ବ୍ୟୁରୋ ରିପୋର୍ଟ, ନିର୍ଭୀକ, ୨୫ ଅଗଷ୍ଟ ୨୦୨୨
କେନ୍ଦ୍ର ମନ୍ତ୍ରୀ ରାମଦାସ ଅଠାୱଲେଙ୍କ ବୟାନ ପରେ ଓଡ଼ିଶା ରାଜନୀତି ଏବେ ସରଗରମ ହୋଇଛି । ନବୀନ ପଟ୍ଟନାୟକ NDAରେ ଥିଲାବେଳେ ଓଡ଼ିଶାର ମୁଖ୍ୟମନ୍ତ୍ରୀ ହୋଇଥିଲେ । ପୁଣି ଏବେ NDAରେ ସାମିଲ ହେଲେ ଭଲରେ ରହିବେ ବୋଲି କେନ୍ଦ୍ର ମନ୍ତ୍ରୀ ରାମଦାସ ଅଠାୱଲେ ଓଡ଼ିଶା ଗସ୍ତରେ ଆସିଥିବା ବେଳେ ଗଣମାଧ୍ୟମକୁ ଏକଥା କହିଛନ୍ତି ଏବଂ ନବୀନଙ୍କୁ NDAକୁ ଫେରି ଆସିବାକୁ ଅଫର୍ ଦେଇଛନ୍ତି । କେନ୍ଦ୍ର ମନ୍ତ୍ରୀଙ୍କ ଏଭଳି ବୟାନ ପରେ ବିଜେପି ଓ ବିଜେଡ଼ି ସମ୍ପର୍କ ନେଇ ପୂର୍ବରୁ ଯେଉଁ ଆଲୋଚନା ହେଉଥିଲା, ତାହା ଏବେ ପୁଣି ଜୋର ଧରିଛି ।
ଯଦିଓ ୨୦୦୯ ପରଠୁ ବିଜେପି ଓ ବିଜେଡ଼ିର ମେଣ୍ଟ ଭାଙ୍ଗି ସାରିଛି ଓ ଉଭୟ ଦଳ ପରସ୍ପର ଵିରୋଧରେ ନିର୍ବାଚନ ଲଢ଼ୁଛନ୍ତି, ତଥାପି କେତେକ ଘଟଣା ଏବେବି ଲୋକଙ୍କ ମନରେ ସନ୍ଦେହ ତିଆରି କରିଛିଯେ ବିଜେଡ଼ି ଓ ବିଜେପି ମଧ୍ୟରେ କିଛି ଅଛି ବୋଲି । ଏବେ ନିକଟରେ ରାଷ୍ଟ୍ରପତି ନିର୍ବାଚନ ବେଳେ NDAର ପ୍ରାର୍ଥୀ ହୋଇଥିବା ଦ୍ରୌପଦୀ ମୁର୍ମୁଙ୍କ ସମର୍ଥନରେ ବିଜେଡି ଆଗେଇ ଆସିବା ଏବଂ ଆଉ ଦୁଇପାଦ ଆଗକୁ ଯାଇ ତାଙ୍କ ପାଇଁ ଅନ୍ୟ ଦଳର ସମର୍ଥନ ଯୋଗାଡ଼ କରିବା ଘଟଣା ଲୋକେ ଭୁଲି ନାହାନ୍ତି । କେବଳ ସେତିକି ନୁହେଁ, ଉପରାଷ୍ଟ୍ରପତି ନିର୍ବାଚନରେ NDAର ପ୍ରାର୍ଥୀ ଜଗଦୀପ ଧନକଡ଼ଙ୍କୁ କେହି ସମର୍ଥନ କରିବା ପୂର୍ବରୁ ବିଜେଡ଼ିର ଆଗୁଆ ସମର୍ଥନ ଘୋଷଣାକୁ ମଧ୍ୟ ଓଡ଼ିଶାର ଜନସାଧାରଣଙ୍କ ଠାରୁ ବୁଦ୍ଧିଜୀବୀଙ୍କ ପର୍ଯ୍ୟନ୍ତ ସମସ୍ତେ ସହଜରେ ଭୁଲି ପାରିବେ ନାହିଁ । ଦ୍ରୌପଦୀ ମୁର୍ମୁଙ୍କୁ ଓଡ଼ିଶାର ଝିଅ କହି ବିଜେଡ଼ି ଖସି ଯାଇପାରେ, ମାତ୍ର ଉପରାଷ୍ଟ୍ରପତି ପ୍ରାର୍ଥୀଙ୍କୁ ସମର୍ଥନର କାରଣ କଣ କହି ଖସିଯିବ ବିଜେଡ଼ି ? ଏହି ପ୍ରସଙ୍ଗ ନେଇ ବିଜେଡ଼ି, ବିଜେପି ଭିତରେ ସମ୍ପର୍କ ଚର୍ଚ୍ଚା ଶେଷ ହୋଇ ନଥିବା ବେଳେ ପୁଣି ଜଣେ କେନ୍ଦ୍ର ମନ୍ତ୍ରୀଙ୍କର ନବୀନଙ୍କୁ NDA ଫେରିବା ଅଫର୍ ଏବେ ଲୋକଙ୍କୁ ଭାବିବାକୁ ବାଧ୍ୟ କରିବ ।
