ବ୍ୟୁରୋ ରିପୋର୍ଟ, ନିର୍ଭୀକ, ୧୩ ଅକ୍ଟୋବର ୨୦୨୨
ଧାମନଗର ଉପନିର୍ବାଚନ ପାଇଁ ୩ ପ୍ରମୁଖ ରାଜନୈତିକ ଦଳ ବିଜେପି, ବିଜେଡି ଓ କଂଗ୍ରେସ ନିଜ ନିଜର ପ୍ରାର୍ଥୀ ଘୋଷଣା କରିଛନ୍ତି । ଦିବଂଗତ ବିଧାୟକ ବିଷ୍ଣୁ ସେଠୀଙ୍କ ପୁଅ ସୂର୍ଯ୍ୟବଂଶୀ ସୂରଜ ବିଜେପିରୁ ପ୍ରାର୍ଥୀ ହୋଇଥିବା ବେଳେ ବାବା ହରେକୃଷ୍ଣ ସେଠୀ ଙ୍କୁ କଂଗ୍ରେସ କରିଛି ପ୍ରାର୍ଥୀ ଓ ଅବନ୍ତୀ ଦାସ ଙ୍କୁ ପ୍ରାର୍ଥୀ କରିଛି ବିଜେଡି । ୩ ଜଣ ଯାକ ପ୍ରାର୍ଥୀ ନବାଗତ ଧାମନଗର ଆସନ ପାଇଁ । ଅନୁକମ୍ପା ଭୋଟ ହାତେଇବା ପାଇଁ ବିଜେପି ଲକ୍ଷ୍ୟ ରଖିଥିବା ବେଳେ ବିଜେଡି ଖେଳିଛି ମହିଳା କାର୍ଡ ।
ତେବେ ଲଢ଼େଇ ରୋଚକ ହେବ ବା ଏକ ପାଖିଆ ହେବ ତାହା ନିର୍ଭର କରୁଛି ବିଜେଡି ଓ ବିଜେପି ଉପରେ । ବିଜେଡିର ପୂର୍ବତନ ବିଧାୟକ ରାଜେନ୍ଦ୍ର ଦାସ ଙ୍କ ଚିଠି ଏବେ ଧାମନଗର ଉପନିର୍ବାଚନରେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ପାଲଟିଛି । ରାଜେନ୍ଦ୍ର ଦାସଙ୍କୁ ବିଜେଡି ପ୍ରାର୍ଥୀତ୍ୱରୁ ବଂଚିତ କରିବା ପରେ ଉତକ୍ଷିପ୍ତ ହୋଇପଡିଛନ୍ତି ତାଙ୍କର ସମର୍ଥକ ମାନେ । ସୋସିଆଲ୍ ମିଡ଼ିଆ ଓ ମିଡ଼ିଆରେ ଘୁରି ବୁଲୁଥିବା ଚିଠିଟି ଯଦି ରାଜେନ୍ଦ୍ର ଦାସ ନିଜେ ଲେଖିଥାଆନ୍ତି, ତେବେ ବିଜେଡି ପାଇଁ ଏହା ହେବ ବଡ଼ ଚାଲେଂଜ । ଗୋଟିଏ ପରେ ଗୋଟିଏ ଉପନିର୍ବାଚନ ଜିତି ରେକର୍ଡ କରିଥିବା ଶାସକ ବିଜେଡିରେ ଥିବା ଆଭ୍ୟନ୍ତରୀଣ ଅସନ୍ତୋଷର ଏହା ପରିପ୍ରକାଶ । ଦଳର ଚାପ ଆଗରେ ଯଦି ରାଜେନ୍ଦ୍ର ଓ ତାଙ୍କ ସମର୍ଥକ ମାନେ ମୁଣ୍ଡ ନ ନୁଆଁନ୍ତି ତେବେ ବିଜେଡିକୁ ନିର୍ବାଚନ ଜିତିବା କଷ୍ଟକର ହୋଇପାରେ ।
