ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୩୦ ମାର୍ଚ୍ଚ ୨୦୨୩
ନକଲି ଔଷଧ, ନକଲି ମଦ, ନକଲି ଖାଦ୍ୟ ସାମଗ୍ରୀ ପରେ ଏବେ ଓଡ଼ିଶାରେ ଚର୍ଚ୍ଚାରେ ରହିଛି ନକଲି ସାର୍ଟିଫିକେଟ ମାମଲା । ବଲାଙ୍ଗୀର ଠାରୁ ଏହି ନକଲି ସାର୍ଟିଫିକେଟର ଚେର ଲମ୍ବି ପହଁଚିଲାଣି ଏକାଧିକ ରାଜ୍ୟରେ । ଗୋଟିଏ ପରେ ଗୋଟିଏ ଜିଲ୍ଲାରୁ ଏବେ ନକଲି ସାର୍ଟିଫିକେଟ ଧାରୀ ଧରାପଡ଼ୁଛନ୍ତି । ବଲାଙ୍ଗୀରରୁ ଏହି ଘଟଣାର ପର୍ଦ୍ଦାଫାସ୍ ହେବାପରେ ଏବେ ଏହା ରାଜ୍ୟର ୬ ରୁ ୭ଟି ଜିଲ୍ଲାରେ ପହଞ୍ଚି ଗଲାଣି । ଏପରିକି ତଦନ୍ତ ପ୍ରକ୍ରିୟା ଗୋଟିଏ ଜିଲ୍ଲା ଭିତରେ ସୀମିତ ରହିଥିବାରୁ ଅନ୍ୟ ଜିଲ୍ଲାରେ ସକ୍ରିୟ ଥିବା ଏହି ରାକେଟ୍ ଓ ସମ୍ପୃକ୍ତ ବ୍ୟକ୍ତି ବିଶେଷ ମାନେ ରାଜ୍ୟ ବାହାରକୁ ଖସିଯିବାର ସମ୍ଭାବନା ମଧ୍ୟ ରହିଛି । ବଲାଙ୍ଗୀର ପୋଲିସ ଏହି ଘଟଣା ନେଇ ତଦନ୍ତ ପ୍ରକ୍ରିୟା ଆଗକୁ ନେଇଥିବା ବେଳେ ଅନ୍ୟ ଜିଲ୍ଲା ଗୁଡ଼ିକରେ ଏହି ମାମଲା ନେଇ ତଦନ୍ତ ପ୍ରକ୍ରିୟା ଶିଥିଳ ହୋଇପଡ଼ିବା ଭଳି ମନେ ହେଉଛି । ବଲାଙ୍ଗୀର ଜିଲ୍ଲା ପୋଲିସର ଏକାଧିକ ଟିମ୍ ଏବେ ଏନେଇ ଖୋଳତାଡ଼ ଆରମ୍ଭ କରିଛି । ଏହି ଘଟଣାର ମାଷ୍ଟର ମାଇଣ୍ଡ ମନୋଜ ମିଶ୍ର ଓ ସହଯୋଗୀ ଆଲୋକ ଉଦଗାତା ଧରାପଡ଼ିବା ପରେ ଦଲାଲ୍ ମାନଙ୍କୁ ପୋଲିସ ଖୋଜିବା ଆରମ୍ଭ କରିଛି । ତେବେ ମାଷ୍ଟର ମାଇଣ୍ଡ କୁହାଯାଉଥିବା ମନୋଜ ମିଶ୍ରଙ୍କ ରାଜନୈତିକ ସମ୍ପୃକ୍ତି ଶାସକ ବିଜେଡି ସହ ଥିବା ନେଇ ଚର୍ଚ୍ଚା ହେବାପରେ ଏ ଦିଗରେ ତଦନ୍ତ ଆଗକୁ ବଢିବ କି ନାହିଁ ସେନେଇ ସନ୍ଦେହ ସୃଷ୍ଟି ହୋଇଛି । ମିଳିଥିବା ଖବର ଅନୁଯାୟୀ ପୋଲିସ ମାଷ୍ଟର ମାଇଣ୍ଡ ମନୋଜ ମିଶ୍ରକୁ ଗିରଫ କରିବା ପରେ ତାର ଆକାଉଣ୍ଟ ନେଇ ତନାଘନା ଆରମ୍ଭ କରିଥିଲା । ଏଥିରୁ ବହୁ ଲୋକଙ୍କ ସମ୍ପୃକ୍ତି କଥା ମଧ୍ୟ ପୋଲିସ ଜାଣି ପାରିଛି ।
