ବ୍ୟୁରୋ ରିପୋର୍ଟ, ନିର୍ଭୀକ, ୦୨ ସେପ୍ଟେମ୍ବର ୨୦୨୨
ପ୍ରତିଦିନ ଭାରତରେ ୮୬ଟି ଧର୍ଷଣ ମାମଲା ରୁଜୁ ହେଉଥିବା ବେଳେ ପ୍ରତି ଘଣ୍ଟାରେ ୪୯ଟି ମହିଳାଙ୍କ ବିରୋଧରେ ନିର୍ଯ୍ୟାତନା ମାମଲା ପଞ୍ଜିକୃତ ହେଉଛି । ଏହା ହେଲାNCRB ( ନ୍ୟାସନାଲ କ୍ରାଇମ ରେକର୍ଡ ବ୍ୟୁରୋ ) ର ୨୦୨୧ ମସିହାର ତଥ୍ୟ । ମହିଳାଙ୍କ ବିରୋଧରେ ସଂଗଠିତ ହୋଇଥିବା ହିଂସା ପ୍ରବଣ ରାଜ୍ୟର ତାଲିକା ଯଦି ଦେଖାଯାଏ ତେବେ ବଳାତ୍କାର ମାମଲାରେ ପ୍ରଥମ ସ୍ଥାନ ଅଧିକାର କରିଛି ରାଜସ୍ଥାନ । ଗତବର୍ଷର ପଞ୍ଜିକୃତ ବଳାତ୍କାର ମାମଲା ସଂଖ୍ୟା ରାଜସ୍ଥାନର ରହିଛି ୬,୩୩୭, ଏହା ପରେ ପରେ ରହିଛି ମଧ୍ୟପ୍ରଦେଶର ସ୍ଥାନ । ଯେଉଁ ଠାରେ ପଞ୍ଜିକୃତ ବଳାତ୍କାର ମାମଲା ସଂଖ୍ୟା ରହିଛି ୨,୯୪୭ । ୩ୟ ସ୍ଥାନରେ ରହିଛି ମହାରାଷ୍ଟ୍ର (୨୪୯୬) ମାମଲା ଏବଂ ଉତ୍ତରପ୍ରଦେଶ (୨୮୪୫) ମାମଲା । କେନ୍ଦ୍ରଶାସିତ ଅଞ୍ଚଳ ମଧ୍ୟରେ ଦିଲ୍ଲୀରେ ରହିଛି ମାମଲା ସଂଖ୍ୟା ୧୨୫୦ । ଆମ ରାଜ୍ୟ ଓଡିଶାର ମଧ୍ୟ ସ୍ଥିତି ଭଲ ନାହିଁ । ୨୦୨୧ ମସିହାରେ ଓଡିଶାରେ ବଳାତ୍କାର ମାମଲା ସଂଖ୍ୟା ରହିଛି ୧୪୫୬ । ପ୍ରତି ୧ଲକ୍ଷ ଜନସଂଖ୍ୟାରେ ଯଦି ବଳାତ୍କାର ହାର ଦେଖାଯାଏ ତେବେ ରାଜସ୍ଥାନରେ ୧୬.୪ ପ୍ରତିଶତ, ଚଣ୍ଡିଗଡରେ ୧୩.୩ ପ୍ରତିଶତ, ଦିଲ୍ଲୀରେ ୧୨.୯ ପ୍ରତିଶତ ଓ ହରିଆଣାରେ ୧୨.୩ ପ୍ରତିଶତ ରହିଛି ।
ସର୍ବ ଭାରତୟ ସ୍ତରରେ ୨୦୨୧ ମସିହାରେ ମହିଳାଙ୍କ ବିରୋଧରେ ଅପରାଧିକ ମାମଲାର ସଂଖ୍ୟା ହୋଇଛି ୪ଲକ୍ଷ ୨୮ ହଜାର ୨୩୮ । ୧ଲକ୍ଷ ଜନସଂଖ୍ୟାରେ ମହିଳା ବିରୋଧୀ ହିଂସାର ହାର ହୋଇଛି ୬୪.୫ ପ୍ରତିଶତ । ମହିଳାଙ୍କ ବିରୋଧରେ ସଂଗଠିତ ହିଂସାର ପରିମାଣ ଗତବର୍ଷ ଅର୍ଥାତ୍ ୨୦୨୦ରେ ଏହି ସଂଖ୍ୟା ଥିଲା ୩ଲକ୍ଷ ୩୧ହଜାର ୫୦୩ ।
