ବ୍ୟୁରୋ ରିପୋର୍ଟ, ନିର୍ଭୀକ, ୧୧ ଅକ୍ଟୋବର ୨୦୨୨
ରିଲ୍ ଲାଇଫ୍ ର ପ୍ରଯୋଜକଙ୍କ କାହାଣୀରେ ରିୟଲ୍ ଲାଇଫ୍ ର ନେତା ମାନଙ୍କ ଅଭିନୟ ଏବେ ଓଡ଼ିଶା ରାଜନୀତିରେ ହଟଚମଟ ସୃଷ୍ଟି କରିଛି । ସୋସିଆଲ ମିଡ଼ିଆରେ କାଷ୍ଟିଙ୍ଗ କାଉଚ୍ ର ଅଭିଯୋଗ ଆସିଲା ଜଣେ ନାମକରା ପ୍ରଯୋଜକଙ୍କ ନାଁ ରେ । ନିଜର ସମ୍ମାନ ବଞ୍ଚାଇବାକୁ ଯାଇ ପ୍ରଯୋଜକ ମଧ୍ୟ କଲେ ପାଲଟା ଅଭିଯୋଗ । ସୋସିଆଲ ମିଡ଼ିଆରୁ ମିଡ଼ିଆ ମାତିଗଲେ ଏହି ଖବରକୁ ନେଇ । ହଠାତ୍ କାହାଣୀଟିରେ ଏକ ଟ୍ଵିଷ୍ଟ ଦେଖିବାକୁ ମିଳିଲା । ବଦଳିଗଲା କାହାଣୀ, ବଦଳିଗଲେ ନାୟକ , ଏହି କାହାଣୀରେ ଭୁବନେଶ୍ୱର କମିଶନରେଟ୍ ପୋଲିସ ମାରିଲା ଏଣ୍ଟ୍ରି । ତା’ପରେ ଜଣେ ଯୁବତୀ ହେଲେ ଗିରଫ । ବାସ୍ ସେତିକିରେ ଏହି କାହାଣୀ ଶେଷ ହେଲା ନାହିଁ , ଆଗକୁ ଆଗକୁ ବଢ଼ି ଚାଲିଲା ଠିକ୍ ମେଗା ସିରିଏଲ୍ ଭଳି । ଗଣମାଧ୍ୟମ ଗୁଡ଼ିକ ଆରମ୍ଭ କରିଦେଲେ କସରତ । ଚାଲିଲା ଟିଭି ଚ୍ୟାନେଲ୍ ଗୁଡ଼ିକରେ ଧାରା ବିବରଣୀ…। କିଏ କହିଲା ମାୟାବିନୀ କିଏ କହିଲା କୁହୁକିନୀ ତ ଆଉ କିଏ କହିଲେ ବ୍ଲାକମେଲ କରୁଥିବା ଯୁବତୀ, ତାଙ୍କର ରଙ୍ଗଶାଳାର ବର୍ଣନା ଟିଭି ଓ ଖବର କାଗଜରେ । ବିଚରା ଲୋକେ କରିବେ କ’ଣ ? ଲୋକମାନଙ୍କର ଆଲୋଚନାର ବିଷୟବସ୍ତୁ ପାଲଟିଗଲେ ଜଣେ ଅଜଣା ଯୁବତୀ । କିଏ ଏହି ଯୁବତୀ ? କିପରି ଚଳାଉଥିଲେ ରାଜଧାନୀରେ ରଙ୍ଗଶାଳା ? କେଉଁ ବ୍ୟକ୍ତି ମାନେ ଆସୁଥିଲେ ତାଙ୍କ ସାନିଧ୍ୟ ପାଇବାକୁ ? ଆସୁଥିବା ଆମ ନେତା ,ମନ୍ତ୍ରୀମାନେ କିଏ ? ପୋଲିସ ଏମାନଙ୍କ ତାଲିକା ପ୍ରକାଶ କରିବ ତ ? ଗଣମାଧ୍ୟମ ଏହି ନେତା, ମନ୍ତ୍ରୀ ଓ ବିଶିଷ୍ଟ ବ୍ୟକ୍ତିଙ୍କ ନାଁ ସାମ୍ନାକୁ ଆଣିବ ତ ? ରାଜନୈତିକ ଦଳମାନେ ଏମାନଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବେ ତ ? ଏଭଳି ଅନେକ ପ୍ରଶ୍ନ ଏବେ ଲୋକ ମାନଙ୍କ ମନ ଭିତରେ ଉଙ୍କି ମାରୁଛି ।
