ସେପ୍ଟେମ୍ବର ୨୦୨୧ରେ ନାଗା ପିପୁଲ୍ସ ଫ୍ରଣ୍ଟ (ଏନ୍.ପି.ଏଫ୍) ନାଗାଲାଣ୍ଡର ମୁଖ୍ୟ ବିରୋଧୀ ଦଳ ଘୋଷଣା କଲା ଯେ ନାଗାଲାଣ୍ଡରେ ଶାସନ କ୍ଷମତାରେ ଥିବା ନ୍ୟାସନାଲିଷ୍ଟ ଡେମୋକ୍ରାଟିକ୍ ପ୍ରୋଗେସିଭ ପାର୍ଟି (ଏନ୍.ଡି.ପି.ପି) ସହ ମିଶିଯିବ ଏବଂ ସରକାରରେ ସାମିଲ ହେବ । ଦୁଇ ଦଳ ମଧ୍ୟ ଏକ ହୋଇଗଲେ । ଏହା ପୂର୍ବରୁ ମଧ୍ୟ ୨୦୧୫ରେ ମଧ୍ୟ ବିରୋଧୀ କଂଗ୍ରେସର ୮ଜଣ ସଦସ୍ୟ ସେତେବେଳର ଶାସକ ଦଳ ନାଗା ପିପୁଲ୍ସ ଫ୍ରଣ୍ଟ ସାଥିରେ ମିଶିଯାଇଥିଲେ । ତେଣୁ ନାଗାଲାଣ୍ଡ ଏବେ ବିରୋଧୀ ଶୂନ୍ୟ ରାଜ୍ୟ ହୋଇଯାଇଛି । ମାତ୍ର ଓଡିଶାରେ ଯଦିଓ ଏଭଳି ମିଶ୍ରଣ ବିଧିବଦ୍ଧ ଭାବେ ହୋଇନାହିଁ ତେବେ ରାଜ୍ୟର ରାଜନୈତିକ ସ୍ଥିତି ବିରୋଧୀ ଶୂନ୍ୟ ବୋଲି ଭାବିବାକୁ ବାଧ୍ୟ କରୁଛି ।
ପ୍ରମୁଖ ବିରୋଧୀ ଦଳ ଥିବା କଂଗ୍ରେସର ଗତିବିଧି ଉପରେ ନଜର ପକାଯାଏ, ତେବେ ଏହାର ସ୍ଥିତି ସଂପର୍କରେ ଜାଣି ହେବ । ପୂର୍ବରୁ ବିରୋଧୀ ଦଳର ନେତା ଥିବା ଉୁପିନ୍ଦର ସିଂ, କଂଗ୍ରେସର ୩ଜଣ ପୂର୍ବତନ କାର୍ଯ୍ୟକାରୀ ସଭାପତି ନବକିଶୋର ଦାସ, ପ୍ରଦୀପ ମାଝୀ, ଚନ୍ଦ୍ରଶେଖର ସାହୁ କଂଗ୍ରେସ ଛାଡି ବିଜେଡିରେ ମିଶି ସାରିଛନ୍ତି । ସେମାନଙ୍କୁ ଅନୁସରଣ କରି ବହୁ କଂଗ୍ରେସ ନେତା, ପୂର୍ବତନ ବିଧାୟକ ଓ ସାଂସଦ ମାନେ ନିଜ ଦଳକୁ ଛାଡି ଶାସକ ଦଳର ବଶତା ସ୍ୱୀକାର କରିସାରିଲେଣି । ଏପରିକି ବର୍ତ୍ତମାନର ବିଧାୟକ ମହମ୍ମଦ ମୋକିମଙ୍କ ସମେତ ଆଉକିଛି ବିଧାୟକ ବିଜେଡିର ଶରଣାପନ୍ନ ହୋଇପାରନ୍ତି । ଏକଦା ଓଡିଶାରେ ପ୍ରଭାବଶାଳୀ ରାଜନୈତିକ ଦଳ ଥିବା କଂଗ୍ରେସ ଆଜି ବିଜେଡି ପାଖରେ କେତେ ଅସହାୟ ତାହା ଜଣାପଡୁଛି ।