ଏବେ ନଜର ପକାଇବା ରାଜେନ୍ଦ୍ର ଦାସଙ୍କ ଏହି ଚିଠିରେ କ’ଣ ଅଛି ଓ କାହା ଉଦ୍ଦେଶ୍ୟରେ ଏହି ଚିଠି ଲେଖାଯାଇଛି । ଧାମନଗରବାସୀଙ୍କୁ ସମ୍ବୋଧିତ କରି ଚିଠି ଲେଖିଛନ୍ତି ରାଜେନ୍ଦ୍ର ଦାସ । ୨୦୦୯ ରୁ ୨୦୧୪ ପର୍ଯ୍ୟନ୍ତ ସେ ବିଧାୟକ ଥିବା ବେଳେ କୌଣସି ଭୁଲ୍ ନକରି ୨୦୧୪ ରେ ତାଙ୍କର ଟିକେଟ କାହିଁକି ଦଳ କାଟି ଦେଲା ବୋଲି ସେ ପ୍ରଶ୍ନ କରିଛନ୍ତି । ୨୦୧୯ ରେ ମଧ୍ୟ ତାଙ୍କ ଦଳର କିଛି ବ୍ୟକ୍ତି ବିଶେଷ ତାଙ୍କୁ ଷଡ଼ଯନ୍ତ୍ର କରି ନିର୍ବାଚନରେ ହରାଇଦେଲେ ବୋଲି ସେ ଅଭିଯୋଗ କରିଛନ୍ତି । ଏପରିକି ଚଳିତ ଉପନିର୍ବାଚନରେ ମଧ୍ୟ ତାଙ୍କୁ ଟିକେଟ ଦେବାପାଇଁ କହିବା ସତ୍ତ୍ୱେ ଶେଷ ମୁହୁର୍ତ୍ତରେ ଦଳୀୟ ଟିକେଟରୁ ବଂଚିତ ହୋଇଥିବା କଥା ସେ କହିଛନ୍ତି । ତେଣୁ ସେ ସ୍ୱାଧୀନ ଭାବେ ନିର୍ବାଚନ ଲଢ଼ିବେ କି ନାହିଁ ବୋଲି ଧାମନଗରବାସୀଙ୍କୁ ପଚାରିଛନ୍ତି । ଅତଏବ ଏହି ଚିଠି ହିଁ ବୟାନ କରୁଛି ରାଜେନ୍ଦ୍ର ଦାସଙ୍କ ମନର କୋହ ଓ ଆଖିର ଲୁହକୁ । ଏପରିକି ୨୦୧୪ ପର ଠାରୁ ବିଜେଡିର କିଛି ନେତାଙ୍କ ଦ୍ୱାରା ସେ ଷଡ଼ଯନ୍ତ୍ରର ଶିକାର ହୋଇଥିବା କଥା ମଧ୍ୟ ସ୍ପଷ୍ଟ କରିଛି ଏହି ଚିଠି । ଯଦି ଏହି ଚିଠିକୁ ତର୍ଜମା କରାଯାଏ ତେବେ ରାଜେନ୍ଦ୍ର ଦାସ ନିଜ ଦଳ ଓ କିଛି ନେତାଙ୍କ ଉପରେ ଅସନ୍ତୁଷ୍ଟ ଥିବା କଥାକୁ ଲୁଚାଇପାରିବ କି ବିଜେଡି ? ରାଜେନ୍ଦ୍ରଙ୍କ ଭଳି ଜଣେ ଟାଣୁଆ ସଂଗଠକ ଓ ପୂର୍ବତନ ବିଧାୟକଙ୍କୁ ଦଳ ଗୁରୁତ୍ୱ ଦେଇନାହିଁ ଏହି କଥାକୁ ଅସ୍ୱୀକାର କରାଯାଇପାରିବ କି ? ହାତ ଗଣତି କିଛି ନେତାଙ୍କ ଦ୍ୱାରା ଦଳର ନୀତି ନିର୍ଦ୍ଧାରଣ ହେଉଛି ଓ ଟିକଟ ବଣ୍ଟନରେ ଏକତରଫା ନିଷ୍ପତ୍ତି ନିଆଯାଇଛି ବୋଲି ରାଜେନ୍ଦ୍ରଙ୍କ ଚିଠି ବୟାନ କରୁନାହିଁ କି ? ରାଜେନ୍ଦ୍ରଙ୍କୁ ବିଜେଡି ମନାଇ ନପାରିଲେ ଏହା ବିଜେଡି ପାଇଁ ବୁମେରାଂ ହେବ ନାହିଁ ତ ?
