ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୧୨ ଜୁନ୍ ୨୦୨୩
ଓଡ଼ିଶାରେ ଏବେ ବିଦ୍ୟୁତ କାଟକୁ ନେଇ ସରକାର ଓ ବିତରଣ ଦାୟିତ୍ୱରେ ଥିବା ଟାଟା ପାୱାର ମଧ୍ୟରେ ବିବାଦ ଉପୁଜିଛି । କିଛି ଦିନ ପୂର୍ବରୁ ରାଜଧାନୀ ଭୁବନେଶ୍ୱରରେ କାଳବୈଶାଖୀ ଯୋଗୁଁ ବହୁ ସମୟ ଧରି ବିଦ୍ୟୁତ ସରବରାହ ବାଧାପ୍ରାପ୍ତ ହୋଇଥିଲା । ଏପରିକି ଖୋଦ ରାଜଧାନୀରେ ମଧ୍ୟ ବହୁ ସ୍ଥାନରେ ଘଣ୍ଟାଘଣ୍ଟା ଧରି ବିଦ୍ୟୁତ ପୁନଃ ସଂଯୋଗ ହୋଇ ପାରିନଥିଲା । ଏନେଇ ଲୋକମାନେ ତୀବ୍ର ଅସନ୍ତୋଷ ବ୍ୟକ୍ତ କରିଥିଲେ ସୋସିଆଲ ମିଡ଼ିଆରେ । ଯାହାକୁ ଦେଖିବା ପରେ ରାଜ୍ୟର ମୁଖ୍ୟ ଶାସନ ସଚିବ ମଧ୍ୟ ଟାଟା ପାୱାରର ବିତରଣ ଓ ସଂଯୋଗ ବ୍ୟବସ୍ଥା ନେଇ ବେଶ୍ ସମାଲୋଚନା କରିଥିଲେ ।
ସୋସିଆଲ ମିଡ଼ିଆରେ ବିଜୁଳି ବିଭ୍ରାଟକୁ ନେଇ ଆରମ୍ଭ ହୋଇଗଲା ଜୋରଦାର ଲଢ଼େଇ । ମୁଖ୍ୟ ଶାସନ ସଚିବଙ୍କ କଥାକୁ ସମର୍ଥନ କରିବାକୁ ଆଗେଇ ଆସିଲେ ବିଜେଡିର ସାଂସଦ ଅମର ପଟ୍ଟନାୟକ । ସେ ମଧ୍ୟ ଟ୍ୱିଟ୍ କରି ନିଜର ଅସନ୍ତୋଷ ଝାଡ଼ିଲେ ଟାଟା ପାୱାର ଉପରେ । ଏପରିକି କେବଳ ରାଜଧାନୀ ନୁହେଁ ସାରା ଓଡ଼ିଶାରେ ଏବେ ବିଦ୍ୟୁତ ବିଭ୍ରାଟକୁ ନେଇ ସାଧାରଣ ଲୋକଙ୍କ ଭିତରେ ଅସନ୍ତୋଷ ଜାରି ରହିଛି । ପରିସ୍ଥିତି ଏପରି ହେଲା ଯେ “ପାୱାର କଟ୍” ହେଉନାହିଁ ବୋଲି ଗଣମାଧ୍ୟମ ଆଗରେ ବାରମ୍ବାର ସଫେଇ ଦେଉଥିବା ଶକ୍ତିମନ୍ତ୍ରୀ ପ୍ରତାପ କେଶରୀ ଦେବ ମଧ୍ୟ ଶେଷରେ ମାନିଗଲେ ଯେ, ଆମ ରାଜ୍ୟରେ ବିଦ୍ୟୁତ ଯୋଗାଣ ଭିତ୍ତିଭୂମି ସୁଦୃଢ଼ ନାହିଁ ବୋଲି । ଶକ୍ତିମନ୍ତ୍ରୀଙ୍କ ଏଭଳି ବକ୍ତବ୍ୟ ପରେ ବିରୋଧୀ ବିଜେପି ଓ କଂଗ୍ରେସ ପକ୍ଷରୁ ଦାବୀ କରାଗଲା ଯେ, ବିଦ୍ୟୁତ ବଣ୍ଟନ ପ୍ରକ୍ରିୟାକୁ ତୃଟି ଶୁନ୍ୟ କରିବାକୁ ବିଦ୍ୟୁତ କ୍ଷେତ୍ରରେ ସଂସ୍କାର ଆଣିଥିବା ଦାବୀ କରୁଥିବା ସରକାର ଉତ୍ତର ଦିଅନ୍ତୁ କାହିଁକି ବିଦ୍ୟୁତ ଯୋଗାଣ ପାଇଁ ଭିତ୍ତିଭୂମି ସୁଦୃଢ଼ ହୋଇପାରିନାହିଁ ? ବିଦ୍ୟୁତ ଭିତ୍ତିଭୂମି ନିର୍ମାଣ ପାଇଁ ବ୍ୟୟ ବରାଦ ହୋଇଥିବା ଅର୍ଥ କୁଆଡ଼େ ଗଲା ? ଏହା ଠିକ ଭାବେ ବିନିଯୋଗ ଯଦି ହୋଇନି ତାର ହିସାବ ରାଜ୍ୟବାସୀଙ୍କ ନିକଟରେ ସରକାର ରଖିବେ ତ ?
