ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୯ ମାର୍ଚ୍ଚ ୨୦୨୩
ବିଜେଡିର ସ୍ଲୋଗାନ ବଜାରରେ ଏବେ ଯୋଡ଼ି ହୋଇଛି “ଜୟ ଜଗନ୍ନାଥ” । ବିଜେଡିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏହି ସ୍ଲୋଗାନ ଲଞ୍ଚ କରିବା ପରେ ଦଳର ବହୁ ନେତା ଓ କର୍ମୀ ଏବେ ନିଜ ନିଜର ସୋସିଆଲ ମିଡ଼ିଆରେ ପୋଷ୍ଟ କରିଛନ୍ତି । “ଶଙ୍ଖ ମୋର ଗର୍ବ” ସ୍ଲୋଗାନକୁ ସୋସିଆଲ ମିଡ଼ିଆରେ ଭାଇରାଲ କରିବାପରେ ଏବେ “ଜୟ ଜଗନ୍ନାଥ” ସ୍ଲୋଗାନ ଆରମ୍ଭ କରି ବିଜେଡି ଦୁଇଟି ବାର୍ତ୍ତା ଦେଇଛି । ଜାତି ଓ ଧର୍ମ ରାଜନୀତିରେ ବିଜେପିକୁ ମଧ୍ୟ ପଛରେ ପକାଇଦେଇଛି ବିଜେଡି । ପ୍ରଥମେ ଓବିସି ଜନଗଣନା ନେଇ ବିଜେଡିର ଉଦ୍ୟମ ଆଉ ଏବେ ଓଡ଼ିଶାର ଆରାଧ୍ୟ ଦେବତାଙ୍କୁ ଅସ୍ତ୍ର କରି ଲୋକଙ୍କ ମନରେ ଧାର୍ମିକ ଭାବନା ଜାଗ୍ରତ କରିବା ଭଳି ଉଦ୍ୟମ ଆରମ୍ଭ କରିଛି ବୋଲି ରାଜନୈତିକ ପର୍ଯ୍ୟବେକ୍ଷକ ମହଲରେ ଚର୍ଚ୍ଚା ।
ଭାରତୀୟ ଜନତା ପାର୍ଟି ନେତାଙ୍କ ଆକ୍ରମଣାତ୍ମକ ଆଭିମୁଖ୍ୟ ଓ ସରକାର ବିରୋଧୀ ହାୱାକୁ ପ୍ରଶମିତ କରିବା ପାଇଁ ବିଜେଡି ପାଖରେ ଜାତି ଓ ଧର୍ମକୁ ନେଇ ରାଜନୀତି କରିବା ବ୍ୟତୀତ ବିକଳ୍ପ କିଛି ନଥାଇପାରେ ବୋଲି ବିଶ୍ୱାସ କରାଯାଉଛି । ଏପରିକି ୨୦୨୪ ସାଧାରଣ ନିର୍ବାଚନ ପୂର୍ବରୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ସାରିବା ସହ ରାଜ୍ୟର ଅନେକ ଧାର୍ମିକ ମଠ ଓ ମନ୍ଦିର ଗୁଡ଼ିକର ଉନ୍ନତିକରଣ କାର୍ଯ୍ୟକୁ ମଧ୍ୟ ଚୂଡ଼ାନ୍ତ ରୂପ ଦିଆଯାଇପାରେ । ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ବିଭିନ୍ନ ମନ୍ଦିର ଗସ୍ତକାର୍ଯ୍ୟକ୍ରମ ଓ ଉନ୍ନତିକରଣ କାର୍ଯ୍ୟର ସମୀକ୍ଷା ଯଥେଷ୍ଟ ସଂକେତ ଦେଇ ସାରିଛି । ଏହା ସହିତ ଗୋଶାଳା ଗୁଡ଼ିକ ପ୍ରତି ରାଜ୍ୟ ସରକାରଙ୍କର ବଦଳିଥିବା ମନୋଭାବ ମଧ୍ୟ ଏହାର ଆଉ ଏକ ଉଦାହରଣ ।
ଜନଜାତି ବର୍ଗକୁ ପ୍ରଧାନ୍ୟ ଦେବାକୁ ଯାଇ ଓଡ଼ିଶାରୁ ବିଜେପି ରାଷ୍ଟ୍ରପତି ପ୍ରାର୍ଥୀ ବାଛିବା ପରଠାରୁ ବିଜେଡି ବିଚଳିତ ହୋଇପଡ଼ିଥିଲା । ଏପରିକି ରାଷ୍ଟ୍ରପତି ପ୍ରାର୍ଥୀ ଚୟନ ପଛରେ ବିଜେଡି ସଭାପତିଙ୍କ ଭୂମିକା ଥିବା କଥା ମଧ୍ୟ ଦଳର ନେତା ମାନେ ପ୍ରଚାର କରିବା ଆରମ୍ଭ କରିଦେଇଥିଲେ । ମାତ୍ର ବିଜେଡିର ଏହି ମିଛ ଧରାପଡ଼ିବା ପରେ ଦଳର ଆଦିବାସୀ ଭୋଟ ବ୍ୟାଙ୍କ ପ୍ରଭାବିତ ହୋଇଥିବା