ବ୍ୟୁରୋ ରିପୋର୍ଟ, ନିର୍ଭୀକ, ୧୪ ସେପ୍ଟେମ୍ବର ୨୦୨୨
ପଞ୍ଜାବରେ ଆମ୍ ଆଦମୀ ପାର୍ଟି ସରକାରକୁ ଭାଙ୍ଗିବାକୁ ବିଜେପି ଉଦ୍ୟମ କରୁଛି ବୋଲି ଆପ୍ ଅଭିଯୋଗ କରିଛି । କିଛି ଦିନ ପୂର୍ବରୁ ମଧ୍ୟ ଦିଲ୍ଲୀରେ ସରକାର ଭାଙ୍ଗିବାକୁ ଉଦ୍ୟମ କରୁଥିବା ନେଇ ଆପ୍ ଅଭିଯୋଗ କରିଥିଲା । ମାତ୍ର ତାହା ସଫଳ ହେଲାନାହିଁ ବୋଲି ଆପ୍ ର ନେତାମାନେ ଗଣମାଧ୍ୟମ ଆଗରେ ବୟାନ ରଖିଥିଲେ । ଏପରିକି ଦିଲ୍ଲୀରେ ଆମ୍ ଆଦମୀ ପାର୍ଟି ସରକାର ତାର ସଂଖ୍ୟାଗରିଷ୍ଠତାର ପ୍ରମାଣ ମଧ୍ୟ ଦେବାକୁ ପଡିଲା ବିଧାନ ସଭାରେ ।
ବିହାରରେ ମଧ୍ୟ ଜେଡ଼ିୟୁ ଓ ବିଜେପି ସରକାର ଭାଙ୍ଗିଯିବା ପରେ ଜେଡ଼ିୟୁ ନେତାଙ୍କର ମଧ୍ୟ ସମାନ ଅଭିଯୋଗ ଥିଲା ଯେ ବିଜେପି ବିହାରରେ ଜେଡ଼ିୟୁର ବିଧାୟକ ମାନଙ୍କୁ କିଣିବାକୁ ଉଦ୍ୟମ କରିଥିଲା କିଛି ନେତାଙ୍କ ମାଧ୍ୟମରେ । ତେବେ ଜେଡ଼ିୟୁ ଏହା ଜାଣିବା ପରେ ବିଜେପି ସହ ସମ୍ପର୍କ ଛିନ୍ନ କରି ଆରଜେଡ଼ି ଓ କଂଗ୍ରେସ ସହ ମିଶି ସରକାର ଗଠନ କଲା । ବିଜେପି ବିରୋଧରେ ସରକାର ଭଙ୍ଗା ଅଭିଯୋଗକୁ ବିଶ୍ୱାସ କରାଯିବ ନା ନାହିଁ । ଯଦି ମହାରାଷ୍ଟ୍ରରେ ଶିବସେନା, ଏନସିପି ଓ କଂଗ୍ରେସ ର ସରକାରକୁ ଭାଙ୍ଗି ବିଜେପି ନୂଆ ସରକାର ଗଠନ ପ୍ରକ୍ରିୟାକୁ ତର୍ଜମା କରାଯାଏ ତେବେ ବିଜେପି ବିରୋଧରେ ଆସୁଥିବା ଏହି ଅଭିଯୋଗକୁ ସତ ବୋଲି ଧରିନେବାକୁ ପଡିବ ।
ମହାରାଷ୍ଟ୍ରରେ “ଅପରେସନ୍ ଲୋଟସ୍” ସଫଳ ହେବା ପରେ ବିହାର ଓ ଦିଲ୍ଲୀରେ ଏହା ବିଫଳ ସାବ୍ୟସ୍ତ ହୋଇଛି । ନୀତିଶ୍ କୁମାର ଓ ଅରବିନ୍ଦ କେଜିରୀୱାଲ ବିଜେପିର ଏହି ଅଭିଯାନ ଉପରେ ରୋକ୍ ଲଗାଇଛନ୍ତି । ପୂର୍ବରୁ ଯଦି