ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୦ ଜୁନ୍ ୨୦୨୩
ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ଅଧକ୍ଷ ଜେ. ପି. ନଡ୍ଡା ଓଡ଼ିଶା ଗସ୍ତରେ ଆସୁଛନ୍ତି । କଳାହାଣ୍ଡି ଠାରେ ମହାଜନସମ୍ପର୍କ ସମାବେଶରେ ସାମିଲ ହେବେ ବୋଲି ବିଜେପି ପକ୍ଷରୁ ସୂଚନା ଦିଆଯାଇଛି । ନଡ୍ଡାଙ୍କ ଗସ୍ତ ପୂର୍ବରୁ ରାଜ୍ୟ ପ୍ରଭାରୀ ଡି ପୂରନ୍ଦେଶ୍ୱରୀ କଳାହାଣ୍ଡି ଗସ୍ତ କରି ଦଳୀୟ କର୍ମୀ ଓ ନେତାମାନଙ୍କ ସହ ଆଲୋଚନା କରିଛନ୍ତି । ରାଜ୍ୟ ବିଜେପି ନେତାଙ୍କ ସୂଚନା ଅନୁଯାୟୀ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ମୋଦୀ ସରକାରଙ୍କର ୯ ବର୍ଷର ସଫଳତା ବାବଦରେ କଳାହାଣ୍ଡି ଜନସାଧାରଣଙ୍କୁ ସମ୍ବୋଧିତ କରିବେ। ଏହାସହିତ ୨୦୨୪ ସାଧାରଣ ନିର୍ବାଚନ ବାବଦରେ ମଧ୍ୟ ଦଳୀୟ ନେତାଙ୍କ ସହ ବୈଠକ କରିବାର କାର୍ଯ୍ୟକ୍ରମ ରହିଛି । ବିଜେପି ରାଜ୍ୟ ସଭାପତିଙ୍କ ସହ ଦଳର ବହୁ ନେତା ଏହି କାର୍ଯ୍ୟକ୍ରମରେ ସାମିଲ ହେବେ ।
ତେବେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଉଛି, ବିଜେପିର ରାଷ୍ଟ୍ରୀୟ ସଭାପତିଙ୍କ ଓଡ଼ିଶା ଗସ୍ତର ଆଭିମୁଖ୍ୟ କ’ଣ ହେବ ? କେବଳ ମୋଦୀ ସରକାରଙ୍କ ସଫଳତା ବଖାଣିବା ଏକ ମାତ୍ର ଉଦ୍ଦେଶ୍ୟ ହେବ କି ? ଓଡ଼ିଶାରେ ଆଗାମୀ ନିର୍ବାଚନରେ ବିଜେପିର ଆଭିମୁଖ୍ୟ ବିଜେଡି ପ୍ରତି କ’ଣ ରହିବ ସେନେଇ ନଡ୍ଡା କିଛି ସଂକେତ ଦେବେ କି ?
ତେବେ ଦଳୀୟ କର୍ମୀ ମହଲରେ ଏନେଇ ପ୍ରଶ୍ନ ଉଠିବା ସ୍ୱାଭାବିକ । ରାଜ୍ୟରେ ବିଜେଡିର ଲୋକପ୍ରିୟତା ବିରୋଧରେ ବିଜେପି ନିର୍ବାଚନ ଲଢ଼ି ବାରମ୍ବାର ପରାସ୍ତ ହୋଇଛି। ମହାଜନସମ୍ପର୍କ ସମାବେଶରେ ବିଜେପିରୁ ବହୁ କେନ୍ଦ୍ରୀୟ ନେତା ଯୋଗ ଦେବା କାର୍ଯ୍ୟକ୍ରମ ରହିଥିବା ବେଳେ ଏପର୍ଯ୍ୟନ୍ତ ଓଡ଼ିଶା ଗସ୍ତରେ କେହି ଆସିନାହାନ୍ତି । ପୂର୍ବରୁ ଗୃହ ମନ୍ତ୍ରୀ ଅମିତ ଶାହଙ୍କର କାର୍ଯ୍ୟକ୍ରମ ମଧ୍ୟ ଦୁଇ ଦୁଇ ଥର ବାତିଲ ହୋଇଯାଇଛି । ଏଣୁ ରାଷ୍ଟ୍ରୀୟ ଅଧ୍ୟକ୍ଷଙ୍କ ଏହି ଗସ୍ତ ରାଜନୈତିକ ଦୃଷ୍ଟିରୁ ବିଜେପି ପାଇଁ ବେଶ୍ ଗୁରୁତ୍ୱପୂର୍ଣ୍ଣ । ମାତ୍ର ନଡ୍ଡା କେବଳ କେନ୍ଦ୍ର ସରକାରଙ୍କର ପ୍ରଚାର କରିବାକୁ ଆସୁଥିଲେ ଏହା ରାଜ୍ୟ ବିଜେପିକୁ ବିଶେଷ ସହାୟକ ହୋଇ ନପାରେ । ୨୦୧୯ ପର ଠାରୁ ବିଜେପିର କେନ୍ଦ୍ରୀୟ ନେତୃତ୍ୱର ସ୍ୱର ଓଡ଼ିଶାର ବିଜେଡି ସରକାର ବିରୋଧରେ ଏକ ପ୍ରକାର ନିରବ ହୋଇଯାଇଛି । ରାଜ୍ୟ ବିଜେପି ନେତାମାନେ ମଧ୍ୟ ଆଗାମୀ ରଣନୀତି କ’ଣ ହେବ ତାହା ବୁଝିପାରୁ ନାହାଁନ୍ତି । ରାଜ୍ୟ ସଭାପତି ବଦଳିବା ପରେ ରାଜ୍ୟ ବିଜେପିର ସଙ୍ଗଠନରେ ମଧ୍ୟ ନବକଳେବର ଏଯାଏଁ ହୋଇପାରିନାହିଁ । ନୂଆକରି ସଭାପତି ହୋଇଥିବା ମନମୋହନ ସାମଲ ନିଜର ଟିମ୍ ମଧ୍ୟ ଘୋଷଣା କରିବାରେ ସମର୍ଥ ହୋଇ ନାହାଁନ୍ତି । ଏହା ଦଳ ଭିତରର ଦୁର୍ବଳତାକୁ ସ୍ପଷ୍ଟ କରୁଥିବା ବେଳେ ଓଡ଼ିଶାରେ ବିଜେପିର ଆଭିମୁଖ୍ୟ ନେଇ ରାଜ୍ୟ ନେତାମାନେ ଏବେ ଦ୍ବନ୍ଦରେ । ଏଣୁ ରାଷ୍ଟ୍ରୀୟ ସଭାପତିଙ୍କ ଗସ୍ତ ହୁଏତ ଏନେଇ କିଛି ସଂକେତ ଦେଇପାରେ ବୋଲି ରାଜ୍ୟ ବିଜେପି ଭିତରେ ଆଲୋଚନା ହେଇଛି ।
ଯଦି ରାଷ୍ଟ୍ରୀୟ ଅଧକ୍ଷ ଜେପି ନଡ୍ଡା କେବଳ ସରକାରଙ୍କ ପ୍ରଚାର ସାରି ଫେରି ଯାଆନ୍ତି ତେବେ ରାଜ୍ୟ ବିଜେପିର ନେତା ଓ କର୍ମୀ ମାନଙ୍କ ଭିତରେ ଦ୍ଵନ୍ଦ ଆହୁରି ବଢ଼ିଯିବ । ଆଗାମୀ ନିର୍ବାଚନ ପୂର୍ବରୁ ନଡ୍ଡାଙ୍କ ଗସ୍ତ ଓ କଳାହାଣ୍ଡି କାର୍ଯ୍ୟକ୍ରମରେ ସେ କ’ଣ ସମ୍ବୋଧନ କରିବେ ତାହା ଉପରେ ଏବେ ସମସ୍ତଙ୍କର ନଜର । କାରଣ ନଡ୍ଡାଙ୍କ ଆଭିମୁଖ୍ୟ ସ୍ପଷ୍ଟ କରିବ ଯେ, ବିଜେପି ଓଡ଼ିଶାରୁ ଅଧିକ ଲୋକସଭା ଆସନ ଜିତିବାକୁ ଚାହିଁବ ନା ବିଧାନସଭା ଆସନ ଉପରେ ମଧ୍ୟ ଦଳ ଫୋକସ୍ କରିବ ।
