ମୋ ମନରେ ଆଜି ଆଙ୍କିଦେଲା କିଏ

ଡକ୍ଟର ମନୋରମା ବିଶ୍ୱାଳ ମହାପାତ୍ର, ଭୁବନେଶ୍ୱର, ୨୬ ମଇ ୨୦୨୪

ମୋ ମନରେ ଆଜି ଆଙ୍କିଦେଲା କିଏ
ବଣ ମୟୂରୀର ଛାଇ
ସେ ଛାଇ ଭିତରେ ବଦଳି ଉଠିଲା
ଶରତର ନୀଳ କଇଁ।

ପ୍ରୀତିର ପୂରବୀ ରାଗ ଆଶାବରୀ
ଜୀବନକୁ ମହକାଇ
ଆକାଶର ଶତ ଇନ୍ଦ୍ରଧନୁର
ରଙ୍ଗ ଖେଳାଇ ଦେଇ।
ସଜାଇ ଦିଅ ଗୋ ଜୀବନକୁ ଆଜି
ସମୟକୁ ମହକାଇ।

ଶରତର ଶତ ଶରଧାର ଧାରା
ତମ ମନେ ଗଲା ଝରି
କଥା ରହିଯାଏ ଅକୁହା ଏମିତି
ସମୟ ବି ଯାଏ ସରି
ସଞ୍ଜ ତାରା ମୁଁ ନୀଳ ଆକାଶରେ
କେବେ ବି ଲିଭିବି ନାହିଁ
ମୋ ମନରେ ଆଜି ଆଙ୍କିଦେଲା କିଏ
ବଣ ମୟୂରୀର ଛାଇ।