ବ୍ୟୁରୋ ରିପୋର୍ଟ, ନିର୍ଭୀକ, ଭୁବନେଶ୍ୱର, ୨୦ ଫେବୃଆରୀ ୨୦୨୩
୨୦୨୪ ମଇଦାନରେ ଲଢ଼େଇ ପୂର୍ବରୁ ଏବେ ଓଡ଼ିଶାରେ ଆରମ୍ଭ ହୋଇଯାଇଛି ଶାସକ ବିଜେଡି ଓ ବିରୋଧୀ ବିଜେପି ମଧ୍ୟରେ ଟ୍ୱିଟରରେ ଲଢ଼େଇ । ପ୍ରଭାବଶାଳୀ ମନ୍ତ୍ରୀ ଥିବା ନବକିଶୋର ଦାସଙ୍କ ହତ୍ୟାଘଟଣା ପରଠାରୁ ଦୁଇ ଦଳ ମଧ୍ୟରେ ଏହି ଲଢ଼େଇ ଜୋର ହେବାରେ ଲାଗିଛି । ଏପରିକି ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ଦାବୀ ନେଇ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ବୟାନ, ପଦ୍ମପୁର ଉପନିର୍ବାଚନ ପରେ ମୁଖ୍ୟମନ୍ତ୍ରୀଙ୍କ ଝାରବନ୍ଧଗସ୍ତ କାର୍ଯ୍ୟକ୍ରମକୁ ନେଇ ଏହି ଦୁଇ ଦଳର ନେତାମାନେ ମୁହାଁମୁହିଁ ହୋଇଛନ୍ତି । ଗୋଟିଏ ପଟେ ନବକିଶୋର ଦାସଙ୍କ ହତ୍ୟା, ବିରୋଧୀ ଦଳ ନେତା ଜୟନାରାୟଣ ମିଶ୍ର ଓ ପୋଲିସ ଅଫିସରଙ୍କ ମଧ୍ୟରେ ଠେଲାପେଲା ଘଟଣାକୁ ନେଇ ଦୁଇ ଦଳ ମଧ୍ୟରେ ପାର୍ଟି ଅଫିସରେ ସାମ୍ବାଦିକ ସମ୍ମିଳନୀ ଠାରୁ ରାସ୍ତାରେ ବିକ୍ଷୋଭ ଓ ପ୍ରତିବାଦର ଲଢ଼େଇ ଚାଲିଥିଲା ବେଳେ ସୋସିଆଲ ମିଡ଼ିଆରେ ମଧ୍ୟ ବିଜେଡି ଓ ବିଜେପି ପରସ୍ପର ବିରୋଧରେ ଯୁଦ୍ଧ ଘୋଷଣା କରି ଦେଇଥିଲା ଭଳି ଲାଗୁଛି ।
ବିଜେଡି ପକ୍ଷରୁ ଟ୍ୱିଟରରେ ଲଢ଼େଇର ନେତୃତ୍ୱ ଦଳର ସଂଗଠନ ସଂପାଦକ ପ୍ରଣବ ପ୍ରକାଶ ଦାସ ସମ୍ଭାଳି ଥିବା ବେଳେ ବିଜେପି ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଗକୁ ଆସିଛନ୍ତି । ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ବିଜେଡି ବିଜେପିକୁ ଅଡ଼ୁଆରେ ପକାଇବାକୁ ଚେଷ୍ଟା କରିଛି । ସେହି ପରି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଓଡ଼ିଶା ଆସିଥିବା ବେଳେ ଓଡ଼ିଶାର ସ୍ୱତନ୍ତ୍ର ରାଜ୍ୟ ପାହ୍ୟା ଦାବୀକୁ ଖଣ୍ଡନ କରିବା ଘଟଣା ନେଇ ମଧ୍ୟ ବିଜେଡି ତରଫରୁ ବିଜେପି ବିରୋଧରେ କେନ୍ଦ୍ରୀୟ ଅବହେଳାର ଏକ କ୍ୟାମ୍ପେନ ଆରମ୍ଭ ହୋଇଛି । ଅନ୍ୟ ପକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବରଗଡ଼ ଜିଲ୍ଲା ଗସ୍ତକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଏକାଧିକ ଟ୍ୱିଟ୍ କରି ସିଧା ସଳଖ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଛନ୍ତି । ପଦ୍ମପୁରକୁ ଜିଲ୍ଲା କରିବା ପାଇଁ ମୁଖ୍ୟମନ୍ତ୍ରୀ ନେଇଥିବା ଏକବର୍ଷ ସମୟକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଜୋରଦାର ହମଲା କରିଛନ୍ତି ଶାସକ ଦଳ ଓ ମୁଖ୍ୟମନ୍ତ୍ରୀଙ୍କ ଉପରେ । ଗୋଟିଏ କି ଦୁଇଟି ନୁହେଁ ଏକ ଥରକେ ୯ଟି ଟ୍ୱିଟ୍ କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀଙ୍କୁ ଏକାଧିକପ୍ରଶ୍ନ ପଚାରିବା ସହ ପଶ୍ଚିମ ଓଡ଼ିଶାର ଏହି ଜିଲ୍ଲା ପ୍ରତି ସରକାରୀ ଉଦାସୀନତାକୁ ପଦାରେ ପକାଇବାକୁ ଚେଷ୍ଟା କରିଛନ୍ତି । ଏପରିକି ମୁଖ୍ୟମନ୍ତ୍ରୀ ପଦ୍ମପୁର ବାସୀଙ୍କୁ ଠକିଛନ୍ତି ବୋଲି କହିବା ସହ କାହାର ହାତ ଲେଖାକୁ ମୁଖ୍ୟମନ୍ତ୍ରୀ ପଢୁଛନ୍ତି ବୋଲି ମଧ୍ୟ ପ୍ରଶ୍ନ କରିଛନ୍ତି ଧର୍ମେନ୍ଦ୍ର ପ୍ରଧାନ ।
ସେହିପରି ବିଜେଡି ପକ୍ଷରୁ ଓଡ଼ିଶାକୁ ସ୍ୱତନ୍ତ୍ରପାହ୍ୟା ଦାବୀକୁ ରାଜ୍ୟ ବିଜେପିର ନେତାମାନେ ବିଗତ ନିର୍ବାଚନ ମାନଙ୍କରେ ସେମାନଙ୍କ ନିର୍ବାଚନ ଇସ୍ତାହାରରେ ସ୍ଥାନ ଦେଇ ମଧ୍ୟ ଏବେ କାହିଁକି ନିରବ ବୋଲି ପ୍ରଶ୍ନ କରିଛନ୍ତି ବିଜେଡି ସଂଗଠନ ସଂପାଦକ ପ୍ରଣବ ପ୍ରକାଶ ଦାସ । କେନ୍ଦ୍ରମନ୍ତ୍ରୀ ନିର୍ମଳା ସୀତାରମଣଙ୍କ ବୟାନକୁ ନେଇ ସେ ଏକାଧିକ ପ୍ରଶ୍ନ ପଚାରିବା ସହ ରାଜ୍ୟ ବିଜେପିର ନେତା ମାନଙ୍କୁ ଅଡୁଆରେ ପକାଇବାକୁ ଚେଷ୍ଟା କରିଛନ୍ତି ସୋସିଆଲ ମିଡ଼ିଆରେ । ବିରୋଧୀ ଦଳ ନେତା ଜୟନାରାୟଣ ମିଶ୍ର ଓ ପୋଲିସ ଅଫିସରଙ୍କ ମଧ୍ୟରେ ହୋଇଥିବା ଗଣ୍ଡଗୋଳକୁ ନେଇ ମଧ୍ୟ ବିଜେଡି ସଂଗଠନ ସଂପାଦକ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କୋର୍ଟକୁ ବଲ ଫିଙ୍ଗିଛନ୍ତି ।
ତେବେ ମନ୍ତ୍ରୀ ନବକିଶୋର ଦାସଙ୍କ ହତ୍ୟା ପ୍ରସଙ୍ଗରେ ଶାସକ ଦଳ ବ୍ୟାକ୍ ଫୁଟ୍ କୁ ଠେଲି ହୋଇଯାଇଥିବା ବେଳେ ବିରୋଧୀ ଦଳ ନେତାଙ୍କ ପୋଲିସ ସହ ଗଣ୍ଡଗୋଳ ପ୍ରସଙ୍ଗ ନେଇ ଆତ୍ମରକ୍ଷା କରିବାପାଇଁ ଯଥେଷ୍ଟ ଉଦ୍ୟମ କରୁଥିବା ଭଳି ମନେହୁଏ । ବିଜେପି ପକ୍ଷରୁ ମଧ୍ୟ ଏହି ହତ୍ୟାକାଣ୍ଡ ଘଟଣାର ପ୍ରକୃତ କାରଣ ଜଣା ନପଡ଼ିବାକୁ ପ୍ରମୁଖ ପ୍ରସଙ୍ଗ କରାଯାଇଥିବା ବେଳେ ଏଥିରୁ ଦଳ ପଛକୁ ହଟିବା ଭଳି ମଧ୍ୟ ଜଣାପଡ଼ୁନାହିଁ । ବିଧାନସଭା ଅଧିବେଶନ ପୂର୍ବରୁ ବିଜେଡି ଓ ବିଜେପି ମଧ୍ୟରେ ଆରମ୍ଭ ହୋଇଥିବା ଏହି ଲଢ଼େଇ ଆସନ୍ତା ଅଧିବେଶନ ସୁରୁଖୁରୁରେ ଚାଲିବ କି ନାହିଁ ସେ ନେଇ ଆଶଙ୍କା ସୃଷ୍ଟି ହୋଇଛି । ମାତ୍ର ଦୁଇ ଦଳ ଭିତରେ ଆରମ୍ଭ ହୋଇଥିବା ଏହି ଲଢ଼େଇ ଆଗକୁ ବଢ଼ିବ ତ ? ବିଧାନସଭାରେ ବିଜେପି ମନ୍ତ୍ରୀ ନବକିଶୋର ଦାସଙ୍କ ହତ୍ୟା ପ୍ରସଙ୍ଗରେ ଶାସକ ଦଳକୁ ଅଡୁଆରେ ପକାଇବତ ? ୨୦୧୯ ପୂର୍ବରୁ ଯେଉଁଭଳି ଦୃଶ୍ୟ ଦେଖିବାକୁ ମିଳିଥିଲା ଓଡ଼ିଶା ରାଜନୀତିରେ ବୋଧହୁଏ ୨୦୨୪ ନିର୍ବାଚନ ଆଗରୁ ସେହିପରି ଏକ ଲଢ଼େଇ ଦେଖିବାକୁ ମିଳିପାରେ ବିଜେଡି ଓ ବିଜେପି ମଧ୍ୟରେ । ମଇଦାନର ଲଢ଼େଇ ସହ ସୋସିଆଲ ମିଡ଼ିଆରେ ଏବେ ଏହି ଦୁଇଦଳ ପରସ୍ପର ମଧ୍ୟରେ ଲଢ଼ିବା ପାଇଁ ପ୍ରସ୍ତୁତ ହୋଇଗଲେଣି ବୋଲି ଏକ ରକମ ସଂକେତ ଦେଇ ସାରିଲେଣି ।
