ବାଲିଯାତ୍ରା ବୁଲିଚାଲ

ଗଦାଧର ସାହୁ, ବ୍ରହ୍ମଗିରି, ପୁରୀ, ୩୦ ନଭେମ୍ବର ୨୦୨୩

କଟକ ସହର
ମହାନଦୀ କୂଳେ
ବାଲିଯାତ୍ରା ମେଳା ହୁଏ,
ସାଧବ ବଣିକ
ନୌବାଣିଜ୍ୟ କଥା
ସ୍ମୃତି ଆଜି ଚେଇଁ ଥାଏ ।

ହଜାର ବରଷ
ପୁରୁଣା କାହାଣୀ
ସାତ ଦରିଆ ସେପାରେ,
ବାଲି ମାଳଦେଶ
ବୋର୍ଣ୍ଣିଓ ସୁମାତ୍ରା
ବୋଇତେ ବେପାର କରେ ।

ଧନ ରତ୍ନ ଧରି
ଧାଇଁ ଯାଉଥିଲେ
ପାଲଟଣା ବୋଇତରେ,
ଅଥଳ ସାଗର
ଲଙ୍ଘିଲେ ବେପାର
ଆମଦାନୀ ରପ୍ତାନୀରେ ।

କଳା ସଂସ୍କୃତିର
ଆଦାନ ପ୍ରଦାନ
ଭାଷା ଭାବ ବିନିମୟ,
ବାଣିଜ୍ଯରେ ଲକ୍ଷ୍ମୀ
ବୃଦ୍ଧି ଯେତେ ହୁଏ
ସରସ୍ଵତୀ ହିଁ ସଦୟ ।

ଲକ୍ଷ୍ମୀ ସରସ୍ଵତୀ
ଦୁଇ ସଉତୁଣୀ
ସମସ୍ତେ କୁହନ୍ତି ଏହା,
ବିଦେଶେ ବଣିଜ
ନୁହଁଇ ସମ୍ଭବ
ବିନା ସରସ୍ଵତୀ ଦୟା ।

ପ୍ରମାଣ ମିଳିବ
ନୁହେଁ ଅସମ୍ଭବ
ବାଲିଯାତ୍ରା ବୁଲିଚାଲ,
ଭାଷା ସଂସ୍କୃତିର
ତ୍ରିବେଣୀ ସଂଗମ
ବେପାରରେ ମୂଲଚାଲ ।