ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୭ ମାର୍ଚ୍ଚ ୨୦୨୩
୨୦୨୪ ସାଧାରଣ ନିର୍ବାଚନ ପୂର୍ବରୁ ଶାସକ ବିଜେଡି ଏବେ ନିଜର ସଂଗଠନକୁ ଆହୁରି ସୁଦୃଢ଼ କରିବାକୁ ଉଦ୍ୟମ ଆରମ୍ଭ କରିଛି । ଏପରିକି ବିଭିନ୍ନ ଜିଲ୍ଲାରେ ଥିବା ବିଦ୍ରୋହୀ ନେତା ମାନଙ୍କୁ ଆଖି ଆଗରେ ରଖି ସଙ୍ଗଠନ ସଜାଡ଼ିବାକୁ ଚେଷ୍ଟା କରିଛି ଶାସକ ଦଳ । ସାଂଗଠନିକ ଦାୟିତ୍ବ ଦେବାସହ ବିଭିନ୍ନ ଜିଲ୍ଲା ପାଇଁ ୩୦ ଜଣିଆ ତାଲିକା ଦଳ ପକ୍ଷରୁ ପ୍ରସ୍ତୁତ କରାଯାଇଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ମାତ୍ର କେଇମାସ ପୂର୍ବରୁ ବିଭିନ୍ନ ଜିଲ୍ଲାର ଦାୟିତ୍ୱ ନେତାମାନଙ୍କ ମଧ୍ୟରେ ବଣ୍ଟନ କରାଯାଇଥିଲା ବେଳେ ପୁଣି ଅଦଳ ବଦଳ କାହିଁକି କରାଗଲା ? ମୟୁରଭଞ୍ଜ ଦାୟିତ୍ବରୁ ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ହଟାଯାଇ ୪ଟି ଜିଲ୍ଲାର ଦାୟିତ୍ୱ ଦେବା ପଛର କାରଣ କ’ଣ ? ସମ୍ବଲପୁର, ଢେଙ୍କାନାଳ, ଅନୁଗୁଳ କେନ୍ଦୁଝର ଭଳି ୪ଟି ଜିଲ୍ଲାର ଦାୟିତ୍ବ ପ୍ରଣବ ପ୍ରକାଶଙ୍କ ହାତରେ କାହିଁକି ? ମନ୍ତ୍ରୀମଣ୍ଡଳରୁ ବାଦ୍ ପଡ଼ିଥିବା ଅରୁଣ ସାହୁ, ସୁଶାନ୍ତ ସିଂ, ଦିବ୍ୟଶଙ୍କର ମିଶ୍ର,ପ୍ରତାପ ଜେନା,ପଦ୍ମନାଭ ବେହେରା ଆଦିଙ୍କୁ ସଂଗଠନ ଦାୟିତ୍ୱ ଦେବା ନିଷ୍ପତ୍ତି କାହିଁକି ?