ସେହିପରି ବିଜେପିରେ ମଧ୍ୟ ପ୍ରାର୍ଥୀତ୍ୱକୁ ନେଇ ଦ୍ଵନ୍ଦ ନଥିଲେ ବି ଦଳର ପ୍ରଚାର ଦାୟିତ୍ୱ କିଏ ନେବ ତାହା ଏପର୍ଯ୍ୟନ୍ତ ଚୂଡ଼ାନ୍ତ ହୋଇପାରୁନାହିଁ । ଏହି ଆସନଟିକୁ ବିଜେପି ନିଜ ପାଖରେ ରଖିବାକୁ ଚାହୁଁଛି କି ନାହିଁ ତାହା ଏପର୍ଯ୍ୟନ୍ତ ବିଜେପିର କେନ୍ଦ୍ରୀୟ ନେତୃତ୍ୱ ମଧ୍ୟ ସ୍ପଷ୍ଟ କରୁନାହାନ୍ତି । କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବ୍ୟତୀତ ଆଉ କେହି ଯଦି ଦାୟିତ୍ୱ ନିଅନ୍ତି ତେବେ ଏଠାରେ ଉପନିର୍ବାଚନ ଜିତିବା ବିଜେପି ପାଇଁ ଆଦୌ ସହଜ ହେବ ନାହିଁ । ୨୦୧୭ ପଞ୍ଚାୟତ ନିର୍ବାଚନ ପରଠାରୁ ଏହା ପ୍ରମାଣିତ ହୋଇଛି ଯେ, ଧର୍ମେନ୍ଦ୍ର ପ୍ରଧାନ ଚାହିଁଲେ ଓଡ଼ିଶାରେ ବିଜେପି ଓ ବିଜେଡି ମଧ୍ୟରେ ଲଢ଼େଇ ସମ୍ଭବ ହେବ । ମାତ୍ର ୨୦୧୯ ପରଠାରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ରାଜ୍ୟ ରାଜନୀତି ପ୍ରତି ଅନାସକ୍ତ ଭାବର ପ୍ରତିଫଳନ ଦେଖିବାକୁ ମିଳିଛି ବିଗତ ପଞ୍ଚାୟତ, ପୌର ଓ ଉପନିର୍ବାଚନ ଗୁଡ଼ିକରେ । ଅପରାଜିତା ଷଡ଼ଙ୍ଗୀ, ବୈଜୟନ୍ତ ପଣ୍ଡା, ପ୍ରତାପ ଷଡ଼ଙ୍ଗୀ ଆଦି ନେତା ଯେତେ ଚେଷ୍ଟା କଲେ ମଧ୍ୟ ନିର୍ବାଚନରେ ବିଜେପିକୁ ଜିତାଇବା ସମ୍ଭବ ନୁହେଁ ବୋଲି ରାଜ୍ୟ ବିଜେପିର କର୍ମୀମାନେ ବୁଝି ସାରିଛନ୍ତି । ତେବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କେନ୍ଦ୍ରୀୟ ନେତା ଏହି ନିର୍ବାଚନ ପରିଚାଳନାର ଭାର ଦେବେ କି ? କେନ୍ଦ୍ରୀୟ ବିଜେପି ନେତା ଏହି ଆସନଟିକୁ ଜିତିବାକୁ ଚାହୁଁଛନ୍ତି କି ? ଏହି ପ୍ରଶ୍ନର ଉତ୍ତର ଯଦି ‘ହଁ’ ହୁଏ ତେବେ ହୁଏତ ଧାମନଗରରେ ଲଢ଼େଇ ରୋଚକ ହୋଇପାରେ ।
ସେହିପରି କଂଗ୍ରେସ ଯଦି ବ୍ରଜରାଜନଗର ଉପନିର୍ବାଚନ ଭଳି ଏକାଠି ଲଢ଼ିବାକୁ ପ୍ରସ୍ତୁତ ହୁଏ ତେବେ ହୁଏତ ପ୍ରାର୍ଥୀଙ୍କ ଅମାନତ ରହିଯାଇପାରେ ନଚେତ୍ ପୂର୍ବର ଉପନିର୍ବାଚନ ଗୁଡ଼ିକ ଭଳି କଂଗ୍ରେସର ଅସ୍ତିତ୍ୱ ବଞ୍ଚାଇବା କଷ୍ଟକର ହେବ । ସବୁଠାରୁ ବଡ଼କଥା ହେଉଛି ବିଜେଡିର ଚାପ ଆଗରେ ରାଜେନ୍ଦ୍ର ଦାସ କେତେ ସମୟ ତିଷ୍ଠି ରହି ପାରିବେ ? ରାଜେନ୍ଦ୍ର ଦାସ ସ୍ୱାଧୀନ ପ୍ରାର୍ଥୀ ଭାବରେ ଲଢ଼ିବେ ତ ? ଆଉ ଯଦି ସେ ସ୍ୱାଧୀନ ପ୍ରାର୍ଥୀ ଭାବେ ପ୍ରତିଦ୍ୱନ୍ଦିତା କରନ୍ତି ତେବେ ଧାମନଗରର ଫଳାଫଳ କିଛି ଭିନ୍ନ ବାର୍ତ୍ତା ଦେଇପାରେ । ତେବେ ବିଜେପି ନିର୍ଭର କରୁଛି ଧର୍ମେନ୍ଦ୍ର ପ୍ରଧାନଙ୍କ ଉପରେ ଓ ବିଜେଡି ନିର୍ଭର କରିବ ରାଜେନ୍ଦ୍ର ଦାସଙ୍କ ନିଷ୍ପତ୍ତି ଉପରେ ।
