ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୫ ଜୁନ୍ ୨୦୨୩
ବାଲେଶ୍ୱରର ବାହାନଗା ଠାରେ ଘଟିଥିବା ଟ୍ରେନ୍ ଦୁର୍ଘଟଣାରେ ସରକାରୀ ସୂତ୍ର ଅନୁଯାୟୀ ୨୭୫ ଜଣ ମୃତ୍ୟୁବରଣ କରିଥିବା ବେଳେ ଅନେକ ଯାତ୍ରୀ ଏବେବି ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ସାରାଦେଶ ଦେଖିଲା ଏଭଳି ଏକ ବଡ଼ ଟ୍ରେନ୍ ଦୁର୍ଘଟଣା ଓ ଜାଣିଲା ଦୁର୍ଘଟଣା ପରର ଚିତ୍ର । ବାଲେଶ୍ୱରକୁ ଛୁଟିଆସିଲେ ନେତା, ମନ୍ତ୍ରୀ, ମୁଖ୍ୟମନ୍ତ୍ରୀ, ପ୍ରଧାନମନ୍ତ୍ରୀ ଆଦି ବ୍ୟକ୍ତି ବିଶେଷ ମାନେ । ସାରା ବିଶ୍ୱ ଦୁଃଖ ପ୍ରକାଶ କଲା ଏଭଳି ଏକ ଦୁର୍ଘଟଣା ପରେ । ଦେଶର କୋଣ ଅନୁକୋଣରୁ ଛୁଟିଲା ସମବେଦନାର ସୁଅ । କେନ୍ଦ୍ରସରକାରଙ୍କ ଠାରୁ ଆରମ୍ଭ କରି ରାଜ୍ୟ ସରକାରଙ୍କ ପର୍ଯ୍ୟନ୍ତ ଘୋଷଣା କଲେ କ୍ଷତିପୂରଣ ରାଶି । ଏସବୁ ସତ୍ତ୍ୱେ ଅନେକ ପରିବାର ହରାଇଲେ ନିଜର ପ୍ରିୟଜନଙ୍କୁ । ଅନେକ ପରିବାର ହୋଇଗଲେ ବେସାହାରା । ମୃତକଙ୍କ ପରିବାର ଆଖିରୁ ଏପର୍ଯ୍ୟନ୍ତ ଲୁହ ଶୁଖୁନି ଅବା କୋହ ଥମୁନି ।
ଏସବୁ ଭିତରେ ଏହି ଟ୍ରେନ୍ ଦୁର୍ଘଟଣା ଅନେକ ପ୍ରଶ୍ନ ଛାଡ଼ିଦେଇ ଗଲା ସମସ୍ତଙ୍କ ମନରେ । ଏହି ଦୁର୍ଘଟଣା ଘଟିଲା କାହିଁକି ? ଏଥିପାଇଁ କିଏ ଦାୟୀ ? ଏହି ଦୁର୍ଘଟଣା ପଛରେ ଅଛିକି କିଛି ଷଡ଼ଯନ୍ତ୍ର ? ରେଳବୋର୍ଡ଼ର ସୂଚନା ଅନୁଯାୟୀ ସିଗନାଲ୍ ତ୍ରୁଟିପାଇଁ ଏହି ଦୁର୍ଘଟଣା ଘଟିଛି କି ? ରେଳବାଇର ଇଲେକ୍ଟ୍ରୋନିକ ଇଣ୍ଟରଲକିଂ ବ୍ୟବସ୍ଥା ତ୍ରୁଟିପୂର୍ଣ୍ଣ ଥିଲା କି ? ରେଳ ଦୁର୍ଘଟଣା ରୋକିବା ପାଇଁ ପୂର୍ବରୁ ରେଳମନ୍ତ୍ରୀଙ୍କ ଦ୍ୱାରା ଘୋଷିତ “କବଚ” ବ୍ୟବସ୍ଥା କାର୍ଯ୍ୟକାରୀ ନ ହେବାର କାରଣ କ’ଣ ? କେବଳ ଏତିକି ନୁହେଁ ଆହୁରି ଏକାଧିକ ପ୍ରଶ୍ନ ମଧ୍ୟ ସାଧାରଣ ଲୋକଙ୍କ ମନରେ ଉଠିଛି । ଯେଉଁ ସମୟରେ ଦେଶରେ ଟ୍ରେନ୍ ର ଗତି ବୃଦ୍ଧି ନେଇ ଆଲୋଚନା ହେଉଛି, ଭାରତରେ ବୁଲେଟ୍ ଟ୍ରେନ୍ ଚାଲିବା ନେଇ ଯୋଜନା ପ୍ରସ୍ତୁତି ହେଉଛି, ସେହି ସମୟରେ ଜଣେ ସାଧାରଣ ଟ୍ରେନ୍ ଯାତ୍ରୀର ଜୀବନ ଅସୁରକ୍ଷିତ ହୋଇପଡ଼ିଛି କାହିଁକି ? ବର୍ଷ ବର୍ଷ ଧରି ଏତେ ପରିମାଣରେ ଟ୍ରେନ୍ ଦୁର୍ଘଟଣା ଘଟିଚାଲିଥିଲେ ମଧ୍ୟ ଏଥିରେ ପୂର୍ଣ୍ଣଛେଦ ନପଡ଼ିବାର କାରଣ କ’ଣ ? ବିଭିନ୍ନ ସମୟରେ ଅନେକ ଧନଜୀବନ କ୍ଷତି ହେବା ପରେ ଆମର ରେଳବାଇ ବିଭାଗ ଓ ରେଳମନ୍ତ୍ରୀ ମାନେ ଏ ଦିଗରେ କ’ଣ ପଦକ୍ଷେପ ନେଇଛନ୍ତି ? କାହିଁକି ଆଜି ଦିନରେ ଭାରତୀୟ ରେଳବାଇ ନିଜର ଯାତ୍ରୀମାନଙ୍କୁ ସୁରକ୍ଷିତ ଭାବେ ଗନ୍ତବ୍ୟ ସ୍ଥଳରେ ପହଞ୍ଚାଇବାରେ ଅକ୍ଷମ ହେଉଛି ? ଟ୍ରେନ୍ କୁ ଆମ ଦେଶର “ଲାଇଫ୍ ଲାଇନ୍” ବୋଲି ସରକାର କହୁଥିବା ବେଳେ ଅନେକ ଲୋକଙ୍କ ଲାଇଫ୍ (ଜୀବନ) ସହ କିଏ ଖେଳୁଛି ଖେଳ ? ଏପରିକି ଆମ ଦେଶରେ ଘଟିଥିବା ଏକାଧିକ ଦୁର୍ଘଟଣା ପରେ ରେଳବାଇ ବିଭାଗ ଓ ଆମର ସରକାର ମାନେ ଏହାର ପ୍ରତିକାର କରିବାରେ ବାରମ୍ବାର ବିଫଳ ହେବାର କାରଣ କ’ଣ ?
ଏପରିକି ପ୍ରତି ଦୁର୍ଘଟଣା ପରେ କେନ୍ଦ୍ର ଓ ରାଜ୍ୟ ସରକାର କେବଳ ମୃତକଙ୍କ ପରିବାର ଲାଗି ସହାୟତା ରାଶି ଘୋଷଣା କରିବା ପରେ ସେମାନଙ୍କ ଦାୟିତ୍ୱ ଶେଷ ହୋଇଯାଉଛି କି ? କିଛି ସହାୟତା ରାଶି ପାଇବା ପରେ କ’ଣ କ୍ଷତିଗ୍ରସ୍ତ ପରିବାରର କ୍ଷତି ଭରଣା ହୋଇପାରିବ କି ? ଏଭଳି ଅନେକ ପ୍ରଶ୍ନକୁ ନେଇ ଏବେ ସାଧାରଣ ଲୋକଙ୍କ ଭିତରେ ଆଲୋଚନା ଓ ପର୍ଯ୍ୟାଲୋଚନା ଚାଲିଛି । ବାଲେଶ୍ୱରର ବାହାନଗା ଘଟଣାରେ ଦୋଷୀଙ୍କୁ ଖୋଜାଯାଇ ଦଣ୍ଡବିଧାନ କରାଯାଇ ପାରିବ ତ ? ନା ଅନ୍ୟ ଦୁର୍ଘଟଣା ପରି ଏହି ଦୁର୍ଘଟଣାକୁ ନେଇ ବିରୋଧୀଙ୍କ ଆକ୍ଷେପ ଓ କେନ୍ଦ୍ର ଓ ରାଜ୍ୟସରକାରଙ୍କ ସହାୟତା ଘୋଷଣା ଭିତରେ ଏହି ଦୁର୍ଘଟଣା ଆଉ ଏକ ଇତିହାସ ହୋଇ ରହିଯିବ ? ଆମ ଦେଶର ଟ୍ରେନ୍ ଯାତ୍ରୀ ମାନେ କେବେ ଏକ ନିରାପଦ ଟ୍ରେନ୍ ଯାତ୍ରା ଅନୁଭବ କରିବାର ସୁଯୋଗ ପାଇବେ ? ପରିଶେଷରେ ଏହି ଦୁର୍ଘଟଣା ପରେ ଲୋକଙ୍କ ମନରେ ଉଠିଥିବା ଏକାଧିକ ପ୍ରଶ୍ନ ସରକାରଙ୍କୁ ପଚାରିବ କିଏ ଓ ସରକାର କ’ଣ ଏସବୁର ଉତ୍ତର ଦେବାରେ ସକ୍ଷମ ହେବେ ?
