ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୪ ମଇ ୨୦୨୩
ନୂଆ ସଂସଦ ଭବନ ଉଦଘାଟନ ଉତ୍ସବରୁ ନିଜକୁ ଦୂରେଇ ରଖିବେ ବିରୋଧୀଦଳମାନେ । ଆସନ୍ତା ୨୮ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ନୂତନ ସଂସଦ ଭବନ ଉଦଘାଟିତ ହେବାକୁ ଯାଉଛି। ଏହି ଉଦଘାଟନକୁ ନେଇ କଂଗ୍ରେସ ସମେତ ଦେଶର ଅନ୍ୟ ବିରୋଧୀ ଦଳ ମାନେ ଭିନ୍ନ ମତ ପୋଷଣ କରିଆସୁଛନ୍ତି । ଏପରିକି ଏହାର ଉଦଘାଟନ ସମାରୋହରେ ମହାମହିମ ରାଷ୍ଟ୍ରପତି ନିଜେ ଉପସ୍ଥିତି ରହିବା ସହ ନୂଆ ସଂସଦ ଭବନକୁ ଲୋକାର୍ପଣ କରିବା ଉଚିତ ହୋଇଥାନ୍ତା ବୋଲି କଂଗ୍ରେସ ପକ୍ଷରୁ ପ୍ରଥମେ ଦାବୀ କରାଗଲା । ପରବର୍ତ୍ତୀ ସମୟରେ ଅନ୍ୟ ବିରୋଧୀ ଦଳ ମାନେ କଂଗ୍ରେସର ଏହି ଦାବୀ ସହ ସହମତ ହେଲେ ଓ କାହିଁକି ରାଷ୍ଟ୍ରପତିଙ୍କୁ ଏହି ସଂସଦ ଭବନ ଉଦଘାଟନ ପାଇଁ ନିମନ୍ତ୍ରଣ କରାଯାଇନାହିଁ ବୋଲି ପ୍ରଶ୍ନ କରିବା ଆରମ୍ଭ କରିଦେଲେ । ଏବେ ଏହି ସମସ୍ତ ବିରୋଧୀ ଦଳ କଂଗ୍ରେସ ସହ ସାମିଲ ହୋଇ ନୂଆ ସଂସଦ ଭବନ ଲୋକାର୍ପଣ ଉତ୍ସବରୁ ଦୂରେଇ ରହିବା ପାଇଁ ମିଳିତ ବିବୃତି ଜାରି କରିଛନ୍ତି । କଂଗ୍ରେସ, ଆପ୍, ଶିବସେନା (ୟୁବିଟି), ତୃଣମୂଳ କଂଗ୍ରେସ, ଜନତାଦଳ(ୟୁ), ଡିଏମ୍ କେ, ସମାଜବାଦୀ ପାର୍ଟି, କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ, ଝାଡ଼ଖଣ୍ଡ ମୁକ୍ତିମୋର୍ଚ୍ଚା, ଏନ୍ ସିପି, ସିପିଆଇ (ଏମ୍), ଆରଜେଡି ଆଦି ୧୯ ଟି ଦଳ ନୂତନ ସଂସଦ ଭବନ ଉଦଘାଟନ ସମାରୋହରେ ଯୋଗଦେବେ ନାହିଁ ବୋଲି ଏକ ମିଳିତ ବିବୃତି ଜାରିକରିଛନ୍ତି ।
କେବଳ ନୂତନ ସଂସଦ ଭବନ ପରିପ୍ରେକ୍ଷୀରେ ବିରୋଧୀ ଦଳ ନିଜର ଏକତା ପ୍ରଦର୍ଶନ କରିବେ ନା ଦିଲ୍ଲୀ ସରକାରଙ୍କ ବିରୋଧରେ କେନ୍ଦ୍ର ସରକାରଙ୍କ ଦ୍ୱାରା ଅଣାଯାଇଥିବା ଅଧ୍ୟାଦେଶ ବିରୋଧରେ ମଧ୍ୟ ଏକାଠି ହେବେ ତାହା ଉପର ରାଜନୈତିକ ମହଲରେ ମଧ୍ୟ ଚର୍ଚ୍ଚା ଆରମ୍ଭ ହୋଇଛି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଅଧ୍ୟାଦେଶ ପ୍ରସଙ୍ଗରେ ସମର୍ଥନ କରିବେ ବୋଲି ଟିଏମ୍ ସି ସୁପ୍ରିମୋ ମମତା ବାନାର୍ଜୀ ଘୋଷଣା କରିବା ପରେ ଏହା ଅନ୍ୟ ବିରୋଧୀ ଦଳ ପ୍ରତି ଏକ ଆହ୍ୱାନ ହୋଇଛି । ଦିଲ୍ଲୀ ମୁଖ୍ୟମନ୍ତ୍ରୀ ମଧ୍ୟ ଏହି ଅଧ୍ୟାଦେଶ ବିରୋଧରେ ସମସ୍ତ ବିରୋଧୀ ଦଳଙ୍କୁ ଏକାଠି କରିବା ନେଇ ଯୋଜନା ପ୍ରସ୍ତୁତ କରିଛନ୍ତି । ଏହା ପୂର୍ବରୁ ବିହାର ମୁଖ୍ୟମନ୍ତ୍ରୀ ନୀତିଶ କୁମାର କଂଗ୍ରେସର ନେତା ମାନଙ୍କ ସହ ଦୁଇ ଦୁଇ ଥର ଆଲୋଚନା କରିବା ଓ ଅନ୍ୟ ଦଳର ନେତାମାନଙ୍କୁ ବିରୋଧୀ ଏକତା ସପକ୍ଷରେ ଭେଟିବା ଏକ ପ୍ରମୁଖ ରାଜନୈତିକ ପ୍ରସଙ୍ଗ ପାଲଟିଛି । ବିଜେପି ବିରୋଧରେ ଏକଜୁଟ ହେବାପାଇଁ ବିରୋଧୀ ଦଳ ଗୁଡ଼ିକୁ ମନାଇବାରେ ପ୍ରମୁଖ ଭୂମିକା ଗ୍ରହଣ କରୁଛନ୍ତି ବିହାର ମୁଖ୍ୟମନ୍ତ୍ରୀ ନୀତିଶ୍ କୁମାର । ଆପ୍ ଓ ଟିଏମ୍ ସି କୁ କଂଗ୍ରେସ ସହ ଯଦି ନୀତିଶ୍ କୁମାର ଯୋଡ଼ିବାରେ ସକ୍ଷମ ହୁଅନ୍ତି, ତେବେ ଆଗାମୀ ସାଧାରଣ ନିର୍ବାଚନ ପୂର୍ବରୁ ବିଜେପି ବିରୋଧରେ ଏକ ମହାମେଣ୍ଟ ଗଠନର ସମ୍ଭାବନା ଦେଖାଯାଇପାରେ । ମାତ୍ର ପଶ୍ଚିମବଙ୍ଗରେ କଂଗ୍ରେସର ସ୍ଥାନୀୟ ନେତାଙ୍କ ସହ ଟିଏମ୍ ସି ର ସମ୍ପର୍କ ଏବଂ ଦିଲ୍ଲୀରେ କଂଗ୍ରେସ ନେତାଙ୍କ ସହ ଆପ୍ ର ସମ୍ପର୍କ ସମସ୍ତଙ୍କୁ ବେଶ୍ ଭଲ ଭାବରେ ଜଣା ଅଛି ।
ନୀତିଶ କୁମାରଙ୍କ ଉଦ୍ୟମ ସଫଳ ହେବା ନହେବା ସବୁକିଛି ନିର୍ଭର କରୁଛି ଆପ୍ ନେତା ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଓ ଟିଏମସି ନେତା ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସମର୍ଥନ ଓ ସହଯୋଗ ଉପରେ । ପୂର୍ବରୁ ସମସ୍ତ ତିକ୍ତତାକୁ ଯଦି ଆପ୍ ଓ ଟିଏମସି ଭୁଲି ଯାଆନ୍ତି ଓ କଂଗ୍ରେସ ନେତୃତ୍ବାଧୀନ ମେଣ୍ଟ ସହ ଏକାଠି ହେବା ପାଇଁ ନିଷ୍ପତ୍ତି ନିଅନ୍ତି, ତେବେ ବିରୋଧୀ ଦଳମାନଙ୍କ ଭିତରେ ଏକତା ସମ୍ଭବ ହୋଇପାରେ । ନଚେତ୍ କଂଗ୍ରେସ କୁ ଛାଡ଼ି ଅନ୍ୟମାନେ ବିଜେପି ବିରୋଧରେ ଜାତୀୟ ସ୍ତରରେ ଏକ ଶକ୍ତିଶାଳୀ ମେଣ୍ଟ ଗଠନ କରିବା କଷ୍ଟକର ହୋଇପଡ଼ିବ । କର୍ଣ୍ଣାଟକ ନିର୍ବାଚନରେ କଂଗ୍ରେସର ବିପୁଳ ବିଜୟ ପରେ ଅନ୍ୟ ଦଳ ମାନେ କଂଗ୍ରେସ ଉପରେ ଭରସା କରିବା ପାଇଁ ବାଧ୍ୟ ହୋଇଛନ୍ତି ।
ତେଣୁ ସଂସଦ ଭବନ ଉଦ୍ ଘାଟନ ଓ ଦିଲ୍ଲୀ ସରକାରଙ୍କ ଉପରେ କେନ୍ଦ୍ର ସରକାର ଆଣିଥିବା ଅଧ୍ୟାଦେଶ ପ୍ରସଙ୍ଗରେ ଯଦି ସମସ୍ତ ବିରୋଧୀ ଶକ୍ତି ଏକାଠି ହୋଇ ପାରନ୍ତି ତେବେ ଆଗକୁ ଏକ ଶକ୍ତିଶାଳୀ ବିରୋଧୀ ମେଣ୍ଟର ସଂକେତ ମିଳିପାରେ ।
