର ୨୦୨୨
ଓଡ଼ିଶା ବିଧାନ ସଭାର ପୂର୍ବତନ ବାଚସ୍ପତି, ଲୋକପ୍ରିୟ ନେତା ଓ ବାଗ୍ମୀ ସ୍ଵର୍ଗତଃ ଶରତ କରଙ୍କୁ ମନେ ପକାଇଛନ୍ତି ମାହାଙ୍ଗା ଜନସାଧାରଣ । ଅବିଭକ୍ତ କଟକ ଜିଲ୍ଲାର ଏହି ନେତାଙ୍କ ଆଜି ଅର୍ଥାତ୍ ସେପ୍ଟେମ୍ବର ୫ ତାରିଖ ହେଉଛି ୮୩ତମ ଜନ୍ମଦିନ । ବହୁ ସମୟ ଧରି ମାହାଙ୍ଗା ନିର୍ବାଚନ ମଣ୍ଡଳୀର ଲୋକପ୍ରତିନିଧି ଭାବେ ଦାୟିତ୍ୱ ତୁଲାଇଥିଲେ ଶରତ କର । ବିଧାନ ସଭାରୁ ସଂସଦ ଯାଏ ତାଙ୍କର ସ୍ମୃତି ଭୁଲିବାର ନୁହେଁ । ଆଜିର ଏହି ପବିତ୍ର ଦିନରେ ବହୁ ଶରତ ପ୍ରେମୀ ମାହାଙ୍ଗାବାସୀ ଏକାଠି ହେବା ସହ, ମାଳିହତା ଠାରେ ସ୍ଵର୍ଗତଃ କରଙ୍କ ରାଜନୈତିକ ଜୀବନ, ସାହିତ୍ୟ ଓ ସଂସ୍କୃତି ପ୍ରତି ଥିବା ପ୍ରତିବଦ୍ଧତାକୁ ନେଇ ସ୍ମୃତିଚାରଣ କରିଥିଲେ । ସ୍ୱର୍ଗତ କର ତାଙ୍କର ରାଜନୈତିକ ଜୀବନରେ ନିଜ ଅଞ୍ଚଳ ର ବିକାଶକୁ ପ୍ରାଧାନ୍ୟ ଦେବା ସହ ଓଡିଆ ଭାଷା, ସାହିତ୍ୟ ଓ ସଂସ୍କୃତିର ଉନ୍ନତି ପାଇଁ ଅନେକ କାର୍ଯ୍ୟ କରିଯାଇଛନ୍ତି । ଏପରିକି ବିଧାନ ସଭାରେ ବାଚସ୍ପତି ଦାୟିତ୍ୱ ବେଶ ସୁଚାର ରୂପେ ନିର୍ବାହ କରିବା ସହ ନିଜର ନିରପେକ୍ଷତା ଓ ଗଣତାନ୍ତ୍ରିକ ମୂଲ୍ୟବୋଧ ପ୍ରତି ସମ୍ମାନ ବୋଧ ତାଙ୍କୁ ଅନ୍ୟମାନଙ୍କର ମାର୍ଗଦର୍ଶକ ଭାବେ ସ୍ୱତନ୍ତ୍ର ପରିଚୟ ଦେଇଛି ।
ତେବେ ଆଜିର ଏହି ପବିତ୍ର ଦିନରେ ସ୍ବର୍ଗତ କର ଙ୍କ ମାହାଙ୍ଗା ପ୍ରତି ଅବଦାନକୁ ପର ପୀଢ଼ି ଭୁଲି ପାରିବ ନାହିଁ ବୋଲି ବହୁ ବିଶିଷ୍ଟ ବ୍ୟକ୍ତି ମତ ପ୍ରକାଶ କରିଛନ୍ତି । ଗଣକବିଙ୍କ ଜନ୍ମ ପୀଠରେ ବହୁ ଜନସାଧାରଣ ଏହି ଲୋକପ୍ରିୟ ଜନନେତାଙ୍କୁ ମନେ ପକାଇବା ସହ ମାହାଙ୍ଗା ବାସୀଙ୍କ ପ୍ରତି ଶରତଙ୍କ ଅବଦାନ ଭୁଲିବାର ନୁହେଁ ବୋଲି କହିଛନ୍ତି ।
