ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୮ ଜୁନ୍ ୨୦୨୩
ଧାନର କ୍ୱିଣ୍ଟାଲ ପିଛା ସର୍ବନିମ୍ନ ସହାୟକ ମୂଲ୍ୟ (ଏମ୍ ଏସ୍ ପି) ରେ ୧୪୩ ଟଙ୍କା ବୃଦ୍ଧି କରିଛନ୍ତି କେନ୍ଦ୍ର ସରକାର । ଫଳରେ ଧନରେ ଏମ୍ ଏସ୍ ପି ୨୦୪୦ ଟଙ୍କାକୁ ବୃଦ୍ଧି କରାଯାଇ ୨୧୮୩ ଟଙ୍କା ହୋଇଛି । ସେହିପରି ଏ-ଗ୍ରେଡ଼ ଧାନର ଏମ୍ ଏସ୍ ପି ୧୪୩ ଟଙ୍କା ବଢ଼ି ୨୨୦୩ ଟଙ୍କା ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ୍ ବୈଠକରେ ଏହି ଏମ୍ ଏସ୍ ପି ଦରକୁ ମଂଜୁରୀ ମିଳିଛି । ଧାନର ଏହି ସର୍ବନିମ୍ନ ସହାୟକ ଦରବୃଦ୍ଧି ଏବେ ଓଡ଼ିଶାରେ ଶାସନ କ୍ଷମତାରେ ଥିବା ବିଜେଡି ଓ ବିରୋଧୀ ବିଜେପିକୁ ମଧ୍ୟ ଅଡ଼ୁଆରେ ପକାଇଛି ।
ସ୍ୱାମୀନାଥନ କମିସନ ଅନୁସାରେ ଧାନପାଇଁ ୩୫୦୦ ଟଙ୍କା ଖର୍ଚ୍ଚ ହେଉଛି । ଏପରିକି ଓଡ଼ିଶା ବିଧାନସଭାରେ ସର୍ବଦଳୀୟ କମିଟି ମଧ୍ୟ ଏହି ସର୍ବନିମ୍ନ ସହାୟକ ମୂଲ୍ୟକୁ ୨୯୩୦ ଟଙ୍କା କରିବାକୁ ଦାବୀ କରିଆସୁଛି । ଧାନର ସର୍ବନିମ୍ନ ସହାୟକ ମୂଲ୍ୟ ପାଇଁ ଓଡ଼ିଶା ପକ୍ଷରୁ କରାଯାଉଥିବା ଦାବୀରେ ବିଜେଡି, ବିଜେପି ଓ କଂଗ୍ରେସର ସହମତି ରହିଛି । ଏବେ କେନ୍ଦ୍ରସରକାରଙ୍କର ଏହି ମୂଲ୍ୟ ବୃଦ୍ଧିକୁ ରାଜ୍ୟ ବିଜେପି ଓ ଶାସକ ବିଜେଡି କିଭଳି ଗ୍ରହଣ କରିବେ ତାହା ଉପରେ ସମସ୍ତଙ୍କ ନଜର ରହିଛି । ଆଗକୁ ସାଧାରଣ ନିର୍ବାଚନ ଆସୁଛି । ଏଣୁ ଧାନର ସର୍ବନିମ୍ନ ସାହାୟକ ମୂଲ୍ୟ ଏକ ପ୍ରମୁଖ ପ୍ରସଙ୍ଗ ହେବ ଚାଷୀଙ୍କ ଭୋଟକୁ ହାତେଇବା ପାଇଁ । ଏ ବାବଦରେ ବିଜେପି ବର୍ଦ୍ଧିତ ଦରକୁ ବିରୋଧ କରିପାରିବ ନାହିଁ, କାରଣ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ରାଜ୍ୟର ନେତା ବିରୋଧ କରିପାରିବେ ନାହିଁ । ଅନ୍ୟ ପକ୍ଷରେ ଶାସକ ବିଜେଡି ଏହି ପ୍ରସଙ୍ଗରେ ଏବେ ମାପି ଚୁପି ପାଟି ଖୋଲିବ । କାରଣ ମୋଦୀ ସରକାରଙ୍କ ନିଷ୍ପତ୍ତିକୁ ବିରୋଧ କରିବା କ୍ଷମତା ବର୍ତ୍ତମାନ ବିଜେଡିର ନାହିଁ । ମାତ୍ର ନିରବ ରହିଲେ ସମସ୍ତ ଚାଷୀଙ୍କ ଭୋଟ ହାତେଇବାରେ ମଧ୍ୟ ବିଜେଡିକୁ ଅସୁବିଧା ହୋଇପାରେ ।ଅନ୍ୟତମ ରାଜନୈତିକ ଦଳ ଭାବେ ରାଜ୍ୟ କଂଗ୍ରେସ ଏହାକୁ ଏକ ପ୍ରମୁଖ ପ୍ରସଙ୍ଗ କରିବ, ଏଥିରେ ସନ୍ଦେହ ନାହିଁ ।
