ବ୍ୟୁରୋ ରିପୋର୍ଟ, ନିର୍ଭୀକ, ୦୫ ସେପ୍ଟେମ୍ବର ୨୦୨୨
କିଛି ଦିନର ନିରବତା ପରେ ରାଜ୍ୟ ବିଜେପି ରାଜନୀତି ଏବେ କଡ଼ ଲେଉଟାଇଛି । ନୂଆ ପ୍ରଭାରୀ ଦାୟିତ୍ୱ ନେବାପରେ ସୁନୀଲ ବଂଶଲ୍ ଓଡ଼ିଶା ଗସ୍ତରେ ଆସି ପହଂଚିଛନ୍ତି । ନୂଆ ପ୍ରଭାରୀଙ୍କୁ ଜୋରଦାର ସ୍ୱାଗତ କରିଛି ରାଜ୍ୟ ବିଜେପି । ସୁନୀଲ ବଂଶଲ୍ ଙ୍କ ନିଯୁକ୍ତି ପରେ ରାଜ୍ୟ ବିଜେପି ଶିବିରରେ ଅନେକ ଆଲୋଚନା ଆରମ୍ଭ ହୋଇଯାଇଛି । ଉତ୍ତର ପ୍ରଦେଶ ନିର୍ବାଚନ ସଫଳତାର ଶ୍ରେୟ ପାଇଥିବା ବଂଶଲ୍ ଓଡ଼ିଶା ରେ ମଧ୍ୟ ମାଟିକାମୁଡ଼ି ପଡିଥିବା ବିଜେପି କୁ ଆଗାମୀ ସାଧାରଣ ନିର୍ବାଚନରେ ବିଜୟର ସ୍ୱାଦ ଚଖାଇବେ ବୋଲି ଏକ ଧାରଣା କର୍ମୀମାନଙ୍କ ମଧ୍ୟରେ ପହଂଚାଇବାକୁ ଉଦ୍ୟମ କରାଯାଇଛି ।
ତେବେ ରାଜ୍ୟ ବିଜେପିର ସ୍ଥିତିକୁ ଯଦି ୨୦୦୯ ମସିହା ପରଠାରୁ ତର୍ଜମା କରାଯାଏ, ତେବେ ୨୦୧୯ ସାଧାରଣ ନିର୍ବାଚନ ପୂର୍ବରୁ ଓଡ଼ିଶାରେ ଭଲ ସମୟ ଥିଲା । ଯେତେବେଳେ ସାରା ଭାରତରେ ମୋଦି ଲହର ସଫଳ ହେଲା ମାତ୍ର ଓଡ଼ିଶା ରେ ତାହା ପ୍ରଭାବ ଶୂନ୍ୟ ହେଲା କାହିଁକି ? ଦୁର୍ବଳ ସଂଗଠନ ଓ ନେତାଙ୍କ ବାହାସ୍ଫୋଟ ରାଜ୍ୟ ବିଜେପି କୁ ୨୦୧୯ ନିର୍ବାଚନରେ ମଧ୍ୟ ୨୦୧୪ ନିର୍ବାଚନ ପରି ବିଫଳତାର ସ୍ୱାଦ ଚଖାଇଲା । ତଥାପି ରାଜ୍ୟ ବିଜେପି ର ନେତାମାନେ ଚେତିଲେ ନାହିଁ । ବିଜେଡ଼ି ସହ ମେଣ୍ଟ ଭାଙ୍ଗିବା ପରେ ରାଜ୍ୟ ବିଜେପି ର କିଏ ନେତୃତ୍ୱ ନେବ ଓ ବିଜେଡ଼ି କୁ ଟକ୍କର ଦେବ ତାହା ଦଳ ଚିନ୍ତା କରିପାରିଲା ନାହିଁ । କନ୍ଧମାଳ ଦଙ୍ଗା ପରେ ବିଜେପି ଏଠାରେ ହିନ୍ଦୁମାନଙ୍କର ଭୋଟ୍ ବ୍ୟାଙ୍କ କୁ ନିଜ ସପକ୍ଷରେ ନେଇ ପାରିଲାନାହିଁ ଏବଂ ଆଦିବାସୀ, ଦଳିତ, ପଛୁଆବର୍ଗ ଏପରିକି ଉଚ୍ଚ ବର୍ଗର ଭୋଟ୍ ମଧ୍ୟ ବିଜେପି ସହ ରହିଲା ନାହିଁ । ଦଳର ଦୂରଦୃଷ୍ଟିର ଅଭାବ ଓ ଭୁଲ ରଣନୀତି ଯୋଗୁଁ ବିଜେପି ବାରମ୍ବାର ନିର୍ବାଚନରେ ହାରି ଚାଲିଛି ।
