ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୧ ଜୁନ୍ ୨୦୨୩
କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରଙ୍କ ୯ ବର୍ଷ ପୂର୍ତ୍ତି ଅବସରରେ ବିଜେପି ଆରମ୍ଭ କରିଛି ମହା ଜନସମ୍ପର୍କ ଅଭିଯାନ । ଆସନ୍ତା ଜୁନ୍ ୩୦ ତାରିଖ ପର୍ଯ୍ୟନ୍ତ ଏହି ଅଭିଯାନ ଜାରୀ ରଖିବ ବିଜେପି । ଏପରିକି ସାରାଦେଶରେ ୫୧ ଟି “ମହା ରାଲି” ଆୟୋଜନ କରାଯିବ । ଓଡ଼ିଶାରେ ମଧ୍ୟ ୪ ଟି “ମହାରାଲି” ହେବାର ଯୋଜନା ରହିଛି । ଓଡ଼ିଶାରେ ହେବାକୁ ଥିବା ମହାରାଲିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପ୍ରମୁଖ ଯୋଗଦେବାର କାର୍ଯ୍ୟକ୍ରମ ରହିଛି ।
ମୋଦୀ ସରକାରଙ୍କର ୯ ବର୍ଷର ସଫଳତା, ସେବା, ସୁଶାସନ ଓ ଗରିବ କଲ୍ୟାଣ ଯୋଜନା ବାବଦରେ ସାଧାରଣ ଲୋକଙ୍କୁ ଅବଗତ କରାଇବ ବିଜେପି । ଓଡ଼ିଶାରେ ୪ଟି ମହାରାଲି ସହ ୧ ହଜାରରୁ ଅଧିକ ଜନସଭା କରାଯିବ ବୋଲି ରାଜ୍ୟ ବିଜେପି ପକ୍ଷରୁ ସ୍ଥିର କରାଯାଇଛି । ଡବଲ୍ ଇଞ୍ଜିନ୍ ସରକାର ଗଠନ ପାଇଁ ରାଜ୍ୟ ବିଜେପିର ୫ ଲକ୍ଷ କାର୍ଯ୍ୟକର୍ତ୍ତା ୧ କୋଟି ପରିବାରକୁ ଭେଟିବେ ବୋଲି ବିଜେପି ପକ୍ଷରୁ କୁହାଯାଇଛି । ଏହି ମହାଜନ ସଂପର୍କ ଅଭିଯାନକୁ ରାଜ୍ୟର ୨୧ ଟି ଲୋକସଭା କ୍ଷେତ୍ରରେ କରାଯିବ । ଏହି ଲୋକସଭା କ୍ଷେତ୍ର ଗୁଡ଼ିକୁ ୬ ଟି କ୍ଲଷ୍ଟରରେ ଭାଗ କରିଛି ଦଳ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ୱିନୀ ବୈଷ୍ଣବ, ବିଶ୍ୱେଶ୍ୱର ଟୁଡୁ ଆଦିଙ୍କ ସହ ଅନେକ କେନ୍ଦ୍ରମନ୍ତ୍ରୀ ଏହି ଅଭିଯାନରେ ସାମିଲ ହେବେ । ଏହି ମହା ଜନସଂପର୍କ ଅଭିଯାନକୁ ତଦାରଖ କରିବାପାଇଁ ଏକ ସ୍ୱତନ୍ତ୍ର ଟିମ୍ ମଧ୍ୟ ରାଜ୍ୟ ବିଜେପି ଗଠନ କରିଛି ।
