ପ୍ରମୋଦ କୁମାର ଦାଶ, କଟକ, ୨୦ ଫେବୃୟାରୀ ୨୦୨୪
ମୁଁ ପୁଣିଥରେ ଜନ୍ମନେଲି ଏନ୍ତୁଡ଼ିଶାଳରେ,
ସମସ୍ତ ଗତ, ବିଗତ ଅନୁଭବକୁ
ପଛରେ ପକାଇ
ଅନୁସରିତ କଲି ଦେହକୁ, ମନକୁ
କେବଳ ଆଉ କେବଳ
କୁଆଁ, କୁଆଁ ରାବର
ମଧୁର ଧ୍ବନି ପଛରେ ।
ନବ ଯନ୍ତ୍ରଣାକୁ ଭୁଲିଗଲି
ନୂତନ ଆନନ୍ଦର ମଧୁର ସ୍ପର୍ଶରେ,
ଅତି କୋମଳ ଅଙ୍ଗୀ ମୋର
ଶରୀରର ଅବିଚ୍ଛେଦ୍ୟ ଅଂଗକୁ
କୋଳ ମଣ୍ଡିତ କରି,
ପୂର୍ଣ୍ଣ କରିଦେଲି ମୋର ଆଗାମୀ
ଶତାବ୍ଦୀକୁ ।
ମୁଁ ପୁଣିଥରେ ନବଜନ୍ମ ନେଲି,
ଏକ ମଧୁର ସ୍ବରର ଧ୍ୱନି,
ମୋର ଆତ୍ମା କୁ ବିଜଡ଼ିତ କରି
ମୋର ସମଗ୍ର ସତ୍ତାକୁ
ଆବୋରି ଧରି
ଗୁଞ୍ଜିତ କଲା ମା’ ମା’ ବୋଲି
ମୋ ଚାରିପଟେ ଘୁରି ଘୁରି ।