ସେତେବେଳର ପ୍ରଭାରୀ ଅରୁଣ ସିଂ ଙ୍କ ଠାରୁ ଆରମ୍ଭକରି ରାଷ୍ଟ୍ରୀୟ ଅଧ୍ୟକ୍ଷ ଥିବା ଅମିତ ଶାହା ମଧ୍ୟ ଓଡ଼ିଶା ରେ ବିଜେପି କୁ ସଫଳତା ଦେଇ ପାରିଲେ ନାହିଁ । ଖୋଦ୍ ରାଷ୍ଟ୍ରୀୟ ଅଧ୍ୟକ୍ଷ ଥିବା ଅମିତ ଶାହାଙ୍କ ରଣନୀତି ମିଶନ ୧୨୦ ଏବେବି ଓଡ଼ିଶା ବିଜେପି ପାଇଁ ସ୍ୱପ୍ନ ହୋଇ ରହିଯାଇଛି । ୨୦୧୯ ନିର୍ବାଚନ ପୂର୍ବରୁ ରାଜ୍ୟ ବିଜେପି ସଭାପତି ଥିବା ବସନ୍ତ ପଣ୍ଡା ଓ ପ୍ରଭାରୀ ଅରୁଣ ସିଂ ଉଭୟ ଏହି ପରାଜୟ ପାଇଁ ନୈତିକତା ଦୃଷ୍ଟିରୁ ଦାୟୀ ବୋଲି ନିଜେ ସ୍ୱୀକାର କରିଥିଲେ ମଧ୍ୟ ପ୍ରକୃତରେ ଏହି ବିଫଳତାର ନାୟକ ଥିଲେ ରାଜ୍ୟସଂଗଠନକୁ ରିମୋର୍ଟ କଣ୍ଟ୍ରୋଲ୍ ରେ ଚଳାଇଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ତାଙ୍କ ଦ୍ୱାରା ପରିଚାଳିତ ଏକ ପ୍ରଭାବଶାଳୀ ଗୋଷ୍ଠୀ । ୨୦୧୪ ଓ ୨୦୧୯ ଉଭୟ ସାଧାରଣ ନିର୍ବାଚନରେ ବିଜେପି ସାରା ଦେଶରେ ବିଜୟବାନା ଉଡ଼େଇବାରେ ସଫଳ ହୋଇଥିବାବେଳେ କେବଳ ଓଡ଼ିଶା ହୋଇଥିଲା ବିଜେପି ପାଇଁ ଅପହଞ୍ଚ । ଏପରିକି ୨୦୧୭ ପଞ୍ଚାୟତ ନିର୍ବାଚନରେ ବିଜେପି ଭଲ ପ୍ରଦର୍ଶନ କରିଥିଲେ ମଧ୍ୟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଙ୍କ ଦ୍ୱାରା ପରିଚାଳିତ ଗୋଷ୍ଠୀ ରାଜ୍ୟ ବିଜେପିକୁ ୨୦୧୯ ନିର୍ବାଚନରେ ଆଖିଦୃଶିଆ ସଫଳତା ଦେଇ ପାରିନଥିଲେ । ନିଜେ ତତ୍କାଳୀନ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଙ୍କ ରଣନୀତି ଓଡ଼ିଶାରେ ଫିକା ପଡିଯାଇଥିଲା ନିର୍ଦ୍ଧିଷ୍ଟ କିଛି ନେତାଙ୍କ ଯୋଗୁଁ ।