ସବୁଠାରୁ ଗୁରୁତ୍ୱପୂର୍ଣ୍ଣ ତଥ୍ୟ ହୋଇଛି ୨୦୨୧ ମସିହାରେ ମହିଳାଙ୍କ ବିରୋଧରେ ହିଂସା ହୋଇଥିବା ରାଜ୍ୟ ମାନଙ୍କ ଭିତରେ ପ୍ରଥମ ସ୍ଥାନ ଅଧିକାର କରିଛି । ‘ରାମରାଜ୍ୟ’ ଚାଲିଥିବା କୁହାଯାଉଥିବା ରାଜ୍ୟ ଉତ୍ତର ପ୍ରଦେଶ । ଉତ୍ତର ପ୍ରଦେଶରେ ୫୬,୦୮୩ଟି ମାମଲା ରୁଜୁ ହୋଇଥିବା ବେଳେ ରାଜସ୍ଥାନରେ ୪୦,୭୩୮, ମହାରାଷ୍ଟ୍ରରେ ୩୯,୫୨୬. ପଶ୍ଚିମବଙ୍ଗରେ ୩୫,୮୮୪ ଏବଂ ଓଡିଶାରେ ୩୧,୩୫୨ । ଯଦି ଗତବର୍ଷର ମହିଳାଙ୍କ ବିରୋଧରେ ଅପରାଧିକ ମାମଲାର ହାରକୁ ଦେଖାଯାଏ, ତେବେ ୧୬୮.୩ ପ୍ରତିଶତ ମାମଲା ସହ ଆସାମ ପ୍ରଥମ ସ୍ଥାନ ହାସଲ କରିଥିବା ବେଳେ ଦିଲ୍ଲୀ ୧୪୭ ପ୍ରତିଶତ, ଓଡିଶା ୧୩୩ ପ୍ରତିଶତ ସହ ୩ୟ ସ୍ଥାନ ହାସଲ କରିଛନ୍ତି । ସେହିପରି ହରିଆଣା ୧୧୯.୭ ପ୍ରତିଶତ ସହ ୪ର୍ଥ ଓ ତେଲେଙ୍ଗାନା ୧୧୧.୨ ପ୍ରତିଶତ ସହ ୫ମ ସ୍ଥାନରେ ରହିଛି । NCRB ର ଏହି ତଥ୍ୟକୁ ଦେଖିବା ପରେ ସ୍ପଷ୍ଟ ହୋଇଛି ଯେ, ମହିଳାଙ୍କ ବିରୋଧରେ ଅପରାଧର ମାତ୍ରା ଗତ ବର୍ଷ ତୁଳନାରେ ୧୫.୩ ପ୍ରତିଶତ ବଢିଛି ।
ଏବେ ଭାବନ୍ତୁ ତ … ଯେଉଁ ଦେଶରେ ମହିଳା ମାନଙ୍କୁ ପୁରୁଷ ମାନଙ୍କ ସହ ସମାନ କରି ଦେଖିବା ପାଇଁ ଉଦ୍ୟମ କରାଯାଇଛି ଓ ମହିଳାମାନଙ୍କୁ ଗଣତାନ୍ତ୍ରିକ ପ୍ରକ୍ରିୟାରେ ସମାନ ସଂଖ୍ୟକ ପ୍ରତିନିଧିତ୍ୱ ମିଳୁ ବୋଲି ଦାବି କରାଯାଉଛି ସେହି ଦେଶରେ ମହିଳା କେତେ ସୁରକ୍ଷିତ? ସୁଶାସନର ସ୍ଲୋଗାନ ଦେଇଥିବା ବିଜେପି ଶାସିତ ରାଜ୍ୟ ଉତ୍ତରପ୍ରଦେଶ, ମହାରାଷ୍ଟ୍ର, ମଧ୍ୟ ପ୍ରଦେଶରେ କାହିଁକି ମହିଳା ମାନେ ଅଧିକ ବଳାତ୍କାର ର ଶିକାର ହେଉଛନ୍ତି? ଦେଶର ରାଜଧାନୀ ଦିଲ୍ଲୀ କାହିଁକି ଆଜି ମହିଳାମାନଙ୍କ ପାଇଁ ସବୁଠାରେ ଅସୁରକ୍ଷିତ ମେଟ୍ରୋସିଟି ବୋଲି ପରିଗଣିତ ହୋଇଛି? ୮୦ଲକ୍ଷ ମହିଳାଙ୍କୁ ସଶକ୍ତ କରିଥିବା ଓ ୩୩% ମହିଳାଙ୍କୁ ରାଜନୀତିରେ ସଂରକ୍ଷଣ ଦେଇ ମହିଳା ସଂରକ୍ଷଣ ବିଲ ର ପ୍ରବକ୍ତା ହୋଇଥିବା ଓଡିଶା ମଧ୍ୟ ମହିଳା ବିରୋଧୀ ହିଂସାର ହାରରେ ୩ୟ ସ୍ଥାନରେ ରହିବା ଲଜ୍ଜାଜନକ ଘଟଣା ନୁହେଁ କି ?