ଏବେ ଆସିବା ଅସଲ ପ୍ରସଙ୍ଗକୁ । ପ୍ରଥମେ ହୋଇଥିବା କାଷ୍ଟିଙ୍ଗ କାଉଚ୍ ଅଭିଯୋଗ ର ତଦନ୍ତ କୁଆଡ଼େ ଗଲା ? ଯେଉଁ ପ୍ରଯୋଜକଙ୍କ ବିରୋଧରେ ଅଭିଯୋଗ ଆସିଥିଲା ସେ ଏଥିରେ ଦୋଷୀ ନାଁ ନିର୍ଦୋଷ ? ଅଭିଯୋଗ କରିଥିବା ଯୁବତୀ ଓ ଫିଲ୍ମ ପ୍ରଯୋଜକଙ୍କ ମଧ୍ୟରୁ କିଏ ସତ କହୁଥିଲା ? ସର୍ବୋପରି ଏହି ଅଭିଯୋଗର ଆଇନଗତ ଦିଗ ବାବଦରେ ବେଶି କିଛି ଜଣାପଡ଼ିଲା । ପରେ ପରେ ପ୍ରଯୋଜକଙ୍କ ଅଭିଯୋଗ ଆଧାରରେ କମିଶନରେଟ୍ ପୋଲିସ ର ତ୍ୱରିତ କାର୍ଯ୍ୟାନୁଷ୍ଠାନ ଓ ଯୁବତୀ ଗିରଫ ହେବା ପ୍ରସଙ୍ଗ ଏବେ ଅନେକ ପ୍ରଶ୍ନ ସୃଷ୍ଟି କରିଛି ।
ଯଦି ଏହି ଯୁବତୀଙ୍କ ନାଁରେ ଆଗରୁ ଏକାଧିକ ବ୍ଲାକମେଲିଂର ଅଭିଯୋଗ ଥିଲା ତେବେ କମିଶନରେଟ୍ ପୋଲିସ କରୁଥିଲା କ’ଣ ? କାହିଁକି ଏହି ଯୁବତୀଙ୍କୁ ଧରିବାକୁ ଚେଷ୍ଟା କରୁନଥିଲା ପୋଲିସ ? ପୋଲିସ କାହା ଚାପରେ ଆସି ଆଗରୁ ଥିବା ଅଭିଯୋଗ ଗୁଡ଼ିକ ଉପରେ ବସି ଯାଇଥିଲା ? ରାତାରାତି ତ ରାଜଧାନୀରେ ଏହି ରଙ୍ଗଶାଳା ତିଆରି ହୋଇନଥିବ, ଏ ବାବଦରେ କମିଶନରେଟ୍ ପୋଲିସ ଜାଣିଥିଲା ନା ନାହିଁ ? ବହୁ ନେତା, ମନ୍ତ୍ରୀ ଓ ବିଶିଷ୍ଟ ବ୍ୟକ୍ତି ମାନେ ଯଦି ଏହି ରଙ୍ଗଶାଳାକୁ ଯିବା ଆସିବା କରୁଥିଲେ ଓ ଦାମୀ ଗାଡ଼ି ଏହି ଘର ସାମ୍ନାରେ ରହୁଥିଲା ତାହା ଜାଣିବା କ’ଣ ପୋଲିସର ଦାୟିତ୍ୱ ନୁହେଁ କି ? ଏବେ ଯଦି ପୋଲିସ ସବୁ ଜାଣିବା ପରେ ଯୁବତୀଙ୍କୁ ଗିରଫ କଲା, ତେବେ ଯୁବତୀଙ୍କ ସହିତ ସମ୍ପର୍କ ରଖୁଥିବା ନେତା, ମନ୍ତ୍ରୀ ଓ ବିଶିଷ୍ଟ ବ୍ୟକ୍ତି ମାନଙ୍କ ନାଁ ସାମ୍ନାକୁ ଆଣୁନି କାହିଁକି ?
ହଠାତ୍ ନିଦରୁ ଉଠିବା ଭଳି ଗଣମାଧ୍ୟମ ଗୁଡ଼ିକ ମଧ୍ୟ ଏହି ଖବରରେ କେବଳ ଯୁବତୀଙ୍କ ରଙ୍ଗଶାଳା, କୋଠାବାଡ଼ି, ସମ୍ପତ୍ତି ଓ ହାତଗଣତି କିଛି ନେତାଙ୍କ ଫଟୋ ଦେଖାରେ ସୀମିତ ରହୁଛନ୍ତି କାହିଁକି ? କୁଆଡ଼େ ଗଲା ସେମାନଙ୍କ ଅନୁସନ୍ଧାନ ମୂଳକ ସାମ୍ବାଦିକତା ? ଖାଲି ମାଳମାଳ ନେତା ଅଛନ୍ତି ବୋଲି କହି କ’ଣ ହାତ ଝାଡ଼ି ଦେବା ଗଣମାଧ୍ୟମ ଗୁଡ଼ିକ ର ଦାୟିତ୍ୱ ? ଏହି ଖବର ଦେଖାଇ ଲୋକଙ୍କୁ ଭକୁଆ ବନାଉଥିବା ଗଣମାଧ୍ୟମ ଏହି ଘଟଣାରେ ସମ୍ପୃକ୍ତ ବ୍ୟକ୍ତି ବିଶେଷଙ୍କ ନାଁ କୁ ସର୍ବ ସାଧାରଣରେ ପ୍ରକାଶ କରିପାରିବ କି ?