ତେବେ ଆଜିର ଦିନରେ ଅନେକ ବରିଷ୍ଠ ନେତା ଯେଉଁମାନେ ଦଳକୁ ମଜଭୁତ୍ କରାଇ ପାରନ୍ତେ ସେମାନେ ଏବେ ଦଳପାଇଁ ଅଲୋଡ଼ା ହୋଇପଡ଼ିଛନ୍ତି । ଖାରବେଳ ସ୍ୱାଇଁ, ବିଜୟ ମହାପାତ୍ରଙ୍କ ଭଳି ନେତାଙ୍କ ସହଯୋଗ ଦଳ ଲୋଡୁନାହିଁ। ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଓ ରାଜ୍ୟ ବିଜେପି ନେତୃତ୍ୱ ମଧ୍ୟରେ କନ୍ଦଳ ତୀବ୍ର ହେବାରେ ଲାଗିଛି । ଅପରାଜିତାଙ୍କ ଲୋକପ୍ରିୟତାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କ୍ୟାମ୍ପ ହଜମ କରିବା ମୁଡ଼ରେ ନାହାନ୍ତି । ଦଳ ଭିତରେ ଏବେ ଆରମ୍ଭ ହେଇଯାଇଛି ପତିଆରାର ଲଢ଼େଇ । ପଶ୍ଚିମ ଓଡିଶାର ଟାଣୁଆ ନେତା ଜୁଏଲ ଓରାମ, ସୁରେଶ ପୂଜାରୀ ଆଦି ମଧ୍ୟ ଉପେକ୍ଷିତ । ଗତ ପଞ୍ଚାୟତ ଓ ପୌର ନିର୍ବାଚନରେ ବିଜେପିର ପ୍ରଦର୍ଶନ ଅତ୍ୟନ୍ତ ଶୋଚନୀୟ ହୋଇପଡିଛି । ଏପରିସ୍ଥଳେ ନୂଆ ପ୍ରଭାରୀ ସୁନୀଲ ବଂଶଲ୍ କାହାକୁ ନେଇ ଦଳ କୁ ଆଗକୁ ବଢ଼ାଇବେ ? ଧର୍ମେନ୍ଦ୍ର ପ୍ରଧାନଙ୍କ କ୍ୟାମ୍ପ ଓ ଅପରାଜିତା ଷଡ଼ଙ୍ଗୀଙ୍କ କ୍ୟାମ୍ପ ମଧ୍ୟରେ ସମନ୍ୱୟ ରଖି ପାରିବେ ତ ? ଏକଦା ବିଜେପିର ଗଡ଼ ଥିବା ପଶ୍ଚିମ ଓଡିଶାରେ ଦଳର ଟାଣୁଆ ନେତାଙ୍କୁ ଏକାଠି କରିପାରିବେ ତ ? ପୂର୍ବ ପ୍ରଭାରୀଙ୍କ ଭଳି ସୁନୀଲ ବଂଶଲ୍ ମଧ୍ୟ ଧର୍ମେନ୍ଦ୍ର ପ୍ରଧାନଙ୍କ ଇସାରାରେ ନାଚିବେ ନା ଲୋକଙ୍କର ପସନ୍ଦର ଚେହେରାକୁ ୨୦୨୪ ପାଇଁ ଦଳର ପ୍ରମୁଖ ଚେହେରା କରିବେ ? ଓଡିଶା ବିଜେପି କୁ ନିର୍ବାଚନ ଜିତିବାର କୌଶଳ ଶିଖାଇବେ ନା ବିଜେଡ଼ି ସହ ଥିବା ଭିତିରି ସମ୍ପର୍କକୁ ଆହୁରି ମଜବୁତ୍ କରିବେ ?