ତେବେ ବିଶ୍ୱସ୍ତ ସୂତ୍ରରୁ ମିଳିଥିବା ଖବର ଅନୁଯାୟୀ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାରମ୍ବାର ଢେଙ୍କାନାଳ, ଅନୁଗୁଳ ଓ ସମ୍ବଲପୁର ଗସ୍ତ ଏବଂ ପଶ୍ଚିମ ଓଡ଼ିଶାର ଟାଣୁଆ ବିଜେପି ନେତା ତଥା ବିରୋଧୀ ଦଳ ନେତା ଜୟ ନାରାୟଣ ମିଶ୍ରଙ୍କ ଆକ୍ରମଣାତ୍ମକ ଆଭିମୁଖ୍ୟ ଏବେ ଶାସକ ଦଳକୁ ସାଂଗଠନିକ ସ୍ଥିତି ସୁଦୃଢ଼ କରିବାକୁ ବାଧ୍ୟ କରିଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜେ ଢେଙ୍କାନାଳ ସମେତ ଅନୁଗୁଳ ଓ ସମ୍ବଲପୁରର ସାଂଗଠନିକ ସ୍ଥିତିକୁ ସଜାଡ଼ିବା ପରେ ଶାସକ ଦଳ ଏବେ ଛାନିଆ ହୋଇପଡ଼ିଛି । ଏଣୁ ଏହି ଜିଲ୍ଲାର ସଂଗଠନ ସଜାଡ଼ିବା ପାଇଁ ୩ୟ ମହଲାର ବିଶ୍ୱସ୍ତ ନେତା ପ୍ରଣବ ପ୍ରକାଶ ଦାସଙ୍କୁ ଏହି ଜିଲ୍ଲା ଗୁଡ଼ିକର ଦାୟିତ୍ୱ ଦିଆଯାଇଛି । ଏପରିକି ୩୦ ଜଣିଆ ତାଲିକାରେ ସର୍ବାଧିକ ଅନୁଗତ ରହିଛନ୍ତି ସଂଗଠନ ସଂପାଦକ ପ୍ରଣବ ପ୍ରକାଶ ଦାସଙ୍କର । ପାଖାପାଖି ୧୦ଜଣରୁ ଅଧିକ ନିଜର ଅନୁଗତଙ୍କୁ ଏହି ନୂଆ ତାଲିକାରେ ସ୍ଥାନ ଦେଇଛନ୍ତି ନିଜେ ପ୍ରଣବ ପ୍ରକାଶ ଦାସ । ସେହିପରି ଧାମନଗର ଉପନିର୍ବାଚନ ପରାଜୟ ପରେ ଅନ୍ୟ ଜିଲ୍ଲାରେ ମଧ୍ୟ ବିଦ୍ରୋହର ସମ୍ଭାବନା ଦେଖାଦେଇ ଥିବାରୁ ସେହି ଜିଲ୍ଲା ଗୁଡ଼ିକୁ ମଧ୍ୟ ଫୋକସ୍ ରେ ରଖାଯାଇଛି ଏହି ତାଲିକାରେ । ମନ୍ତ୍ରୀମଣ୍ଡଳରୁ ବାଦ୍ ପଡି ଅସନ୍ତୁଷ୍ଟ ହୋଇପଡ଼ିଥିବା କିଛି ନେତାଙ୍କ ମଧ୍ୟରୁ ଅରୁଣ ସାହୁ, ଦିବ୍ୟଶଙ୍କର ମିଶ୍ର, ସୁଶାନ୍ତ ସିଂ, ପ୍ରତାପ ଜେନା ଆଦିଙ୍କୁ ମଧ୍ୟ ଦଳ କେତେକ ଜିଲ୍ଲାର ଦାୟିତ୍ୱ ଦେଇଛି । ବିଜେଡି ପକ୍ଷରୁ ଘୋଷଣା କରାଯାଇଥିବା ଏହି ତାଲିକାରେ ଉପକୂଳ ଅଞ୍ଚଳ ଅପେକ୍ଷା ପଶ୍ଚିମ ଓଡ଼ିଶାକୁ ଅଧିକ ଗୁରୁତ୍ୱ ଦିଆଯାଇଥିବା ଜଣାପଡ଼ିଛି । ଖୋର୍ଦ୍ଧା, ଯାଜପୁର, ଭଦ୍ରକ,ପୁରୀ, ନୟାଗଡ଼, କଟକ, ବାଲେଶ୍ଵର, ମୟୁରଭଞ୍ଜ ଆଦି ଜିଲ୍ଲା ଉପରେ ସିଧାସଳଖ ଦଳର କ୍ଷମତା