ଶରତ କର ଅମର ରହେ

ବିଜୟ କୁମାର ପାଣି, ମାହାଙ୍ଗା, କଟକ, ୫ ସେପ୍ଟେମ୍ବର ୨୦୨୩

କେତେ କାଳ ପରେ ମାହାଙ୍ଗା ମାଟିରେ
ଆସିଥିଲ ରତ୍ନଗର୍ଭା ।
ତୁମ କସ୍ତୁରୀରେ ମହକାଇ ଦେଲ
ଝୁରେ ବୁଢ଼ା ଠାରୁ ଯୁବା ।।

ମାହାଙ୍ଗା ମାଟିରେ ଗ୍ରାମେ ଗ୍ରାମେ ବୁଲି
ଦେଲ କେତେ ନୂଆ ବାର୍ତ୍ତା ।
ଚକ୍ରହଳ ଧାରୀ ସାଜି ଥିଲ ତୁମେ
ବୁଝୁଥିଲ ବିଜୁ ବ୍ୟଥା ।।

ପ୍ରବାଦ ପୁରୁଷ କହୁଥିଲେ ସଦା
ଶରତ ମୋ ପ୍ରାଣକେନ୍ଦ୍ର ।
ସମକକ୍ଷ ତାଙ୍କ ଦିଶେ ନାହିଁ କେହି
ସିଏ ଏକ ମୋର ନେତ୍ର ।।

କେତେ କୀର୍ତ୍ତିରାଜି ରଚିଲେ ଆପଣ
ଓଡ଼ିଶାର ପୁର ପଲ୍ଲୀ ।
ଲାଲ ବାହଦୁର ଶାସ୍ତ୍ରୀ କୁଆଡ଼େ
ଡକାଇଲେ ତାଙ୍କୁ ଦିଲ୍ଲୀ ।।

ସବୁ ତୁଚ୍ଛ କରି ଓଡ଼ିଶାର ପାଇଁ
ଇତିହାସ ସୃଷ୍ଟି କଲ ।
ମନ୍ତ୍ରୀ ପଦେ ଥାଇ କେତେ ଗରିବଙ୍କ
ଭାଗିରଥ ସାଜି ଥିଲ ।।

ମାଟିର ମଣିଷ ମାଟିରେ ମିଶିଲେ
ନୁହଁଇ ବିଚିତ୍ର କଥା ।
କର୍ମ ଏକା ତାଙ୍କ ଅମର ରହିଛି
ହୃଦୟେ ଦିଅଇ ବ୍ୟଥା ।।

ଆଉ ଥରେ ଆସ ଆମ ଗହଣକୁ
ନୂଆ ଏକ ଜନ୍ମ ନେଇ ।
ଆମେ ରହିଅଛୁ ଲୋତକ ନୟନେ
ତୁମରି ବାଟକୁ ଚାହିଁ ।।