ତେବେ ବିରୋଧୀଙ୍କ ଏହି ପ୍ରଶ୍ନର ଉତ୍ତର ଦେବା ପରିବର୍ତ୍ତେ ରାଜ୍ୟସରକାର ଓ ପ୍ରଶାସନ ପକ୍ଷରୁ ଏନେଇ ଟାଟା ପାୱାରକୁ ଦୋଷ ଦିଆ ଚାଲିଛି । ମୁଖ୍ୟ ଶାସନ ସଚିବ, ବିଜେଡି ସାଂସଦ ଓ ଶକ୍ତି ମନ୍ତ୍ରୀଙ୍କ ସ୍ୱୀକାରୋକ୍ତି ବିଦ୍ୟୁତ ଉପଭୋକ୍ତା ମାନଙ୍କୁ ଦ୍ବନ୍ଦରେ ପକାଇଦେଇଛି । ସମସ୍ତେ ଏବେ ଭାବିବାକୁ ବାଧ୍ୟ ହୋଇଛନ୍ତି ଯେ, ବିଦ୍ୟୁତ ବିଭ୍ରାଟ ପାଇଁ ଦାୟୀ କିଏ ? ରାଜ୍ୟସରକାର ନା ଟାଟା ପାୱାର ? ତେବେ ରାଜ୍ୟର ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିବା ବୈଠକ ପରେ ନିର୍ଦ୍ଦେଶ ଦିଆଯାଇଛି ଯେ, ସାମାଜିକ ଗଣମାଧ୍ୟମରେ ଆସୁଥିବା ସାଧାରଣ ଲୋକଙ୍କ ଅଭିଯୋଗକୁ ସମାଧାନ କରାଯାଉ । ବିଦ୍ୟୁତ କଟା ସମସ୍ୟାକୁ ଦୂର କରିବା ଓ ତତକାଳ ପଦକ୍ଷେପ ନେବାକୁ ମୁଖ୍ୟ ଶାସନ ସଚିବ ଶକ୍ତିବିଭାଗ ଓ ବିତରଣ କଂପାନୀକୁ କହିଛନ୍ତି । ଏହା ସହିତ ବିଦ୍ୟୁତ ଉପୋଭୋକ୍ତା ମାନଙ୍କୁ ନିରବଛିନ୍ନ ବିଦ୍ୟୁତ ଯୋଗାଇ ଦେବାକୁ ନିର୍ଦ୍ଦେଶ ଦିଆଯାଇଛି ।
ତେବେ ମୁଖ୍ୟ ସଚିବଙ୍କ ଏହି ନିର୍ଦ୍ଦେଶ ପରେ ସାଧାରଣ ଲୋକମାନେ ଏବେ ଆଲୋଚନା କରୁଛନ୍ତି ଯେ, ଏହି ବିଦ୍ୟୁତକାଟ୍ ବନ୍ଦ କରିବା ନିର୍ଦ୍ଦେଶକୁ କାର୍ଯ୍ୟକାରୀ କରିବ କିଏ ? ରାଜ୍ୟ ସରକାରଙ୍କର ଶକ୍ତି ବିଭାଗ ନା ବିତରଣ ବ୍ୟବସ୍ଥା ଦାୟିତ୍ୱରେ ଥିବା ଟାଟା ପାୱାର ? ବାରମ୍ବାର ବିଦ୍ୟୁତକାଟ ହେଲା ପରେ ମଧ୍ୟ ଶକ୍ତି ବିଭାଗର ମନ୍ତ୍ରୀ ଏହାକୁ ସ୍ୱୀକାର କରୁନଥିଲେ କାହିଁକି ? ମୁଖ୍ୟ ଶାସନ ସଚିବଙ୍କ ତାଗିଦ୍ କୁ ଟାଟା ପାୱାର ମାନିବ ତ ? ଲୋକମାନେ ସାମାଜିକ ଗଣମାଧ୍ୟମରେ ଅଭିଯୋଗ ଜଣାଇଲେ ଏହା ତତକାଳ ସମାଧାନ ହେବ ତ ? ଯଦି ବିଦ୍ୟୁତ କାଟ ବାବଦରେ ବିଭାଗୀୟ ମନ୍ତ୍ରୀ ଜାଣିଶୁଣି ନିରବ ରହିଥିଲେ, ବିତରଣ କଂପାନୀ ମଧ୍ୟ ସାଧାରଣ ଲୋକଙ୍କ ଅଭିଯୋଗକୁ ଶୁଣିବାକୁ ପ୍ରସ୍ତୁତ ନାହିଁ ଓ ସରକାରୀ ଦଳର ସାଂସଦଙ୍କ ଠାରୁ ଆରମ୍ଭ କରି ଶାସକ ଦଳ ମୁଖପାତ୍ର ଓ ସରକାରୀ ଗଣମାଧ୍ୟମ ମଧ୍ୟ ବିତରଣ କଂପାନୀ ବିରୋଧରେ ମୁହଁ ଖୋଲିବା ସତ୍ତ୍ୱେ କଂପାନୀ ସେମାନଙ୍କୁ ଗୁରୁତ୍ୱ ଦେଉନାହିଁ ତେବେ, ମୁଖ୍ୟ ଶାସନ ସଚିବଙ୍କ ବିଦ୍ୟୁତ କାଟ ବନ୍ଦ କରିବା ନିଷ୍ପତ୍ତି କାର୍ଯ୍ୟକାରୀ ହେବ କିପରି ?