ଏହି ଘଟଣାରେ ବଲାଙ୍ଗୀର ପୋଲିସର ୪ଟି ଟିମ୍ ଅନୁସନ୍ଧାନ କରୁଥିବା ବେଳେ ରାଜ୍ୟ ବାହାରେ ଥିବା ବ୍ୟକ୍ତି ବିଶେଷଙ୍କୁ ଧରିବା କଷ୍ଟକର ହୋଇପାରେ ବୋଲି ଜଣାପଡ଼ିଲାଣି । ଏପରିକି ଯଦି ରାଜନୈତିକ ସମ୍ପୃକ୍ତି କଥା ପ୍ରମାଣିତ ହୁଏ ତେବେ ତଦନ୍ତ ଆଗକୁ ବଢ଼ିବ କି ନାହିଁ ତାହା ମଧ୍ୟ ଏବେ ସନ୍ଦେହ ଘେରରେ । ନକଲି ସାର୍ଟିଫିକେଟ୍ ପ୍ରସଙ୍ଗରେ ବିଧାନ ସଭାରେ ମଧ୍ୟ ଶାସକ ଦଳ ଓ ସରକାରଙ୍କୁ ଘେରିଛନ୍ତି ଦୁଇ ବିରୋଧୀ ଦଳ ବିଜେପି ଓ କଂଗ୍ରେସ । ଏହି ପ୍ରସଙ୍ଗରେ ଗୃହରେ ବେଶ୍ ହୋହାଲ୍ଲା ମଧ୍ୟ ହୋଇଛି । ବଲାଙ୍ଗୀର ଜିଲ୍ଲାରେ ଏହି ରାକେଟ ସୀମିତ ନାହିଁ ଓ ରାଜ୍ୟର ପ୍ରାୟ ସବୁ ଜିଲ୍ଲାରେ ଏହି ରାକେଟ ସକ୍ରିୟ ଥାଇପାରେ ବୋଲି ବିରୋଧୀ ଦଳର ସଦସ୍ୟ ମାନେ କହିବା ସହ ସମସ୍ତ ଜିଲ୍ଲାରେ ଏହି ରାକେଟର ପର୍ଦ୍ଦାଫାସ୍ ପାଇଁ ପୋଲିସ ଉଦ୍ୟମ କରିବା ଦରକାର ବୋଲି ବିରୋଧୀ ଦଳ ଦାବୀ କରିଛନ୍ତି । ଏପରିକି ବିଧାନସଭା ବାଚସ୍ପତି ସର୍ବଦଳୀୟ ବୈଠକ ଡାକି ସରକାରଙ୍କୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାପାଇଁ ମଧ୍ୟ ଦାବୀ କରିଛନ୍ତି ବିରୋଧୀ ଦଳର ନେତାମାନେ ।
ନକଲି ସାର୍ଟିଫିକେଟ ପ୍ରସଙ୍ଗ ନେଇ ଶାସକ ଦଳର ନେତାଙ୍କ ସମ୍ପୃକ୍ତି ସହ ଜଣେ ପୂର୍ବତନ ମନ୍ତ୍ରୀଙ୍କ ସମ୍ପର୍କ ରହିଛି ବୋଲି ବିରୋଧୀ ଦଳ ଅଭିଯୋଗ କରିବାପରେ ଏନେଇ ପଶ୍ଚିମ ଓଡ଼ିଶା ରାଜନୀତି ଏବେ ସରଗରମ ହୋଇଛି । ଗିରଫ ହୋଇଥିବା ଅଭିଯୁକ୍ତ ସହ ଶାସକ ଦଳ ବିଜେଡିର ସମ୍ପର୍କ କ’ଣ ସେନେଇ ଶାସକ ଦଳ ଉତ୍ତର ଦେଉ ବୋଲି ବିଧାନ ସଭାରେ ବିରୋଧୀ ମାନେ ଦାବୀ କରିବା ସହ ଏହାକୁ ଏକ ପ୍ରମୁଖ ପ୍ରସଙ୍ଗ କରିଛନ୍ତି ଶାସକ ଦଳ ଓ ରାଜ୍ୟ ସରକାରଙ୍କ ବିରୋଧରେ ।
ତେବେ ପୋଲିସର କାର୍ଯ୍ୟାନୁଷ୍ଠାନ ନେଇ ମଧ୍ୟ ସନ୍ଦେହ ପ୍ରକାଶ ପାଇଛି ଏବେ ସାଧାରଣ ଲୋକଙ୍କ ମନରେ । ଅନ୍ୟ ଜିଲ୍ଲା ଗୁଡ଼ିକରେ ଏନେଇ ବ୍ୟାପକ ତଦନ୍ତ ନହେବାର କାରଣ କ’ଣ ? କେବଳ ବଲାଙ୍ଗୀର ପୋଲିସ କ’ଣ ଏହି ଘଟଣାର ପର୍ଦ୍ଦାଫାଶ କରିପାରିବ କି ? ଧରାପଡ଼ିଥିବା ଅଭିଯୁକ୍ତ କ’ଣ ଏକାକୀ ଏହି ରାକେଟ ଚଳାଉଥିଲା ନା ତା ସହିତ ଅନ୍ୟ କୌଣସି ପ୍ରଭାବଶାଳୀ ବ୍ୟକ୍ତି ବିଶେଷ ରହିଛନ୍ତି ? ଶାସକ ଦଳର ନେତା ମାନଙ୍କର ଯଦି ସମ୍ପୃକ୍ତି ବାହାରେ ତେବେ ଏହି ତଦନ୍ତ କେବଳ ବଲାଙ୍ଗୀର ଜିଲ୍ଲା ଭିତରେ ସୀମିତ ରହିଯିବନି ତ ? ନକଲି ଔଷଧ ମାମଲା ଭଳି ଏହି ନକଲି ସାର୍ଟିଫିକେଟ ମାମଲା କେବଳ ତଦନ୍ତ ଭିତରେ ଶେଷ ହୋଇଯିବନି ତ ?