ଅପରପକ୍ଷେ ଓଡ଼ିଶାରେ ଲମ୍ବା ସମୟ ଧରି ଶାସନ କ୍ଷମତା ଜାବୁଡ଼ି ଧରିଥିବା ବିଜେଡି ମଧ୍ୟ ୨୩ ବର୍ଷ ସରକାରର ସଫଳତାକୁ ନେଇ ଲୋକଙ୍କ ପାଖକୁ ଯିବ । ରାଜ୍ୟ ସରକାରଙ୍କର ବର୍ଷ ପୂର୍ତ୍ତି ଉତ୍ସବ ଏବେଠାରୁ ଆରମ୍ଭ କରିଦେଇଛି ବିଜେଡି । ରାଜ୍ୟର ପ୍ରମୁଖ ଗଣମାଧ୍ୟମ ଦ୍ୱାରା ରାଜ୍ୟସରକାରଙ୍କ ସଫଳତା ବାବଦରେ ମନ୍ତ୍ରୀ ଓ ସଚିବ ମାନେ ଲୋକଙ୍କୁ ବୁଝାଇବା ଆରମ୍ଭ କରିଦେଇଛନ୍ତି । ମନ୍ତ୍ରୀଙ୍କ ଅପେକ୍ଷା ସଚିବ ମାନଙ୍କୁ ଗଣମାଧ୍ୟମରେ ଅଧିକ ବିବୃତି ଦେବାପାଇଁ ମଧ୍ୟ ସରକାରୀ ସ୍ତରରେ ଅନୁମତି ଦିଆଯାଇଛି । ନିଜ ନିଜ ନିର୍ବାଚନ ମଣ୍ଡଳୀରେ ବିଧାୟକ ଓ ଛାମୁଆଁ ସଂଗଠନ କର୍ମକର୍ତ୍ତାଙ୍କୁ ମଧ୍ୟ ଲୋକମାନଙ୍କୁ ବିଭିନ୍ନ ସରକାରୀ ଯୋଜନା ଓ ସଫଳତା ବାବଦରେ ସଚେତନ କରାଇବାକୁ ବିଜେଡି ପକ୍ଷରୁ ନିର୍ଦ୍ଦେଶ ଦିଆସରିଛି। ନେତା,ମନ୍ତ୍ରୀଙ୍କ ଅପେକ୍ଷା ଓଡ଼ିଶା ସରକାରଙ୍କ ସଫଳତା ସଂପର୍କରେ ସାଧାରଙ୍କ ଲୋକଙ୍କୁ ପ୍ରଭାବିତ କରିବାର ଅଧିକ ଦାୟିତ୍ୱ ନେଇଛନ୍ତି ପ୍ରଶାସନିକ ଅଧିକାରୀମାନେ । ଏମାନଙ୍କ ଜରିଆରେ ବିଜେଡି ନିଜର ଜନସଂପର୍କ ଅଭିଯାନକୁ ତ୍ୱରାନ୍ୱିତ କରିବାର ଲକ୍ଷ୍ୟ ରଖିଛି ।
ଦୁଇ ପ୍ରମୁଖ ଦଳ ବିଜେପି ଓ ବିଜେଡିର ରାଜ୍ୟବ୍ୟାପି କାର୍ଯ୍ୟକ୍ରମ ଓ ପ୍ରସ୍ତୁତି ଦେଖିଲେ ଯେ କେହିବି ଭାବିବ ବୋଧହୁଏ ନିର୍ଦ୍ଧାରିତ ସମୟ ପୂର୍ବରୁ ଓଡ଼ିଶାରେ ନିର୍ବାଚନ ହୋଇପାରେ । ଏପରିକି କେତେକ ଜାତୀୟ ସ୍ତରର ଗଣମାଧ୍ୟମରେ ମଧ୍ୟ ଓଡ଼ିଶାର ଶାସକ ଦଳ ଆଗୁଆ ନିର୍ବାଚନ ପାଇଁ ପ୍ରସ୍ତୁତି କରିସାରିଥିବା କଥା ପ୍ରଚାରିତ ହୋଇଛି । ଏଣୁ ବିଜେଡିର ୨୩ ବର୍ଷ ସରକାରର ସଫଳତା କୁ ନେଇ ନେତା ଓ ବାବୁ ମାନଙ୍କ ଅଭିଯାନକୁ ସାମ୍ନା କରିବ ବିଜେପି ନିଜର ମହା ଜନସମ୍ପର୍କ ଅଭିଯାନ ମାଧ୍ୟମରେ । ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ସଫଳତା ର ବାର୍ତ୍ତା ଯିବ ଲୋକଙ୍କ ପାଖକୁ । ତେବେ ବିଜେପିର ଫୋକସ ଲୋକସଭା ଅବା ବିଧାନସଭା ଉପରେ ରହିବ ତାହା ଏବେ ବି ଅସ୍ପଷ୍ଟ । ସେହିପରି ବିଜେଡି ମଧ୍ୟ ଅଧିକ ଭାବେ ବିଧାନସଭା ଆସନ ଜିତିବା ଲକ୍ଷ୍ୟ ନେଇ ନିଜର ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥିବା ନିର୍ଭର ଯୋଗ୍ୟ ସୂତ୍ରରୁ ଶୁଣିବାକୁ ମିଳୁଛି ।