ଆଗରୁ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ବିଜେଡ଼ି ସଂସଦରେ ବିଜେପିକୁ ସମର୍ଥନ ଦେଇ ଆସିଛି । ଜମ୍ମୁକାଶ୍ମୀର ପୁନର୍ଗଠନ୍ ବିଲ୍ , UAPA ସଂଶୋଧନ ପ୍ରସ୍ତାବ , ଟ୍ରିପଲ୍ ତଲାକ୍ ପ୍ରସଙ୍ଗ , RTI ଆଇନ ସଂଶୋଧନ ପ୍ରସ୍ତାଵ ଭଳି ଅନେକ ବିଲ୍ ରେ ବିଜେଡ଼ିର ସମର୍ଥନ ପାଇଛି ବିଜେପି । ଏପରିକି ବିଜେପିର ସଂଖ୍ୟା ନଥିବା ବେଳେ ମଧ୍ୟ ବିଜେଡ଼ି ବିଜେପି ର ପ୍ରାର୍ଥୀ ଅଶ୍ୱିନୀ ବୈଷ୍ଣବଙ୍କୁ ସମର୍ଥନ ଦେଇ ରାଜ୍ୟସଭାକୁ ପଠାଇଛି । ୨୦୧୯ ସାଧାରଣ ନିର୍ବାଚନ ପରେ ଯଦି ବିଜେପି ସହ ବିଜେଡ଼ିର ସମ୍ପର୍କର ତର୍ଜମା କରାଯାଏ, ତାହାଲେ ଏହା ଅତ୍ୟନ୍ତ ସ୍ପଷ୍ଟ ଯେ ବିଜେପି, ବିଜେଡ଼ି ଭିତରେ ଥିବା ତିକ୍ତତା କମି ଯାଇଛି । ଏପରିକି ଆଞ୍ଚଳିକ ଦଳ ଭାବରେ କେଦ୍ରୀୟ ଅବହେଳାକୁ ପ୍ରସଙ୍ଗ କରି ଆସୁଥିବା ବିଜେଡ଼ିର ସ୍ୱର ମଧ୍ୟ ଦବି ଯାଇଛି । ମେଣ୍ଟ ଭାଙ୍ଗିବା ପରେ ବିଜେପି ଓ ବିଜେଡ଼ି ମଧ୍ୟରେ ଯେଉଁ ରାଜନୈତିକ ଶତ୍ରୁତା ଦେଖିବାକୁ ମିଳିଥିଲା ତାହା କେବଳ ଏବେ ନିର୍ବାଚନ ସମୟରେ କାଁ ଭାଁ ଦେଖିବାକୁ ମିଳୁଛି । ଅନେକ ଗୁରୁତ୍ୱପୂର୍ଣ ପ୍ରସଙ୍ଗରେ ରାଜ୍ୟ ବିଜେପି ମଧ୍ୟ ବିଜେଡ଼ି ପ୍ରତି କୋହଳ ମନୋଭାବ ପୋଷଣ କରୁଛି । ବିଜେପିର କର୍ମୀଙ୍କୁ ଏହାର କାରଣ ପଚାରିଲେ ଶୁଣିବାକୁ ମିଳୁଛି ଯେ, ସେମାନଙ୍କର କେନ୍ଦ୍ର ମନ୍ତ୍ରୀ ଓ ନେତା ମାନେ ବିଜେଡ଼ି ସହ ସାଲିସ୍ କରୁଥିବା ବେଳେ ଦଳ କିପରି ବିଜେଡ଼ିକୁ ବିରୋଧ କରିବ ? ସିଧା ଭାବରେ ବୁଝିବାକୁ ଗଲେ ବିଜେଡ଼ି ଓ ବିଜେପି ମଧ୍ୟରେ ସଡ଼କରୁ ସଂସଦ ଭବନ ଯାଏ ଚାଲିଥିବା ଲଢ଼େଇ ଏବେ ଆଉ ଦେଖବାକୁ ମିଳୁନି । ଉଭୟ ଦଳ ଏ କଥାକୁ ଯେତେ ଅସ୍ବୀକାର କଲେବି ଲୋକମାନେ ଏହା ବୁଝିଗଲେଣି ।
ଲୋକମାନେ ଯେତେବେଳେ ବିଜେଡ଼ି ଓ ବିଜେପିର ଅଘୋଷିତ ବା ଅଲିଖିତ ବୁଝାମଣାର କାରଣ ଖୋଜୁଛନ୍ତି ଠିକ୍ ସେତିକିବେଳେ କେନ୍ଦ୍ରମନ୍ତ୍ରୀ ରାମଦାସ ଅଠାୱଲେଙ୍କ NDA ଫେରିବା ପ୍ରସଙ୍ଗ ଲୋକଙ୍କ ଭାବନାକୁ ଆହୁରି ପ୍ରଭାବିତ କରିଛି । ବିଜେପି ଓ ବିଜେଡ଼ି ମଧରେ ଥିବା ଭିତିରିଆ ସମ୍ପର୍କକୁ ଯେତେବେଳେ ଦୁଇ ଦଳ ଅସ୍ବୀକାର କରୁଛନ୍ତି ଠିକ୍ ସେତିକି ବେଳେ କେନ୍ଦ୍ର ମନ୍ତ୍ରୀ ଅଠାୱଲେ ଦୁଇଦଳର ମୁଣ୍ଡରେ ସମ୍ପର୍କର ଅଠା ବୋଳି ଦେଇଗଲେ । ଯଦିଓ ଗଣମାଧ୍ୟମରେ ବିଜେପି ଓ ବିଜେଡ଼ି ଏହାକୁ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି ମାତ୍ର ଅଠାୱଲେଙ୍କ ଅଠା ବିଜେପି ଓ ବିଜେଡ଼ି ମୁଣ୍ଡରୁ ଛାଡିବା ସହଜ ନୁହେଁ ।