କେନ୍ଦ୍ରର ନିର୍ଦ୍ଦେଶ କାର୍ଯ୍ୟକାରୀ କରିବାଭଳି ନେତାମାନଙ୍କୁ ଦାୟିତ୍ୱରେ ରଖାଯାଇଛି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିରୋଧୀଦଳ ନେତା ଜୟନାରାୟଣ ମିଶ୍ରଙ୍କ ପ୍ରଭାବ ଥିବା ଜିଲ୍ଲା ଗୁଡ଼ିକ ଉପରେ ବିଜେଡିର ସ୍ୱତନ୍ତ୍ର ଫୋକସ୍ ରହିଥିବା ଏହି ତାଲିକାରୁ ବେଶ୍ ସ୍ପଷ୍ଟ ହୋଇଛି । ଏପରିକି ଏହି ସ୍ଥାନରେ ଦଳୀୟ ସଂଗଠନକୁ ସଜାଡ଼ିବାର ଦାୟିତ୍ୱ ସଂଗଠନ ସଂପାଦକ ପ୍ରଣବ ପ୍ରକଶ ଦାସ ଓ ତାଙ୍କ ଅନୁଗତ ନେତା ମାନଙ୍କ ଉପରେ ଛାଡ଼ି ଦିଆଯାଇଛି। ବିଜେଡିର ତ୍ରିମୁର୍ତ୍ତୀ କୁହାଯାଉଥିବା ଅରୁଣ ସାହୁ, ଅତନୁ ସବ୍ୟସାଚୀ ନାୟକ ଓ ସଂଜୟ ଦାସବର୍ମାଙ୍କ ମଧ୍ୟରୁ ଅତନୁ ସବ୍ୟସାଚୀ ନାୟକଙ୍କୁ ୨ଟି ଜିଲ୍ଲାର ଦାୟିତ୍ୱ ଦିଆଯାଇଥିବା ବେଳେ ଅରୁଣ ସାହୁଙ୍କୁ ଗୋଟିଏ ଜିଲ୍ଲାର ଦାୟିତ୍ୱ ମିଳିଛି ଓ ସଞ୍ଜୟ ଦାସବର୍ମା ଏଥର ମଧ୍ୟ ଦାୟିତ୍ୱ ପାଇବାରୁ ବଂଚିତ ହୋଇଛନ୍ତି । ତେବେ ଏହି ୩ ନେତାଙ୍କ ମଧ୍ୟରେ ଅତନୁଙ୍କ ଗୁରୁତ୍ୱ ବଢ଼ିଥିବା ବେଳେ ଅରୁଣଙ୍କ ଗୁରୁତ୍ୱ ଅପେକ୍ଷାକୃତ କମାଇ ଦିଆଯାଇଛି ଓ ସଞ୍ଜୟଙ୍କୁ ମଧ୍ୟ ଦଳ ସମ୍ପୂର୍ଣ୍ଣ ଅଣଦେଖା କରିବା ସ୍ପଷ୍ଟ ହୋଇଛି ଏହି ତାଲିକାରୁ । ଏପରିକି ଅଧିକ ବିଦ୍ରୋହୀ ନେତାଙ୍କ ସଂଖ୍ୟା ଥିବା ଜିଲ୍ଲା ଗୁଡ଼ିକ ମଧ୍ୟରୁ କଟକ, ପୁରୀ, ଜଗତସିହପୁର, ଭଦ୍ରକ, ମୟୁରଭଞ୍ଜ ଓ ଗଂଜାମ ଜିଲ୍ଲାର ସଂଗଠନ ଉପରେ କ୍ଷମତା କେନ୍ଦ୍ରର ସ୍ୱତନ୍ତ୍ର ନଜର ରହିବା ଭଳି ଏହି ଦାୟିତ୍ୱ ବଣ୍ଟାରୁ ମନେହୁଏ ।
ତେବେ ଯାହାବି ହେଉ ଏହି ସାଂଗଠନିକ ଦାୟିତ୍ୱ ତାଲିକାରେ ସବୁଠାରୁ ଅଧିକ ୪ ଜିଲ୍ଲାର ଦାୟିତ୍ୱ ପ୍ରଣବ ପ୍ରକାଶ ଦାସଙ୍କୁ ମିଳିଥିବା ବେଳେ ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କୁ ୨ଟି ଓ ପୂର୍ବତନ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ମଧ୍ୟ ୨ଟି ଜିଲ୍ଲାର ଦାୟିତ୍ୱ ମିଳିଛି ।
