ଅନୁରାଗ

ଆଲୋକ କୁମାର ପ୍ରଧାନ, ପୁରୀ, ୧୯ ଜୁନ୍ ୨୦୨୩

କେଉଁ ଅନୁରାଗ ଅମୁହାଁ ଦେଉଳେ ତୁମେ ଅଣଦେଖା ଦେବୀ
କେଉଁ ଅନୁରାଗ ଚିତ୍ର ବନେ ତୁମେ ଚିତି ଚଇତର ଛବି
କେଉଁ ଅନୁରାଗ ପୋଡ଼ିଲା ଦେହରେ ଶୀତଳ ଚନ୍ଦନ ଲେପ
ଚୁନା ସପନର ଚାନ୍ଦ ସବାରୀରେ ମୁଦା ଦେହଳୀ ର ତାପ

କେଉଁ ଅନୁରାଗ ହର୍ମ୍ଯ ହାରେମର ଛାତି ତଳ ରଡ଼ ନିଆଁ
ମୁଜୁରା ପରର ଗଭା ଗଜରାର ଶୂନଶାନ ଲୁହପିଆ
କେଉଁ ଅନୁରାଗ ଗଇଁଠା ପିଠା ର ଅଇଁଠା ଦେହର ଦୁଃଖ
କେଉଁ ଅନୁରାଗ ଭୋଦେଇ ଖରାର ଉଷୁମ ଉଷୁମ ବୋକ

କେଉଁ ଅନୁରାଗ ଆହତ ମନର ଅଦିନିଆ ମେଘ ଖଣ୍ଡେ
ଘଡ଼ିଏ ବରଷି ଛାଡ଼ି ଚାଲିଯାଏ କଣ୍ଟ ଦେଇ କରି ଦଣ୍ଡେ
କେଉଁ ଅନୁରାଗ ଗୋପନ ଇସାରା ଗୋଟାପଣେ ଗଞ୍ଜୁଥାଏ
କେଉଁ ଅନୁରାଗ ବଇଶାଖୀ ବାଆ ଭିତରୁ ଭିତରୁ ଦହେ

ସବୁ ଅନୁରାଗ ନରମ ନିଆଁ ରେ ଆହୂତି କୁ ଦେହ ସହେ
ଥରେ ଚିହ୍ନିଗଲେ ଦେହକୁ ନିଆଁ କୁ ବରଫ ବି ଜଳିଯାଏ।