ଦେଖାଯାଏ, ବିଜେପିର “ଅପରେସନ୍ ଲୋଟସ୍” ସଫଳ ହୋଇଥିବା ରାଜ୍ୟ ମଧ୍ୟରେ ରହିଛି, ମଣିପୁର, ଗୋଆ, କର୍ଣ୍ଣାଟକ, ମଧ୍ୟପ୍ରଦେଶ ଆଦି ରାଜ୍ୟ । ଏହି ରାଜ୍ୟ ଗୁଡିକରେ ବିଜେପି ର ନିଜର ସଂଖ୍ୟା ନଥାଇ ସରକାର ଗଠନ କରିବାରେ ସଫଳ ହୋଇଛି । ଏଣୁ ବିଜେପିର ଏଭଳି ସରକାର ଭାଙ୍ଗିବା ଓ ଗଢ଼ିବା ଉଦ୍ୟମ ଏବେ ଅନ୍ୟ ରାଜନୈତିକ ଦଳ ଗୁଡ଼ିକୁ ଚିନ୍ତାରେ ପକାଇ ଦେଇଛି । କୌଣସି ସମୟରେ ମଧ୍ୟ ଯେ କୌଣସି ରାଜ୍ୟରେ ବିଜେପି ଆବଶ୍ୟକ ସଂଖ୍ୟକ ବିଧାୟକ ନଥିଲେ ମଧ୍ୟ ସରକାର ଗଢ଼ିପାରିବ ତାହା ଏବେ ପ୍ରମାଣିତ ହୋଇଯାଇଛି । ଏପରିକି ବିଜେପିର ନଜର ପଶ୍ଚିମବଙ୍ଗ ଉପରେ ରହିଥିବା କଥା ନେଇ ସରକାର ରେ ଥିବା ଟିଏମ୍ ସି ର ନେତା ମାନେ ମଧ୍ୟ ବାରମ୍ବାର କହି ଆସୁଛନ୍ତି ।
ରାଜନୈତିକ ଅସ୍ଥିରତା ତିଆରି କରିବା ଅବା କ୍ଷମତା ଦଖଲ କରିବାର ଉଦ୍ଦେଶ୍ୟ ନେଇ ବିଜେପି ଏହା କରିଚାଲିଛି । ଦେଶର ପ୍ରମୁଖ ବିରୋଧି ଦଳ କଂଗ୍ରେସ ଅଧିକ ଭାବେ ବିଜେପିର ଶିକାର ହୋଇଛି । ଗୋଆ, ମଣିପୁର ମଧ୍ୟପ୍ରଦେଶ ଭଳି ରାଜ୍ୟରେ କଂଗ୍ରେସକୁ କ୍ଷମତାରୁ ବେଦଖଲ କରିବା ବିଜେପି ପାଇଁ ସହଜ ହୋଇଥିଲା । ଏବେ ଆଉ କିଛି ରାଜନୈତିକ ଦଳକୁ ବିଜେପି ନିଜ ଟାର୍ଗେଟରେ ରଖିଛି । ପଞ୍ଜାବରେ ଅକାଳି ଦଳ, ମହାରାଷ୍ଟ୍ରରେ ଶିବସେନା, ତାମିଲନାଡୁରେ ଏଆଇଏଡିଏମକେ ଦଳର ବିଭାଜନ କରିବା ରେ ମଧ୍ୟ ବିଜେପିର ସାମର୍ଥ୍ୟ ପ୍ରମାଣିତ ହୋଇଛି । ଯେଉଁମାନେ ବିଜେପିର ଏକଦା ଘନିଷ୍ଠ ସହଯୋଗୀ ଥିଲେ ସେମାନଙ୍କୁ ବିଜେପି ମଧ୍ୟ ଭାଙ୍ଗିବା ପାଇଁ କୁଣ୍ଠା ପ୍ରକାଶ କରିନାହିଁ । ବିଜେପି ବିରୋଧରେ ଶକ୍ତିଶାଳୀ ହୋଇଥିବା