କଥା ଦଳ ଜାଣିପାରିଛି । ଏଣୁ ଓଡ଼ିଶାର ସଂଖ୍ୟାଧିକ ପଛୁଆ ବର୍ଗର ଲୋକ ଥିବାରୁ ଏହାକୁ ନିଜର ପ୍ରମୁଖ ଅସ୍ତ୍ର ଭାବେ ବିଜେଡି ବ୍ୟବହାର କରିବା ଆରମ୍ଭ କରିଦେଇଛି । ଯେଉଁଥିପାଇଁ ଓବିସି ଜନଗଣନା ନେଇ କେନ୍ଦ୍ର ସରକାରଙ୍କ ଉପରେ ଚାପ ପକାଇବା ସହ ଏନେଇ ରାଜ୍ୟ ସ୍ତରରେ ମଧ୍ୟ ପ୍ରସ୍ତୁତି ଆରମ୍ଭ କରିଦେଇଛି ବିଜେଡି । ଜନଗଣନା କାର୍ଯ୍ୟ ଶେଷ ହେଉ ଅବା ନହେଉ ମାତ୍ର ନିର୍ବାଚନ ପୂର୍ବରୁ ପଛୁଆ ବର୍ଗ ଭୋଟ ହାତେଇବା ପାଇଁ ବିଜେଡି ଆହୁରି କିଛି ଯୋଜନା ମଧ୍ୟ ଘୋଷଣା କରିପାରେ ଓବିସି ମାନଙ୍କ ପାଇଁ ।
ସେହିପରି ଉପକୂଳ ଓ ପଶ୍ଚିମ ଓଡ଼ିଶାର ବହୁ ମନ୍ଦିର ଓ ଧର୍ମାନୁଷ୍ଠାନର ଉନ୍ନତି କରଣ କାର୍ଯ୍ୟକୁ ମଧ୍ୟ ଶେଷ କରି ଲୋକଙ୍କ ଆସ୍ଥା ଓ ବିଶ୍ୱାସ ଜିତିବାକୁ ବିଜେଡି ପ୍ରସ୍ତୁତ କରିଛି ନିଜର ବ୍ଲୁପ୍ରିଣ୍ଟ । ପ୍ରଶାସନିକ ସ୍ତରରେ ମଧ୍ୟ ଏହି କାର୍ଯ୍ୟଗୁଡ଼ିକୁ ଶେଷ କରିବାକୁ ଜୋରଦାର ଉଦ୍ୟମ ଚାଲିଛି ।
ସେହିପରି ପୂର୍ବରୁ ଓଡ଼ିଶାର ପରିଚୟ ନବୀନ ପଟ୍ଟନାୟକ ବୋଲି କହୁଥିବା ବିଜେଡି ନେତୃତ୍ୱ ଏବେ ନିଜ ଭୁଲ ବୁଝିବା ଆରମ୍ଭ କରି ତ୍ରୁଟି ସମାଧାନ କରିଛି । କିଛି ଦିନ ପୂର୍ବରୁ “ଶଙ୍ଖ ମୋର ଗର୍ବ” କ୍ୟାମ୍ପେନ ରେ ମଧ୍ୟ ବିଜେଡିକୁ ବିଭିନ୍ନ ବର୍ଗରୁ ବେଶ ସମାଲୋଚନା ଶୁଣିବାକୁ ମିଳିଥିଲା । ବିଜୁ ବାବୁଙ୍କ ଛାଡ଼ି “ନବୀନ ଓଡ଼ିଶା” ର ସ୍ଲୋଗାନ ମଧ୍ୟ ସାଧାରଣ ଲୋକଙ୍କ ଦ୍ୱାରା ଗ୍ରହଣୀୟ ହୋଇପାରିନଥିବା ଭଳି ଅନୁଭବ କରୁଛି ଦଳ । ଏଣୁ ବାଧ୍ୟ ହୋଇ ବିଜେଡି ଏବେ ପୁଣି ଏକ ନୂଆ ସ୍ଲୋଗାନ ର ତଲାସରେ ଥିବା ବେଳେ ବିରୋଧୀ ବିଜେପି ଯେଭଳି ଜାତି ଓ ଧର୍ମକୁ ଆଧାର କରି ଓଡିଶା ରାଜନୀତିରେ ସଫଳ ନହେବ, ସେନେଇ ଶେଷରେ ଓଡ଼ିଆ ମାନଙ୍କ ଆରାଧ୍ୟ ଦେବତା ତଥା ପ୍ରତି ଓଡ଼ିଆର ଭାବାବେଗକୁ ପ୍ରଭାବିତ କରୁଥିବା ମହାପ୍ରଭୁ ଶ୍ରୀ ଜଗନ୍ନାଥ ଙ୍କ ନାଁ କୁ ପ୍ରଚାରରେ ବ୍ୟବହାର କରିବାର କୌଶଳକୁ ଆପଣାଇଛି । ଓଡ଼ିଶାରେ ବିଜେପିର ଜାତି ଓ ଧର୍ମ ରାଜନୀତି ସଫଳ ହୋଇନଥିବା ବେଳେ ବିଜେଡି ର ଏହି ରାଜନୀତି ସଫଳ ହେବକି ? ଜୟ ଜଗନ୍ନାଥ ସ୍ଲୋଗାନ ମାଧ୍ୟମରେ ସରକାର ବିରୋଧୀ ହାୱାକୁ ବିଜେଡି ବଦଳାଇ ପାରିବ ତ ? ପୂର୍ବରୁ ଧର୍ମ ନିରପେକ୍ଷତା କଥା କହି ବିଜେପି ସହ ମେଣ୍ଟ ଭାଙ୍ଗିଥିବା ନବୀନ ପଟ୍ଟନାୟକଙ୍କ ଏହି ରଣନୀତି ବିଜେଡି ପାଇଁ ବୁମେରାଂ ହେବ ନାହିଁ ତ ?