ଏପରିକି ରାଜ୍ୟ ଚାଷୀ ସଂଗଠନ ଗୁଡ଼ିକ ମଧ୍ୟ ଧାନର ସର୍ବନିମ୍ନ ସହାୟକ ମୂଲ୍ୟ ନେଇ ଦୀର୍ଘ ଦିନ ଧରି ଆନ୍ଦୋଳନ କରିଆସୁଛନ୍ତି । ସେମାନେ ପୁଣି ଏହାକୁ କେନ୍ଦ୍ର ସରକାରଙ୍କର ଚାଷୀଙ୍କ ପ୍ରତି ଅବହେଳା ଭାବେ ଦର୍ଶାଇବା ସହ ଚାଷୀଙ୍କୁ ଏହି ନିଷ୍ପତ୍ତି ବିରୋଧରେ ଯିବାପାଇଁ ପ୍ରବର୍ତ୍ତାଇବେ ।
ପୂର୍ବରୁ ବିଜେପି ମଧ୍ୟ ପ୍ରତିଶୃତି ଦେଇଥିଲା ଯେ, ସ୍ୱାମୀନାଥନ କମିଟି ରିପୋର୍ଟକୁ ଲାଗୁ କରିବ ବୋଲି, ମାତ୍ର ବାରମ୍ବାର ସର୍ବନିମ୍ନ ସହାୟକ ମୂଲ୍ୟ ବଢ଼ୁଥିବା ବେଳେ ସ୍ୱାମୀନାଥନ କମିଟି ରିପୋର୍ଟକୁ ଅଣଦେଖା କରିଚାଲିଛି । ବିଜେପି ବିରୋଧରେ ଚାଷୀଙ୍କୁ ଏକଜୁଟ କରିବା ପାଇଁ ବିଜେଡି ଓ କଂଗ୍ରେସ ଚେଷ୍ଟା କରିବା କଥା । ଏପରିକି ଚାଷୀ ସଂଗଠନ ଗୁଡ଼ିକୁ ମଧ୍ୟ ନିଜ ସପକ୍ଷର ନେବାକୁ ଦୁଇଦଳ ଚେଷ୍ଟା କରି ପାରନ୍ତି ।
ତେବେ ଚାଷୀ ବହୁଳ ଅଞ୍ଚଳ ବିଶେଷକରି ପଶ୍ଚିମ ଓଡ଼ିଶାର ଚାଷୀଙ୍କ ଭୋଟକୁ ନିଜ ସପକ୍ଷରେ ନେବାପାଇଁ ବୋଧହୁଏ ଶାସକ ବିଜେଡି ଓ କଂଗ୍ରେସ ଧାନର ସର୍ବନିମ୍ନ ସହାୟକ ମୂଲ୍ୟ ପ୍ରସଙ୍ଗକୁ ଏକ ନିର୍ବାଚନୀ ପ୍ରସଙ୍ଗ କରି ପାରନ୍ତି । ଏବେ ନହେଲେ ବି ବିଳମ୍ବରେ ମଧ୍ୟ ଶାସକ ବିଜେଡି ଚାଷୀ ସଂଗଠନ ଦ୍ୱାରା ମଧ୍ୟ ପଶ୍ଚିମ ଓଡ଼ିଶାରେ ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ପ୍ରସଙ୍ଗରେ କେନ୍ଦ୍ରସରକାଙ୍କ ତୃଟିପୂର୍ଣ୍ଣ ନିଷ୍ପତ୍ତି ବାବଦରେ ସ୍ୱର ଉତ୍ତୋଳନ କରିପାରେ । ଯଦି ବିଜେଡି, କଂଗ୍ରେସ ଓ ଚାଷୀ ସଂଗଠନ ମାନେ ଭିନ୍ନ ଭିନ୍ନ ଭାବେ ଧାନର ସର୍ବନିମ୍ନ ସହାୟକ ମୂଲ୍ୟ ନେଇ ଆନ୍ଦୋଳନ କରନ୍ତି ତେବେ ବିଜେପି ବିରୋଧରେ ପଶ୍ଚିମ ଓଡ଼ିଶାରେ ଏହା ଏକ ନିର୍ବାଚନୀ ପ୍ରସଙ୍ଗ ଭାବେ ଚାଷୀ ମାନଙ୍କୁ ପ୍ରଭାବିତ କରିବ ।