ରାଜନୈତିକ ଦଳ ଉପରେ ବିଜେପିର ନଜର ସବୁବେଳେ ରହିଛି । ପୂର୍ବ ଭାରତର ବହୁ ରାଜ୍ୟ ଉପରେ ବିଜେପି ନିଜର କାୟା ବିସ୍ତାର କରିସାରିବା ପରେ ଏବେ ଓଡ଼ିଶା ଓ ପଶ୍ଚିମବଙ୍ଗ ଉପରେ ଆଖି ରଖିଛି । ଆଗକୁ ମଧ୍ୟ ଏହି ଦୁଇ ରାଜ୍ୟ ଦଖଲ କରିବାର ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଉଥିବା କଥା ବିଜେପିର ଅନ୍ଦର ମହଲରୁ ଶୁଣିବାକୁ ମିଳୁଛି । ବିଜେପିର ଏକ ସୂତ୍ରରୁ ମିଳିଥିବା ଖବର ଅନୁଯାୟୀ ପଶ୍ଚିମବଙ୍ଗ ଓ ଓଡ଼ିଶାରେ ଏବେ ବିଜେପି ଠିକଣା ସମୟରେ ଠିକ୍ ନିଷ୍ପତ୍ତିକୁ କାର୍ଯ୍ୟକାରୀ କରିବାପାଇଁ ଅଣ୍ଟା ଭିଡି ସାରିଲାଣି । ଦଳୀୟ ପ୍ଲାନ ମୁତାବକ ଓଡ଼ିଶାର ଶାସନ କ୍ଷମତାରେ ଥିବା ବିଜେଡ଼ିର ବହୁ ନେତା ବିଭିନ୍ନ ଦୁର୍ନୀତି ସହ ଜଡିତ ଅଛନ୍ତି, ସେମାନଙ୍କ ଉପରେ ବିଜେପିର ନଜର । ଏପରିକି ୨୦୨୪ ସାଧାରଣ ନିର୍ବାଚନ ପୂର୍ବରୁ ଅଧିକ ଏମପି ଓ ଏମ୍ଏଲ୍ଏ ସିଟ୍ ଜିତିବା ପାଇଁ ବିଜେପି ନିଜକୁ ପ୍ରସ୍ତୁତ କରୁଛି । ନୂଆ ପ୍ରଭାରୀ ଆସିବା ପରେ ବିଜେପିର ଓଡ଼ିଶା ପାଇଁ ଅଙ୍କ କଷା ଆରମ୍ଭ ହୋଇଛି । ଗୁରୁତ୍ୱପୁର୍ଣ କଥା ହେଉଛି ଓଡ଼ିଶା ଓ ପଶ୍ଚିମବଙ୍ଗର ପ୍ରଭାରୀ ଦା ୟିତ୍ୱ ଜଣଙ୍କ ହାତରେ ଦିଆ ଯାଇଛି ।
ଯଦି ବିଜେପି ଅନ୍ୟ ରାଜ୍ୟ ଭଳି ଏଥର ଅପରେସନ୍ ଲୋଟସ୍ କୁ କାର୍ଯ୍ୟକାରୀ କରିବାକୁ ଚାହେଁ ତାହା ଓଡ଼ିଶାରେ ସଫଳ ହେବ କି ? ବିଜେଡ଼ିର କିଛି ଅସନ୍ତୁଷ୍ଟ ତଥା ନିକଟରେ ମନ୍ତ୍ରୀ ମଣ୍ଡଳ ରୁ ବିଦା ହୋଇଥିବା ନେତା ବିଜେପି ସହ ସମ୍ପର୍କ ରଖିଥିବା କଥା ଯଦି ସତ ହୁଏ ତେବେ ବିଜେପିର ଏହି ଅଭିଯାନକୁ ବିଜେଡ଼ି ଅଟକାଇ ପାରିବ କି ?