ସେହିପରି ୨୦୧୯ରେ ଲୋକଙ୍କ ଦ୍ୱାରା ଜନାଦେଶ ପାଇ ପ୍ରମୁଖ ବିରୋଧୀ ଦଳ ହୋଇଥିବା ବିଜେପିର ସ୍ଥିତି ଆଜି କ’ଣ । କଂଗ୍ରେସ ଭଳି ବିଜେପିର ମଧ୍ୟ ବହୁ ନେତା ଏବେ ବିଜେଡିରେ ସାମିଲ ହୋଇଛନ୍ତି । ବିଶ୍ୱସ୍ତ ସୂତ୍ରରୁ ମିଳିଥିବା ଖବର ଅନୁଯାୟୀ ୨୦୨୪ ସାଧାରଣ ନିର୍ବାଚନ ପୂର୍ବରୁ ବିଜେପିର କିଛି ମୁଖପାତ୍ର, ବିଧାୟକ, ଏବଂ ସାଂସଦ ଏବେ ଠାରୁ ବିଜେଡିର କ୍ଷମତା କେନ୍ଦ୍ର ନିକଟରେ ଭିଡ ଜମାଇବା ଆରମ୍ଭ କଲେଣି ।
କେବଳ ବିଜେଡିରେ ବିଜେପି ନେତା ମିଶୁଛନ୍ତି ତାହା ନୁହେଁ ଆଉକିଛି ବିଜେପିର ବରିଷ୍ଠ ନେତା ତଥା କ୍ଷମତାରେ ଥିବା ଜଣେ କେନ୍ଦ୍ରମନ୍ତ୍ରୀ ମଧ୍ୟ ଶାସକ ବିଜେଡି ପାଖରେ ଆତ୍ମ ସମର୍ପଣ କରିଥିବା ନେଇ ଦଳ ଭିତରେ ଓ ବାହାରେ ଚର୍ଚ୍ଚା ଚାଲିଛି । ଓଡିଶାରେ ବିଜେଡି ଓ ବିଜେପି ଦ୍ୱାରା ପରିଚାଳିତ ଗଣମାଧ୍ୟମରେ ମଧ୍ୟ ଶାସକ ଓ ବିରୋଧିଙ୍କ ମଧ୍ୟରେ ଆକ୍ଷେପ ଓ ପ୍ରତିଆକ୍ଷେପ ଆଜିକାଲି ଦେଖିବାକୁ ମିଳୁନାହିଁ । ଶୁଣାଯାଉଛି ଯେ ବିଜେପିର କ୍ଷମତାଶାଳୀ କିଛି ନେତାଙ୍କୁ ଶାସକ ବିଜେଡି ନିର୍ବାଚନ ଜିତିବାରେ ସହଯୋଗ କରିବ ଏବଂ ବିଜେପିର ସେହି ନେତାମାନେ ବିଜେଡିର କ୍ଷମତାଶାଳୀ ଗୋଷ୍ଠୀଙ୍କୁ ସମାଲୋଚନା କରିବେ ନାହିଁ । ଏଭଳି ଏକ ଆଘୋଷିତ ରାଜିନାମା ହୋଇଥିବା ନେଇ ଜନସାଧାରଣଙ୍କ ଭିତରେ ଆଲୋଚନା ହେଉଛି ।
୨୦୨୪ ସାଧାରଣ ନିର୍ବାଚନ ପୂର୍ବରୁ ଭାରତର ଅନ୍ୟ ରାଜ୍ୟର ରାଜନୈତିକ ସ୍ଥିତି ନେଇ ଅବଗଣନା ଆରମ୍ଭ ହୋଇଥିବା ବେଳେ ଓଡିଶାର ରାଜନୀତି ଏକରକମ ସ୍ଥିର ହୋଇଯାଇଛି । ଶାସକ ବିଜେଡିର ବିରୋଧୀ ସନ୍ତୁଷ୍ଟି ନୀତି ଏବଂ କଂଗ୍ରେସ ଓ ବିଜେପିର ଆତ୍ମସମର୍ପଣ ଭାବ ଦେଖିବା ପରେ ଲୋକଙ୍କ ମନରେ ଏବେ ଅନକେ ପ୍ରଶ୍ନ ସୃଷ୍ଟି ହୋଇଛି ୨୦୨୪ ନିର୍ବାଚନରେ ବିଜେଡି ସହିତ କିଏ ଲଢିବ ? ନିର୍ବାଚନ ପୂର୍ବରୁ ଦୁଇ ବିରୋଧୀ ଦଳ ବିଜେପି ଓ କଂଗ୍ରେସ ହାତ ଟେକି ଦେବେନି ତ ? ନାମକୁ ମାତ୍ର ନିର୍ବାଚନରେ ବିଜେଡି, ବିଜେପି ଭିତରେ ପ୍ରତିଦ୍ୱନ୍ଦିତା ହୋଇ ନାଗାଲାଣ୍ଡ ପରି ଓଡିଶାରେ ଏକ ମିଳିତ ସରକାର ହେବନିତ ?
